Ti Maikadua nga Ar-ari 6:1-33
6 Ti annak dagiti propeta+ kinunada ken Eliseo: “Nailet unayen ti lugar a pagnanaedantayo.
2 Pangngaasim ta palubosannakami a mapan idiay Jordan. Mangala ti tunggal maysa kadakami iti troso sadiay ket mangibangonkami iti pagnaedanmi.” Insungbatna: “Mapankayo.”
3 Kinuna ti maysa kadakuada: “Mabalin kadi a kumuyogka kadakami nga adipenmo?” Insungbatna: “Wen, kumuyogak.”
4 Kimmuyog ngarud kadakuada ket nakadanonda idiay Jordan sa rinugianda ti agpukan kadagiti kayo.
5 Bayat nga agpukpukan ti maysa kadakuada, naipuruak ti ulo ti wasay ket natnag iti danum, isu nga impukkawna: “Ay, apok, binulodko laeng dayta!”
6 Kinuna ti adipen ti pudno a Dios: “Nakatnaganna?” Intudona no sadino. Nangputed ni Eliseo iti sanga ti kayo sa impalladawna sadiay ket timpaw ti ulo ti wasay.
7 Kinunana: “Alaem.” Ginaw-atna ket innalana.
8 Ita, napan ti ari ti Siria tapno makigubat iti Israel.+ Nagkonsulta kadagiti adipenna ket imbagana no sadino ti pagkampuanda.
9 Impaibaga ti adipen ti pudno a Dios+ iti ari ti Israel: “Agannadkayo no lumabaskayo iti daytoy a lugar, ta ditoy ti sumalogan dagiti Siriano.”
10 Nangibaon ngarud ti ari ti Israel iti mapan iti lugar nga imbaga ti adipen ti pudno a Dios. Maulit-ulit a pinakdaaranna ti ari, isu a saan a napnapan kadagita a lugar. Sumagmamano a daras* a napasamak dayta.+
11 Nakapungtot ti ari* ti Siria, isu nga inayabanna dagiti adipenna ket kinunana: “Agpudnokayo! Asino kadakayo ti tumultulong iti ari ti Israel?”
12 Kinuna ti maysa kadagiti adipenna: “Awan kadakami, apo ari! Ni Eliseo a propeta iti Israel ti mangibagbaga iti ari ti Israel kadagiti banag nga ibagbagayo iti uneg ti kuartoyo.”+
13 Kinuna ti ari: “Ammuenyo ti ayanna, tapno mangibaonak iti lallaki a mangtiliw kenkuana.” Idi agangay, naipadamag kenkuana: “Adda idiay Dotan.”+
14 Dagus a nangibaon kadagiti kabalio ken karuahe a pakigubat, kasta met iti dakkel nga armada. Napanda sadiay iti rabii ket pinalikmutanda ti siudad.
15 Idi nasapa a bimmangon ti katulongan ti* adipen ti pudno a Dios ken rimmuar, nakitana a napalikmutan ti siudad kadagiti kabalio ken karuahe a pakigubat. Impadamag a dagus ti katulongan: “Apok! Ania ti aramidentayo?”
16 Ngem insungbatna: “Dika agbuteng!+ Ta ad-adu ti kakaduata ngem ti kakaduada.”+
17 Nangrugi nga agkararag ni Eliseo ket kinunana: “O Jehova, pangngaasim ta luktam dagiti matana, tapno makitana ti amin.”+ Dagus a linuktan ni Jehova dagiti mata ti katulongan ket nakitana a napno ti kabambantayan kadagiti kabalio ken karuahe a pakigubat a kasla apuy+ iti aglikmut ni Eliseo.+
18 Idi simmalog dagiti Siriano a napan ken Eliseo, inkararagna ken Jehova: “Pangngaasim, bulsekem daytoy a nasion.”+ Iti kasta, binulsekna ida maitunos iti kiddaw ni Eliseo.
19 Kinuna kadakuada ni Eliseo: “Saan a daytoy ti dalan, ket saan a daytoy ti siudad. Surotendak, ket iturongkayo iti lalaki a sapsapulenyo.” Ngem inturongna ida idiay Samaria.+
20 Idi nakadanonda idiay Samaria, kinuna ni Eliseo: “O Jehova, luktam dagiti mata dagitoy a tattao tapno makakitada.” Iti kasta, linuktan ni Jehova dagiti matada, ket nakitada nga addada iti tengnga ti Samaria.
21 Idi nakita ida ti ari ti Israel, kinunana ken Eliseo: “Papatayek kadi ida, apok?”*
22 Ngem kinunana: “Dika papatayen ida. Papatayem kadi iti espada ken panam dagiti tiniliwmo kas balud? Ikkam ida iti tinapay ken danum tapno makapangan ken makainumda+ sa agsublida iti apoda.”
23 Gapuna, insaganaanna ida iti adu a taraon, ket nangan ken imminumda, sa pinagawidna ida iti apoda. Sipud idin, saanen a nagsubli ti armada ti Siria+ iti daga ti Israel.
24 Kalpasanna, inummong ni Ben-hadad nga ari ti Siria ti intero nga armadana* ket pinalikmutanda ti Samaria.+
25 Nakaro idi ti bisin+ idiay Samaria, ket pinalikmutanda dayta agingga a nagbalin a 80 a pedaso a pirak ti presio ti ulo ti maysa nga asno,+ ken 5 a pedaso a pirak ti presio ti kakapat ti maysa a cab a sukat* ti lugit ti kalapati.
26 Bayat a magmagna ti ari ti Israel iti rabaw ti pader, adda babai a nangipukkaw kenkuana: “Tulongannakami, apo ari!”
27 Gapuna, kinuna ti ari: “No saannakayo a tulongan ni Jehova, pangalaak iti itulongko kadakayo? Iti pagirikan? Wenno iti pagpespesan iti ubas wenno lana?”
28 Insaludsod ti ari: “Ania ti problemam?” Insungbat ti babai: “Kinuna kaniak daytoy a babai, ‘Itedmo ti anakmo ta kanenta ita nga aldaw. Inton bigat, kanentanto met ti anakko.’+
29 Gapuna, linutomi ti anakko sa kinnanmi.+ Iti simmaganad nga aldaw kinunak, ‘Itedmo ti anakmo ta kanenta.’ Ngem inlemmengna ti anakna.”
30 Idi nangngeg ti ari ti kinuna ti babai, pinisangna dagiti badona.+ Bayat a magmagna iti rabaw ti pader, nakita dagiti tattao a nakersang a lupot ti makin-uneg a badona.
31 Kinuna ti ari: “Dusaennak koma ti Dios no diak ipapugot ni Eliseo nga anak ni Safat ita nga aldaw!”+
32 Nakatugaw ni Eliseo iti balayna a kadua dagiti panglakayen. Nangibaon ti ari iti mensahero nga umun-una kenkuana, ngem sakbay pay a makadanon ti lalaki, kinuna ni Eliseo kadagiti panglakayen: “Nangibaon daytoy nga anak ti mammapatay+ iti mangpugot kaniak. Siputanyo ta no umay ti mensahero, iserrayo ti ridaw sa iduronyo tapno saan a makastrek. Adda ti apona iti likudanna.”
33 Makisarsarita pay laeng kadakuada idi simmangpet ti mensahero, ket kinuna ti ari: “Naggapu ken Jehova daytoy a didigra. Apay nga urayek pay laeng ni Jehova?”
Footnotes
^ Wenno “Saan a namnaminsan wenno namnamindua.”
^ Lit., “ti puso ti ari.”
^ Wenno “agserserbi iti.”
^ Lit., “amak.”
^ Lit., “a kampona.”
