Ti Maikadua nga Ar-ari 7:1-20
7 Kinuna ni Eliseo, “Denggenyo ti sao ni Jehova. Daytoy ti imbaga ni Jehova: ‘Inton bigat iti agarup kastoy a tiempo iti ruangan* ti Samaria, maysa a siklo* ti presio ti maysa a sea a sukat* ti napino nga arina, ken maysa a siklo ti presio ti dua a sea a sukat ti sebada.’”+
2 Iti kasta, ti opisial* a pagtaltalkan ti ari kinunana iti adipen ti pudno a Dios: “Uray no luktan ni Jehova dagiti pagruaran ti danum iti langit, mapasamakto ngata dayta?”*+ Insungbatna: “Makitamto a mismo+ ngem saanmonto a maramanan.”+
3 Adda idi uppat nga agkukutel a lallaki iti pagserkan ti ruangan ti siudad,+ ket kinunada iti maysa ken maysa: “Apay nga agtugtugawtayo ditoy agingga a mataytayo?
4 No ibagatayo, ‘Sumrektayo iti siudad,’ bayat a nakaro ti bisin iti siudad,+ mataytayo sadiay. Ngem no agtugtugawtayo laeng ditoy, mataytayo latta. Mapantayo ngarud iti kampo dagiti Siriano. No saandatayo a patayen, agbiagtayo, ngem no patayendatayo, mataytayo.”
5 Iti kasta, napanda iti kampo dagiti Siriano iti rabii. Idi nakadanonda iti asideg ti kampo, awan ti tao a nakitada sadiay.
6 Ta impangngeg ni Jehova iti kampo dagiti Siriano ti danapeg dagiti karuahe ken kabalio a pakigubat, ti uni ti dakkel nga armada.+ Iti kasta, kinunada iti maysa ken maysa: “Tinangdanan ti ari ti Israel ti ar-ari dagiti Heteo ken ar-ari dagiti Egipcio nga umay mangraut kadatayo!”
7 Dagus a bimmangonda sa nagtatarayda iti kasipngetan ken pinanawanda dagiti tolda, kabalio, asno, ken ti intero a kampoda. Naglibasda tapno maispal ti biagda.*
8 Idi nakadanon dagitoy nga agkukutel iti ruar ti kampo, simrekda iti maysa a tolda ket nangan ken imminumda. Nangalada kadagiti pirak, balitok, ken bado sa napanda inlemmeng dagita. Nagsublida ket simrekda iti sabali pay a tolda ken nangalada iti bambanag sa napanda manen inlemmeng dagita.
9 Kamaudiananna, kinunada iti maysa ken maysa: “Saan nga umiso ti ar-aramidentayo. Adda naimbag a damag ita nga aldaw! No agulimek ken aguraytayo agingga nga aglawag, mabalin a madusatayto. Intay ipadamag daytoy iti sangakabbalayan ti ari.”
10 Gapuna, napanda ket impukkaw ken impadamagda kadagiti parabantay iti ruangan ti siudad: “Napankami iti kampo dagiti Siriano ket awan ti tao a nakitami sadiay—awan a pulos ti nangngegmi a timek. Dagiti laeng nakagalut a kabalio ken asno ken dagiti napanawan a tolda ti adda sadiay.”
11 Iti kasta, nagpukkaw dagiti parabantay iti ruangan ket naipadamag dayta iti uneg ti balay ti ari.
12 Dagus a bimmangon ti ari iti rabii ket kinunana kadagiti adipenna: “Ibagak kadakayo ti panggep nga aramiden dagiti Siriano. Ammoda a mabisintayo+ isu a pinanawanda ti kampoda ket naglemmengda iti away, ta kinunada, ‘Rummuardanto iti siudad ket tiliwentayo ida a sibibiag, sa sumrektayo iti siudad.’”+
13 Kinuna ti maysa kadagiti adipenna: “Pangngaasim ta mangpilika iti lallaki nga ibaonmo tapno kitaenda no ania ti agpayso a napasamak. Alaenda ti lima a nabati a kabalio iti siudad. No matayda, awan nakaidumaanna iti panagtalinaedda ditoy ta mataydanto met laeng a kas iti dadduma kadatayo nga Israelita.”
14 Iti kasta, nangalada iti dua a karuahe a guyoden dagiti kabalio ket imbaon ida ti ari iti kampo dagiti Siriano. Kinunana: “Inkay kitaen.”
15 Sinurotda dagita agingga idiay Jordan. Naiwarawara iti dalan dagiti bado ken alikamen nga imbelleng dagiti Siriano bayat nga agtatarayda gapu iti butengda. Nagsubli dagiti mensahero ket impadamagda dayta iti ari.
16 Iti kasta, rimmuar dagiti tattao ket nagalada iti bambanag iti kampo dagiti Siriano isu a maysa a siklo ti presio ti maysa a sea a sukat ti napino nga arina ken maysa a siklo ti presio ti dua a sea a sukat ti sebada, maitunos iti sao ni Jehova.+
17 Dinutokan idi ti ari ti opisial a pagtaltalkanna kas paraaywan ti ruangan, ngem pinayatpayatan dagiti tattao isu a natay iti ruangan, maitunos iti imbaga ti adipen ti pudno a Dios idi napan kenkuana ti ari.
18 Napasamak daytoy nga imbaga ti adipen ti pudno a Dios iti ari: “Inton bigat iti agarup kastoy a tiempo iti ruangan ti Samaria, maysa a siklo ti presio ti maysa a sea a sukat ti napino nga arina ken maysa a siklo ti presio ti dua a sea a sukat ti sebada.”+
19 Ngem kinuna ti opisial iti adipen ti pudno a Dios: “Uray no luktan ni Jehova dagiti pagruaran ti danum iti langit, mapasamakto ngata dayta?”* Insungbat ni Eliseo: “Makitamto a mismo ngem saanmonto a maramanan.”
20 Kasta ti eksakto a napasamak kenkuana ta pinayatpayatan dagiti tattao iti ruangan ti siudad isu a natay.
Footnotes
^ Wenno “kadagiti paglakuan.”
^ Lit., “daytoy a sao.”
^ Wenno “ayudante.”
^ Wenno “kararuada.”
^ Lit., “daytoy a sao.”
