Ti Maikadua nga Ar-ari 9:1-37
9 Nangayab ni propeta Eliseo iti maysa kadagiti annak dagiti propeta ket kinunana: “Agsaganaka,* alaem a dagus daytoy pagikkan iti lana ket mapanka idiay Ramot-gilead.+
2 Inton makadanonka sadiay, birokem ni Jehu+ nga anak ni Jehosafat nga anak ni Nimsi. Sumrekka ket ayabam sa mapankayo iti kaunegan a siled, nga adayo iti dadduma a pangulo.
3 Alaem ti pagikkan iti lana, bukbokam ti ulona ket ibagam, ‘Daytoy ti kinuna ni Jehova: “Dutokanka kas ari ti Israel.”’+ Kalpasanna, luktam ti ridaw sa pumanawka a dagus.”
4 Iti kasta, napan ti katulongan ti propeta idiay Ramot-gilead.
5 Nadanonanna a nakatugaw sadiay dagiti pangulo ti armada. Kinunana: “Adda mensahe para kenka, O pangulo.” Insaludsod ni Jehu: “Asino kadakami?” Insungbatna: “Sika, O pangulo.”
6 Gapuna, timmakder ni Jehu ket simrek iti balay. Imbukbok ti katulongan ti lana iti ulo ni Jehu sa imbagana, “Daytoy ti kinuna ni Jehova a Dios ti Israel: ‘Dutokanka kas ari ti Israel,+ ti ili ni Jehova.
7 Masapul a dadaelem ti sangakabbalayan ni Ahab nga apom tapno maibalesko ti dara dagiti adipenko a propeta ken ti amin nga adipen ni Jehova nga impapatay ni Jezebel.+
8 Mapukawto ti intero a sangakabbalayan ni Ahab; ken ibusekto ti tunggal lalaki* a kaputotanna, a pakairamanan dagiti awan pigsana ken nakapuy iti Israel.+
9 Pagbalinekto ti sangakabbalayan ni Ahab a kas iti sangakabbalayan ni Jeroboam+ nga anak ni Nebat ken kas iti sangakabbalayan ni Baasa+ nga anak ni Ahias.
10 No maipapan ken Jezebel, kanento dagiti aso iti maysa a disso iti Jezreel,+ ket awanto ti mangitabon kenkuana.’” Kalpasanna, linuktanna ti ridaw sa pimmanaw.+
11 Idi nagsubli ni Jehu iti ayan dagiti pangulo ti armada ti ari, insaludsodda kenkuana: “Ania ti napasamak? Apay nga immay kenka daydiay a mauyong a tao?” Insungbatna: “Ammoyo nga agmauyong daydiay a lalaki ken awan serserbi ti ibagbagana.”
12 Ngem kinunada: “Agul-ulbodka! Pangngaasim ta ibagam ti agpayso.” Iti kasta, insungbatna: “Daytoy ti imbagana kaniak, ken kinunana pay, ‘Daytoy ti kinuna ni Jehova: “Dutokanka kas ari ti Israel.”’”+
13 Gapuna, dagus nga inikkat ti tunggal maysa kadakuada ti kagayna sa inyaplagda kadagiti tukad ti agdan a pagbatbatayanna,+ ket pinuyotda ti tangguyob sa kinunada: “Nagbalinen nga ari ni Jehu!”+
14 Kalpasanna, nakikumplot ni Jehu+ nga anak ni Jehosafat nga anak ni Nimsi maibusor ken Jehoram.
Bambantayan idi ni Jehoram ti Ramot-gilead,+ a kaduana ti intero nga Israel, gapu ken Ari Hazael+ ti Siria.
15 Di nagbayag, nagsubli ni Ari Jehoram idiay Jezreel+ tapno agpaimbag kadagiti sugat a linak-amna kadagiti Siriano idi nakigubat ken Ari Hazael ti Siria.+
Kinuna ni Jehu: “No addakayo iti dasigko, awan ti palubosanyo a makaruar iti siudad tapno mapan agipadamag idiay Jezreel.”
16 Kalpasanna, naglugan ni Jehu iti karuahena ket napan idiay Jezreel ta adda sadiay ni Jehoram nga agid-idda gapu kadagiti sugatna. Bimmaba met ni Ari Ahazias ti Juda tapno kitaenna ni Jehoram.
17 Idi nakita ti parabantay iti rabaw ti torre ti Jezreel nga umas-asideg ti nakaad-adu a kakadua ni Jehu, dagus nga imbagana: “Adda sumungsungad a nakaad-adu a tattao.” Kinuna ni Jehoram: “Mangibaonka iti kumakabalio a mangsabat ken mangibaga kadakuada, ‘Kappia kadi ti immayam?’”
18 Iti kasta, simmabet ti kumakabalio ket kinunana: “Daytoy ti kinuna ti ari, ‘Kappia kadi ti immayam?’” Ngem insungbat ni Jehu: “Ania ti ammom maipapan iti ‘kappia’? Mapanka iti likudak ket surotennak!”
Impadamag ngarud ti parabantay: “Nakadanon kadakuada ti mensahero, ngem saan a nagsubli.”
19 Nangibaon manen iti kumakabalio a mangibaga kadakuada: “Daytoy ti kinuna ti ari, ‘Kappia kadi ti immayam?’” Ngem insungbat ni Jehu: “Ania ti ammom maipapan iti ‘kappia’? Mapanka iti likudak ket surotennak!”
20 Impadamag ngarud ti parabantay: “Nakadanon kadakuada ti mensahero, ngem saan a nagsubli. Ti panagpataray ti panguloda ket kas iti panagpataray ni Jehu nga apoko* ni Nimsi, ta naranggas* nga agpatpataray.”
21 Kinuna ni Jehoram: “Isaganayo ti karuahe!” Naisagana ngarud ti karuaheda a pakigubat ket nagsakay ni Ari Jehoram ti Israel ken ni Ari Ahazias+ ti Juda iti bukodda a karuahe tapno sabtenda ni Jehu. Nasabatda ni Jehu iti lote ni Nabot+ a Jezreelita.
22 Idi nakita ni Jehoram ni Jehu, kinunana: “Kappia kadi ti immayam, Jehu?” Insungbatna: “Kasano koma nga adda kappia ket makikamkamalala* ken agkulkulam ni Jezebel+ nga inam?”+
23 Dagus nga insanud ni Jehoram ti karuahena tapno aglibas, sa kinunana ken Ahazias: “Trinaidordata, Ahazias!”
24 Inasut ni Jehu ti panana ket pinuntaanna ti bukot ni Jehoram. Simmalput ti pana iti pusona, ket natumba iti karuahena a pakigubat.
25 Kinunana ken Bidkar nga opisialna: “Bagkatem ket ibellengmo iti talon ni Nabot a Jezreelita.+ Laglagipem nga agpada idi a nakasakayta iti karuahe iti likudan ni Ahab nga amana idi imbaga ni Jehova daytoy a pannusa kenkuana:+
26 ‘“Nakitak idi kalman ti dara ni Nabot+ ken dagiti annakna,” kinuna ni Jehova, “ikarik a balsenkanto+ iti daytoy a disso,” imbaga ni Jehova.’ Gapuna, bagkatem ket ibellengmo sadiay, maitunos iti sao ni Jehova.”+
27 Idi nakita ni Ari Ahazias+ ti Juda ti napasamak, naglibas nga agturong iti dakkel a hardin.* (Kalpasanna, kinamat ni Jehu ket kinunana: “Iramanyo a patayen!” Dinarupda ngarud iti karuahena bayat a sumangsang-at idiay Gur, iti abay ti Ibleam.+ Ngem intuloyna ti naglibas agingga a nakadanon idiay Megiddo ket sadiay a natay.
28 Kalpasanna, inlugan dagiti adipenna iti karuahe ket impanda idiay Jerusalem. Intabonda iti nakaitaneman dagidi ammana iti Siudad ni David.+
29 Nagbalin ni Ahazias+ nga ari ti Juda idi maika-11 a tawen ti panagturay ni Jehoram nga anak ni Ahab.)
30 Idi nadamag ni Jezebel+ nga agturong ni Jehu idiay Jezreel,+ inikkanna dagiti matana iti nangisit a kolorete ken inarkosanna ti ulona sa timman-aw iti tawa.
31 Idi simrek ni Jehu iti ruangan, kinuna ni Jezebel: “Ania ti nagbanagan ni Zimri a nangpapatay iti apona?”+
32 Timmangad ni Jehu iti tawa ket kinunana: “Asino ti dumasig kaniak? Asino?”+ Dagus a timman-aw kenkuana ti dua wenno tallo nga opisial ti palasio.
33 Kinunana: “Itinnagyo!” Iti kasta, intinnagda ni Jezebel. Nagparsiak ti dadduma a darana iti pader ken kadagiti kabalio ket pinayatpayatan dagiti kabalio.
34 Kalpasanna, simrek ni Jehu ket nangan ken imminum, sa kinunana: “Pangngaasiyo, asikasuenyo dayta a nailunod a babai ket itabonyo gapu ta anak ti ari.”+
35 Ngem idi mapanda itabonen, awan ti nasarakanda a bagina no di laeng ti bangabanga, saka, ken dagiti dakulapna.+
36 Idi nagsublida tapno ibagada dayta ken Jehu, kinunana: “Natungpal ti sao ni Jehova+ babaen ti adipenna a ni Elias a Tisbita, idi imbagana, ‘Kanento dagiti aso ti lasag ni Jezebel iti maysa a disso iti Jezreel.+
37 Agbalinto ti bangkay ni Jezebel kas ganagan iti maysa a disso iti Jezreel, tapno awanto ti mangibaga: “Daytoy ni Jezebel.”’”
Footnotes
^ Lit., “Bariksam dagiti lomom.”
^ Lit., “asinoman nga umis-isbo iti pader.” Pagsasao iti Hebreo a panglais kadagiti lallaki.
^ Lit., “anak.”
^ Wenno “kasla mauyong.”
^ Wenno “agdaydayaw iti idolo.”
^ Lit., “balay a hardin.”
