Maikadua Kadagiti Taga-Corinto 12:1-21
12 Masapul nga agpannakkelak. Saan a makagunggona daytoy, ngem ita, agsaoak maipapan kadagiti karkarna a sirmata+ ken mensahe* ti Apo.+
2 Adda ammok a tao a pasurot ni Kristo, a naipan iti maikatlo a langit 14 a tawenen ti napalabas—diak ammo no iti pisikal a bagi wenno saan; ngem ammo ti Dios.
3 Wen, adda ammok a kasta a tao—diak ammo no iti pisikal a bagi wenno saan; ngem ammo ti Dios—
4 a naipan iti paraiso ken nakangngeg iti sasao a saan a mayebkas ken saan a rumbeng a sawen ti tao.
5 Ipagpannakkelkonto ti kasta a tao, ngem saanko nga ipagpannakkel ti bagik malaksid iti kinakapuyko.
6 Ta uray no kayatko ti agpannakkel, saanakto nga agbalin a di nainkalintegan, ta ibagak ti pudno. Ngem diak aramiden dayta, tapno awan ti mangpadayaw kaniak iti nalablabes ngem iti makita wenno mangngegna kaniak,
7 gapu laeng ta immawatak kadagiti naisangsangayan a mensahe.
Tapno saanak a maidaydayaw iti kasta unay, naikkanak iti siit ti lasag,+ maysa nga anghel ni Satanas, nga agtultuloy a mangtungpa* kaniak tapno saanak a maidaydayaw iti kasta unay.
8 Namitlo a nagpakaasiak iti Apo a maikkat koma dayta kaniak.
9 Ngem imbagana kaniak: “Umdasen kenka ti nagpaiduma a kinaimbagko, ta naan-anay ti pannakabalinko kenka no nakapuyka.”+ Naragsakak ngarud a mangipannakkel iti kinakapuyko, tapno ti pannakabalin ti Kristo ket agtalinaed kaniak a kas tolda.
10 Gapuna, pagragsakak dagiti kinakapuy, pannakainsulto, panagkasapulan, pannakaidadanes ken pakarigatan, para ken Kristo. Ta nabilegak no nakapuyak.+
11 Nagbalinak a di nainkalintegan kadakayo gapu ta saanyo nga imbaga dagiti nasayaat a naaramidak. Uray no ibilangdak nga awan serserbina, saanak a nakapkapuy ngem kadagiti sobra ti laingna nga apostolyo maipapan iti aniaman a banag.+
12 Kinapudnona, nakitayo dagiti pagilasinan nga apostolak buyogen ti dakkel a panagibtur,+ agraman dagiti pagilasinan ken nakaskasdaaw a bambanag* ken milagro.+
13 Ta iti ania a banag a nababbabakayo ngem iti dadduma a kongregasion, malaksid iti saanko a panagbalin a dadagsen kadakayo?+ Pangngaasiyo ta pakawanendak iti daytoy a biddut.
14 Daytoy ti maikatlo a daras a nakasaganaak nga umay kadakayo, ket saanakto nga agbalin a dadagsen. Ta diak tarigagayan dagiti sanikuayo, no di ket tarigagayak a makitakayo;+ ta saan a manamnama nga agurnong dagiti annak+ para kadagiti nagannakda, no di ket dagiti nagannak ti agurnong para kadagiti annakda.
15 Naragsakakto a mangusar iti amin nga adda kaniak ken naan-anay nga agpausar para kadakayo.*+ No ay-ayatenkayo unay, saan kadi a kasta met koma ti panangayatyo kaniak?
16 Ngem uray no saankayo a pinadagsenan,+ ibagbagayo a “nasikapak” ken “inallilawkayo.”
17 Ginundawayankayo kadi babaen ti asinoman nga imbaonko kadakayo?
18 Binilinko ni Tito nga umay kadakayo ken nangibaonak iti kabsat a kaduana. Ginundawayannakayo kadi ni Tito?+ Saan a pulos. Saan kadi nga agpada ti motibomi? Ken saan kadi nga agpada ti inaramidmi?
19 Pampanunotenyo kadi agingga ita nga ikalkalinteganmi ti bagimi kadakayo? Agsasaokami iti sanguanan ti Dios kas pasurot ni Kristo. Patpatgenmi a kakabsat, kayatdakayo laeng a pabilgen.
20 Ta maamakak nga inton makasangpetak, amangan no saankayo nga agtigtignay a kas iti ninamnamak ken saanak nga agtigtignay a kas iti ninamnamayo, no di ket adda panagaapa, imon, nakaro a pungtot, di panagkikinnaawatan, panagpipinnadakes, tsismis, panagpannakkel, ken kinagulo.
21 Nalabit inton umayak manen, mabalin nga ibabainnakto ti Diosko iti sanguananyo, ken pagladingitak ti adu kadagiti nakabasol idi ngem saanda a nagbabawyan ti narugit nga aramid, seksual nga immoralidad,* ken nakaal-alas a kababalinda.*
