Maikadua Kadagiti Taga-Corinto 13:1-14
13 Daytoy ti maikatlo a daras nga umayak kadakayo. “Masapul a mapatalgedan ti tunggal banag iti testimonia* ti dua wenno tallo a testigo.”+
2 Nupay awanak ita, kasla addaak iti maikadua a daras, ket pakdaarak a nasaksakbay dagidiay nakabasol idi ken ti amin a dadduma pay, nga awan ti ipuerak no umayak manen,
3 ta sapsapulenyo ti pammaneknek no talaga nga agsasao babaen kaniak ni Kristo, a saan a nakapuy kadakayo no di ket napigsa iti tengngayo.
4 Ta pudno a nailansa iti kayo maigapu iti kinakapuy, ngem sibibiag maigapu iti pannakabalin ti Dios.+ Pudno, nakapuykami ita a kas kenkuana idi, ngem agbiagkaminto a makikadua kenkuana+ gapu iti pannakabalin ti Dios kadakayo.+
5 Itultuloyyo a suboken no agbibiagkayo maitunos iti pammati; itultuloyyo a paneknekan no aniakayo.+ Wenno dikay aya mabigbig a naikaykaysa kadakayo ni Jesu-Kristo? Malaksid no saannakay nga aprobaran ti Dios.
6 Namnamaek a mabigbigyonto nga inaprobarannakami ti Dios.
7 Ikararagmi iti Dios a dikay koma makaaramid iti aniaman a dakes, saan a tapno agparangkami a naaprobaran, no di ket tapno maaramidyo ti nasayaat, nupay mabalin nga agparangkami a saan a naaprobaran.
8 Ta awan ti maaramidmi maibusor iti kinapudno, no di ket para laeng iti kinapudno.
9 Agragsakkami la ketdi no nakapuykami ngem nabilegkayo. Ikarkararagmi nga ilintegyo ti pampanunotyo.
10 Dayta ti makagapu nga isuratko dagitoy bayat nga awanak, tapno inton addaak, saanto a nainget ti panangusarko iti autoridad nga inted ti Apo,+ tapno mangpabileg imbes a mangdadael.
11 Kamaudiananna, kakabsat, itultuloyyo ti agragsak, mailinteg, maliwliwa,+ agtutunos iti panunot,+ agbiag a sitatalna;+ ket addanto kadakayo ti Dios ti ayat ken ti talna.+
12 Agkikinnablaawkayo iti nasantuan nga agep.
13 Ipaw-it ti amin a nasantuan ti pakomustada kadakayo.
14 Maadda koma kadakayo amin ti nagpaiduma a kinaimbag ni Apo Jesu-Kristo ken ti ayat ti Dios ken ti bendision ti nasantuan nga espiritu.
Footnotes
^ Lit., “ngiwat.”
