Maikadua Kadagiti Taga-Corinto 3:1-18
3 Irekomendami kadi manen ti bagimi? Wenno kas iti dadduma a lallaki, kasapulan kadi nga ikkandakayo wenno ikkandakami kadagiti surat ti rekomendasion?
2 Dakayo a mismo ti suratmi,+ a naisurat iti pusomi ken ammo ken basbasaen ti amin a tao.
3 Ta maysakayo a surat ni Kristo nga insuratmi kas ministro,+ a naisurat saan nga iti tinta no di ket iti espiritu ti sibibiag a Dios, saan nga iti tapi a bato+ no di ket iti puso.+
4 Agtalekkami iti Dios babaen ti Kristo.
5 Saanmi nga ibagbaga a naan-anay a kualipikadokami a mangaramid iti daytoy a trabaho, no di ket nagtaud dayta iti Dios,+
6 a pudno a namagbalin kadakami a naan-anay a kualipikado kas ministro ti baro a tulag,+ saan a ti naisurat a Linteg,+ no di ket ti espiritu, ta ti naisurat a Linteg mangyeg iti ipapatay,+ ngem ti espiritu mangyeg iti biag.+
7 Ita, no ti Linteg a mangyeg iti ipapatay ken naisurat kadagiti bato+ ket naited nga addaan iti dakkel a dayag nga uray la saan a mamingmingan dagiti Israelita ti rupa ni Moises gapu iti dayag ti rupana,+ ti dayag a mapukaw,
8 saan kadi a dakdakkel a dayag+ ti iyeg ti espiritu?+
9 Ta no nadayag+ ti Linteg a mangkondenar,+ nadaydayag pay ti trabaho a mangyeg iti kinalinteg!+
10 Kinapudnona, naikkat ti dayag daydiay dati a nadayag gapu iti dayag a nanglab-aw iti dayta.+
11 Ta no daydiay mapukaw ket naiyeg nga addaan iti dayag,+ anian a dakdakkel ti dayag daydiay agtalinaed!+
12 Gapu ta addaantayo iti kasta a namnama,+ agsasaotayo a situtured,*
13 ken saantayo nga ar-aramiden ti inaramid ni Moises a nangabbong iti rupana+ tapno saan a kitaen ti annak ni Israel ti mapasamak iti banag a mapukaw.
14 Ngem saan a makaaw-awat ti isipda.+ Ta agingga ita, saan pay a naikkat ti isu met laeng nga abbong no maibasbasa ti daan a tulag,+ ta maikkat laeng dayta babaen ken Kristo.+
15 Kinapudnona, naabbongan ti pusoda+ agingga ita no maibasa dagiti insurat ni Moises.+
16 Ngem maikkat ti abbong no agbalbaliw ti maysa tapno agserbi ken Jehova.*+
17 Ita, ni Jehova* ti Espiritu,+ ket no sadino ti ayan ti espiritu ni Jehova,* adda wayawaya.+
18 Amintayo, a nangikkat iti abbong ti rupatayo, ket kasla kadagiti sarming a mangyanninaw iti dayag ni Jehova.* Nabalbaliwantayo iti ladawan ti Dios tapno ad-adda a mayanninawtayo ti dayagna,* kas iti eksakto nga inaramid ni Jehova,* ti Espiritu.*+
Footnotes
^ Wenno “siwayawaya.”
^ Lit., “manipud iti dayag nga agturong iti dayag.”
^ Wenno mabalin a, “ti espiritu ni Jehova.”
