Maikadua Kadagiti Taga-Corinto 5:1-21
5 Ta ammotayo a no marba* ti balaytayo ditoy daga, daytoy a tolda,+ ikkannatayto ti Dios iti balay nga agtalinaed iti agnanayon idiay langit, a saan nga inaramid dagiti ima.+
2 Ta iti daytoy a balay,* agasugtayo isu a tartarigagayantayo nga awaten ti balay* manipud langit* a mangabbong kadatayo a kas iti bado,+
3 tapno inton isuottayo dayta, saantayto a lamolamo.
4 Kinapudnona, datayo nga adda iti daytoy a tolda ket agas-asug ken madagdagsenan, ta saantayo a kayat nga uksoben dayta, ngem kayattayo nga isuot ti sabali,+ tapno ti biag alun-onenna ni patay.+
5 Ti nangisagana kadatayo iti daytoy ket ti Dios,+ a nangted kadatayo iti espiritu kas pammatalged iti banag nga umay.*+
6 Isu a masiguradotayo daytoy ken ammotayo a bayat nga agnanaedtayo iti daytoy a bagi, adayotayo iti Apo,+
7 ta magmagnatayo babaen ti pammati, saan a babaen ti panagkita.
8 Ngem saantayo nga agduadua ken kaykayattayo ti makipagnaed iti Apo imbes nga iti daytoy a bagi.+
9 Gapuna, makipagnaedtayo man iti Apo wenno adayotayo kenkuana, panggeptayo ti agbalin a makaay-ayo kenkuana.
10 Ta masapul a sumangotayo* amin iti pangukoman ti Kristo, tapno masupapakan ti tunggal maysa sigun kadagiti inaramidna, naimbag man wenno dakes,+ bayat nga agnanaed iti bagi.
11 Gapu ta ammomi ti kaipapanan ti panagbuteng iti Apo, itultuloymi a kombinsiren dagiti tattao, ngem am-ammonakami ti* Dios. Nupay kasta, mangnamnamaak nga am-ammonakami met ti* konsiensiayo.
12 Saanmi nga irekrekomenda manen ti bagimi kadakayo, no di ket ik-ikkandakayo iti rason a mangipannakkel kadakami, tapno masungbatanyo dagidiay mangipampannakkel iti langada+ ngem saan a ti adda iti pusoda.
13 Ta no agmauyongkami,+ maigapu dayta iti Dios; no nasimbeng ti panunotmi, maigapu dayta kadakayo.
14 Ta tignayennakami ti ayat ti Kristo, gapu ta daytoy ti konklusionmi, a natay ti maysa a tao para iti amin;+ gapu ta natay ti amin.
15 Ken natay ti Kristo para iti amin tapno dagidiay agbiag saanda koman nga agbiag para iti bagida,+ no di ket para kenkuana a natay maigapu kadakuada ken napagungar.
16 Isu a manipud ita, saanmin nga ukomen ti tao sigun iti makitami.+ Uray no matmatanmi idi ni Kristo sigun iti makitami, saanen a kasta ti panangmatmatmi.+
17 Iti kasta, no adda asinoman a naikaykaysa ken Kristo, isu ket baro a parsua;+ naglabasen ti daan a bambanag; ken addan ti baro a bambanag.
18 Ngem amin a banag ket aggapu iti Dios, a nangikappia kadakami iti bagina babaen ken Kristo+ ken nangted kadakami iti ministerio ti pannakikappia,+
19 kayatna a sawen, us-usaren ti Dios ni Kristo tapno maikappiana ti lubong iti bagina,+ a saannan nga isingir kadakuada dagiti basolda,+ ken intalekna kadakami ti mensahe ti pannakikappia.+
20 Gapuna, embahadorkami+ a suno ni Kristo,+ a kasla agpakpakaasi ti Dios babaen kadakami. Kas suno ni Kristo, ipakaasimi: “Makikappiakayo iti Dios.”
21 Daydiay awanan iti basol,+ napagbalin a basol* para kadatayo, tapno agbalintayo a nalinteg iti imatang ti Dios babaen kenkuana.+
Footnotes
^ Wenno “marunaw.”
^ Wenno “pagnaedan.”
^ Wenno “nga isuot ti pagnaedan.”
^ Wenno “ti nailangitan a pagnaedantayo.”
^ Wenno “pauna a bayad (deposito); garantia iti banag nga umay.”
^ Wenno “maiparangarangtayo.”
^ Wenno “a maiparangarangkami met iti.”
^ Wenno “maiparangarangkami iti.”
^ Wenno “daton gapu iti basol.”
