Maikadua Kadagiti Taga-Corinto 9:1-15
9 Maipapan iti panangtulong* kadagiti nasantuan,+ saanen a kasapulan nga agsuratak kadakayo,
2 ta ammok a situtulokkayo a tumulong, a dayta ti ipampannakkelko kadagiti taga-Macedonia, a makatawenen a nakasagana ti Acaya, ket ti kinaregtayo ti nakatignayan ti kaaduan kadakuada.
3 Ngem ibaonko dagiti kakabsat, tapno saan nga agbalin nga awan serserbina ti panangipannakkelmi kadakayo iti daytoy a banag, no di ket talaga a nakasaganakayo, kas iti imbagak idi.
4 Ta no saan, no kumuyog kaniak dagiti taga-Macedonia ket makitada a saankayo a nakasagana, agpapadatayo a maibabain gapu iti panagtalekmi kadakayo.
5 Gapuna, napanunotko a masapul a paregtaek dagiti kakabsat nga umay kadakayo a nasaksakbay tapno kolektaenda ti adu a donasion nga inkariyo, ket sipaparabur nga itedyo dayta, saan a mapilpilit.
6 Maipapan iti daytoy, ti agmula iti bassit agapitto iti bassit, ket ti agmula iti adu agapitto iti adu.+
7 Aramiden koma ti tunggal maysa ti inkeddeng ti pusona, a saan a nasakit ti nakemna* wenno mapilpilit,+ ta ay-ayaten ti Dios ti naragsak a mangted.+
8 Maysa pay, kabaelan ti Dios a paaduen ti nagpaiduma a kinaimbagna kadakayo tapno kanayon a kompleto ti kasapulanyo ken aduankayo iti banag a kasapulanyo para iti tunggal naimbag nga aramid.+
9 (Kas iti naisurat: “Adu ti winarasanna;* inikkanna dagiti napanglaw. Agtultuloy ti kinalintegna iti agnanayon.”+
10 Daydiay mangmangted iti adu a bin-i iti daydiay agmula ken iti tinapay a makan ket ipaayan ken paaduennanto ti bin-i nga imulayo ken paaduennanto met ti apitenyo a bunga ti kinalintegyo.)
11 Mapabpabaknangkayo iti amin a banag tapno sipaparabur a makaitedkayo, ket agyaman dagiti tattao iti Dios gapu iti sagutyo nga itedmi iti sabsabali;
12 ta daytoy a panagserbi iti publiko saanna laeng nga ipaay a siwawadwad ti kasapulan dagiti nasantuan+ no di ket tapno adu ti mangyebkas iti panagyamanda iti Dios.
13 Idaydayawda ti Dios ta ti impaayyo a tulong ket pammaneknek nga agtigtignaykayo maitunos iti naimbag a damag maipapan iti Kristo, nga iwarwaragawagyo iti publiko, ken gapu ta adu ti donasion nga intedyo kadakuada ken iti amin.+
14 Agpakaasida iti Dios para kadakayo ken ipakitada nga ay-ayatendakayo gapu iti nagpaiduma a kinaimbag ti Dios kadakayo.
15 Pagyamanan iti Dios gapu iti di mailadawan ken awan bayadna a sagutna.
Footnotes
^ Lit., “ministerio para.”
^ Wenno “saan nga agkedked.”
^ Wenno “Sipaparabur a nagiwaras.”
