Ti Maikadua a Cronicas 1:1-17
1 Bimmileg a bimmileg ti panagari ni Solomon nga anak ni David, ket adda kenkuana ni Jehova a Diosna ken pinagbalinna a nakatantan-ok.+
2 Pinaayaban ni Solomon ti intero nga Israel, dagiti panguluen ti rinibu ken ti ginasut, dagiti ukom, ken amin a panguluen ti intero nga Israel, dagiti ulo dagiti pamilia.
3 Kalpasanna, napan ni Solomon iti nangato a disso idiay Gibeon+ a kaduana ti amin nga umili, ta sadiay idi ti ayan ti tolda a pagkonsultaan iti pudno a Dios, ti tolda nga inaramid ni Moises nga adipen ni Jehova idiay let-ang.
4 Ngem innala ni David ti Lakasa ti pudno a Dios idiay Kiriat-jearim+ ket impanna iti disso nga insaganana, ta inyaramidanna dayta iti tolda idiay Jerusalem.+
5 Naikabil iti sanguanan ti tabernakulo ni Jehova ti altar a gambang+ nga inaramid ni Bezalel+ nga anak ni Uri nga anak ni Hur. Agkararag iti dayta* ni Solomon ken dagiti umili.
6 Sadiay a nagdaton ni Solomon iti sanguanan ni Jehova, ket nangipaay iti 1,000 a daton a mapuoran iti rabaw ti altar a gambang+ iti tolda a pagkonsultaan.
7 Nagparang ti Dios ken ni Solomon iti dayta a rabii ket kinunana: “Ibagam no ania ti kayatmo nga itedko kenka.”+
8 Insungbat ni Solomon iti Dios: “Impakitam ti dakkel a napudno nga ayatmo ken David+ nga amak, ket pinagbalinnak nga ari a sumaruno kenkuana.+
9 Ita, O Jehova a Dios, matungpal koma ti karim ken David nga amak,+ ta pinagbalinnak nga ari iti adu a tattao a kas iti kaadu ti tapok ti daga.+
10 Ikkannak iti sirib ken pannakaammo+ tapno maidauluak daytoy nga ili,* ta asino ti makabael a mangukom iti daytoy dakkel nga ilim?”+
11 Kinuna ti Dios ken ni Solomon: “Gapu ta daytoy ti tarigagayan ti pusom ken saanka a nagkiddaw iti gameng, kinabaknang, ken dayaw wenno ipapatay* dagiti manggurgura kenka, ken saanka met a nagkiddaw iti atiddog a biag,* no di ket nagkiddawka iti sirib ken pannakaammo tapno maukommo ti ilik a nangisaadak kenka kas ari,+
12 maited kenka ti sirib ken pannakaammo; ngem ikkankanto met iti gameng ken kinabaknang ken dayaw a saan pay a naited iti asinoman nga ari nga immun-una ken sumaruno kenka.”+
13 Gapuna, napan ni Solomon idiay Jerusalem manipud nangato a disso idiay Gibeon,+ iti sanguanan ti tolda a pagkonsultaan; ket nagturay iti Israel.
14 Nagurnong ni Solomon iti adu a karuahe ken kabalio.* Naaddaan iti 1,400 a karuahe ken 12,000 a kabalio,*+ ket inkabilna dagita kadagiti siudad a pagyanan dagiti karuahe+ nga asideg iti ari idiay Jerusalem.+
15 Pinagbalinna ti pirak ken balitok idiay Jerusalem a kas kaadu dagiti bato,+ ken ti kayo ti sedro a kas kaadu dagiti kayo a sikomoro idiay Sefela.+
16 Nagatang idiay Egipto dagiti kabalio ni Solomon,+ ket pinangen a gatangen dagita dagiti komersiante ti ari.*+
17 Ti presio ti tunggal karuahe a naangkat idiay Egipto ket 600 a pedaso a pirak, ken 150 ti presio ti maysa a kabalio; gimmatang met kadakuada ti amin nga ari dagiti Heteo ken Siriano.
Footnotes
^ Wenno “Agsaludsod sadiay iti Dios.”
^ Lit., “tapno makaruarak iti sanguanan daytoy nga ili ken tapno makastrekak.”
^ Wenno “kararua.”
^ Lit., “adu nga aldaw.”
^ Wenno “kumakabalio.”
^ Wenno “kumakabalio.”
^ Wenno mabalin a, “manipud Egipto ken Kue; gatangen dagita dagiti komersiante ti ari manipud Kue,” nalabit tumukoy iti Cilicia.
