Ti Maikadua a Cronicas 12:1-16
12 Idi bimmileg ken natibkeren ti panagturay ni Rehoboam,+ binaybay-anna ti Linteg ni Jehova.+ Kasta met ti inaramid ti intero nga Israel.
2 Iti maikalima a tawen ti panagturay ni Ari Rehoboam, bimmusor iti Jerusalem ni Ari Sisak+ ti Egipto, ta saanda a nagmatalek ken Jehova.
3 Naaddaan ni Sisak iti 1,200 a karuahe, 60,000 a kumakabalio, ken di mabilang a soldado a kimmadua kenkuana manipud Egipto—dagiti Libyano, Sukiim, ken Etiope.+
4 Nasakupna dagiti napaderan a siudad ti Juda, ket kamaudiananna, nakadanon idiay Jerusalem.
5 Napan ni propeta Semaias+ idiay Jerusalem iti ayan ni Rehoboam ken dagiti prinsipe ti Juda a naguummong maigapu ken Sisak, ket kinunana: “Daytoy ti kinuna ni Jehova, ‘Binaybay-andak isu a binaybay-ankayo met+ iti ima ni Sisak.’”
6 Gapuna, nagpakumbaba+ dagiti prinsipe ti Israel ken ti ari ket kinunada: “Nalinteg ni Jehova.”
7 Idi nakita ni Jehova a nagpakumbabada, kinuna ni Jehova ken ni Semaias: “Nagpakumbabada. Saankonto a dadaelen ida,+ ket ispalekto ida iti saanen a mabayag. Saankonto nga iyeg ti pungtotko iti Jerusalem babaen ken Sisak.
8 Ngem agbalindanto nga ad-adipenna, tapno maammuanda ti nagdumaan ti panagserbi kaniak ken ti panagserbi kadagiti ari* ti dadduma a pagilian.”
9 Gapuna, rimmaut ni Ari Sisak ti Egipto iti Jerusalem. Innalana dagiti gameng iti balay ni Jehova+ ken dagiti gameng iti balay* ti ari. Innalana amin, agraman dagiti kalasag a balitok nga inaramid ni Solomon.+
10 Gapuna, nangaramid ni Ari Rehoboam kadagiti kalasag a gambang a pangsukat kadagita, ket intalekna dagita kadagiti panguluen dagiti guardia,* a mangbambantay iti ruangan ti balay ti ari.
11 Tunggal sumrek ti ari iti balay ni Jehova, alaen dagiti guardia dagiti kalasag ket kaduaenda ti ari, sa isublida dagita iti pagpuestuan ti guardia.
12 Gapu ta nagpakumbaba ti ari, bimmaaw ti pungtot ni Jehova kenkuana,+ ket saanna a naan-anay a dinadael ida.+ Malaksid iti dayta, adda naimbag a bambanag a nasarakan idiay Juda.+
13 Pinabileg ni Ari Rehoboam ti saadna idiay Jerusalem ket nagtultuloy a nagturay. Agtawen ni Rehoboam iti 41 idi nagbalin nga ari, ket nagturay iti 17 a tawen idiay Jerusalem, ti siudad a pinili ni Jehova manipud iti amin a tribu ti Israel a pangikabilanna iti naganna. Ti nanang ti ari ket ni Naama nga Ammonita.+
14 Ngem dakes ti inaramidna, ta saan a naimpusuan ti panangsapulna ken Jehova.+
15 Ti pakasaritaan ni Rehoboam, manipud rugi agingga iti ngudona, ket naisurat iti sasao ni Semaias+ a propeta ken ni Iddo+ a managsirmata, maitunos iti listaan ti kapuonan. Kanayon a nagginnubat da Rehoboam ken Jeroboam.+
16 Naginana ni Rehoboam a kas kadagidi ammana ket naitabon iti Siudad ni David.+ Ni Abias+ nga anakna ti simmaruno nga ari.
