Ti Maikadua a Cronicas 15:1-19
-
Dagiti panagbalbaliw nga aramiden ni Asa (1-19)
15 Ita, nagtignay ti espiritu ti Dios ken ni Azarias nga anak ni Oded.
2 Iti kasta, sinabatna ni Asa ket kinunana: “Denggendak, O Asa ken ti intero a Juda ken Benjamin! Adda kadakayo ni Jehova bayat nga agtalinaedkayo kenkuana;+ ket ipalubosna a masarakanyo no birokenyo,+ ngem baybay-annakayo no baybay-anyo.+
3 Nabayagen* nga awanan ti Israel iti pudno a Dios, padi a mangisuro, ken linteg.+
4 Ngem nagsublida ken Jehova a Dios ti Israel idi marigatandan ket sinapulda, isu nga impalubosna a masarakanda.+
5 Kadagidi a tiempo, awan ti makabiahe a sitatalged,* ta nakaro ti riribuk iti nadumaduma a paset ti Israel.
6 Naglalaban dagiti nasion ken dagiti siudad, ta riniribuk ida ti Dios babaen ti nadumaduma a rigat.+
7 Ngem papigsaenyo ti pakinakemyo ken dikay maupay,*+ ta magunggonaanto ti aramidyo.”
8 Apaman a nangngeg ni Asa dagitoy ken ti padto ni propeta Oded, pimmigsa ti pakinakemna ket inikkatna dagiti makarimon nga idolo iti intero a Juda+ ken Benjamin ken kadagiti sinakupna a siudad iti kabambantayan ti Efraim, sa tinarimaanna ti altar ni Jehova nga adda iti sanguanan ti beranda ni Jehova.+
9 Inummongna ti intero a Juda ken Benjamin ken dagiti kakaduada a ganggannaet a residente manipud Efraim, Manases, ken Simeon,+ ta aduda a pimmanaw iti Israel idi nakitada nga adda kenkuana ni Jehova a Diosna.
10 Naguummongda ngarud idiay Jerusalem iti maikatlo a bulan ti maika-15 a tawen ti panagturay ni Asa.
11 Iti daydi nga aldaw, indatonda ken Jehova ti 700 a baka ken 7,000 a karnero manipud kadagiti naalada.
12 Nangaramidda pay iti tulag a birokenda ni Jehova a Dios dagidi ammada iti amin a puso ken amin a kararuada.*+
13 Mapapatay idi ti asinoman a saan a mangbirok ken Jehova a Dios ti Israel, nanumo man wenno natan-ok, lalaki wenno babai.+
14 Gapuna, nagsapatada ken Jehova iti napigsa a timek ken naragsak a panagpukkaw, ken pinuyotanda dagiti trumpeta ken tangguyob.
15 Nagragragsak ti intero a Juda gapu iti dayta a sapata, ta nagsapatada iti amin a pusoda ken sigagagar a sinapulda ti Dios ket impalubosna a masarakanda.+ Intultuloy nga impaayan ida ni Jehova iti naan-anay a talna.+
16 Inikkat pay ni Ari Asa ni apongna a Maaca+ kas reyna, ta nangaramid iti nakaal-alas nga idolo para iti panagdayaw iti sagrado a poste.*+ Pinukan ni Asa ti nakaal-alas nga idolo ket rinumek ken pinuoranna iti Tanap ti Kidron.+
17 Ngem saan a naikkat dagiti nangato a disso+ iti Israel.+ Nupay kasta, naan-anay ti puso* ni Asa iti intero a panagbiagna.*+
18 Inserrekna iti balay ti pudno a Dios dagiti banag a pinagbalinda ken amana a nasantuan—dagiti pirak, balitok, ken nagduduma nga alikamen.+
19 Awan ti napasamak a gubat agingga iti maika-35 a tawen ti panagturay ni Asa.+
Footnotes
^ Lit., “Ken adu nga aldaw.”
^ Lit., “awan ti talna daydiay rummuar wenno sumrek.”
^ Lit., “dikay bay-an nga agsalupaypay ti imayo.”
^ Wenno “naan-anay ti debosion.”
^ Lit., “amin nga aldawna.”