Ti Maikadua a Cronicas 17:1-19
17 Ni Jehosafat+ nga anakna ti simmaruno nga ari, ket pinabilegna ti panagturayna iti Israel.
2 Nangipuesto kadagiti soldado iti amin a napaderan a siudad ti Juda ken nangikabil kadagiti kampo ti armada iti Juda ken kadagiti siudad ti Efraim a sinakup ni Asa nga amana.+
3 Nagtultuloy ni Jehova nga adda ken Jehosafat ta tinuladna ni David+ nga apongna ken saan a nagserbi kadagiti Baal.
4 Ta ti Dios ni amana+ ti nagserbianna ken sinurotna* ti bilinna imbes a dagiti aramid ti Israel.+
5 Pinagtalinaed ni Jehova a natibker ti pagarian iti imana.+ Nangipapaay ti intero a Juda iti sagut ken Jehosafat, ket naaddaan iti adu a kinabaknang ken dakkel a dayag.+
6 Timmured a nangsurot kadagiti dalan ni Jehova, ket inikkatna pay idiay Juda dagiti nangato a disso+ ken dagiti sagrado a poste.*+
7 Iti maikatlo a tawen ti panagturayna, pinaayabanna dagiti prinsipena, da Ben-hail, Abdias, Zacarias, Netanel, ken Mikaias, tapno mangisuroda kadagiti siudad ti Juda.
8 Dagitoy ti Levita a kakaduada: da Semaias, Netanias, Zebadias, Asael, Semiramot, Jehonatan, Adonias, Tobia, ken Tob-adonias, agraman dagiti papadi a da Elisama ken Jehoram.+
9 Rinugianda ti nangisuro idiay Juda nga intugotda ti libro ti Linteg ni Jehova,+ ket sinursorda ti amin a siudad ti Juda tapno isuroda dagiti umili.
10 Nagbuteng ken Jehova ti amin a pagarian iti aglawlaw ti Juda, ket saanda a nakilaban ken Jehosafat.
11 Nangyeg dagiti Filisteo kadagiti sagut ken kuarta kas buis ken Jehosafat. Inikkan met dagiti Arabo iti 7,700 a kalakian a karnero ken 7,700 a kalakian a kalding.
12 Bimmileg a bimmileg ni Jehosafat,+ ket nagibangbangon kadagiti napaderan a lugar+ ken siudad a pagidulinan+ idiay Juda.
13 Adu a proyekto ti inaramidna kadagiti siudad ti Juda, ket addaan kadagiti soldado, nabibileg a mannakigubat, idiay Jerusalem.
14 Nagrupogrupo dagitoy sigun iti pamiliada: iti Juda, adda dagiti panguluen ti rinibu, ti umuna, ni Adnah a panguluen, ket kaduana ti 300,000 a nabileg a mannakigubat.+
15 Adda iti babaenna ni Jehohanan a panguluen, ket kaduana ti 280,000.
16 Adda met iti babaenna ni Amasias nga anak ni Zikri, a nagboluntario nga agserbi ken Jehova, ket kaduana ti 200,000 a nabileg a mannakigubat.
17 Iti Benjamin,+ ni Eliada, a nabileg a mannakigubat, ket kaduana ti 200,000 a lallaki nga addaan iti bai ken kalasag.+
18 Adda iti babaenna ni Jehozabad, ket kaduana ti 180,000 a soldado.
19 Agserserbi dagitoy iti ari malaksid pay kadagiti inkabil ti ari kadagiti napaderan a siudad iti intero a Juda.+