Ti Maikadua a Cronicas 18:1-34
18 Naaddaan ni Jehosafat iti adu a kinabaknang ken dakkel a dayag,+ ngem nakialiansa ken Ahab babaen ti panagasawa.+
2 Sumagmamano a tawen kalpasanna, napan ken Ahab idiay Samaria,+ ket nagidaton ni Ahab iti adu a karnero ken baka para kenkuana ken kadagiti umili a kakaduana. Inallukoyna ni* Jehosafat a makilaban iti Ramot-gilead.+
3 Kinuna ni Ari Ahab ti Israel ken Ari Jehosafat ti Juda: “Kumuyogkanto kadi kaniak idiay Ramot-gilead?” Insungbat ni Jehosafat: “Kumuyogak kenka agraman dagiti tattaok ket suportarandakanto iti gubat.”
4 Ngem kinuna ni Jehosafat iti ari ti Israel: “Pangngaasim ta agsaludsodka nga umuna no ania ti ibaga ni Jehova.”+
5 Iti kasta, inummong ti ari ti Israel dagiti propeta, 400 a lallaki, ket kinunana kadakuada: “Gubatenmi kadi ti Ramot-gilead wenno saan?” Insungbatda: “Mapanka, ket pagballigiennakanto ti pudno a Dios.”
6 Kinuna ni Jehosafat: “Awan kadi ditoy ti propeta ni Jehova?+ Agsaludsodtayo met koma kenkuana.”+
7 Insungbat ti ari ti Israel ken ni Jehosafat: “Adda pay maysa a lalaki+ a mabalin a pagsaludsodantayo no ania ti ibaga ni Jehova; ngem kagurgurak, ta awan a pulos ti naimbag nga ipadtona maipapan kaniak, no di ket kanayon a dakes+—ni Mikaias nga anak ni Imla.” Nupay kasta, kinuna ni Jehosafat: “Saan koma a kasta ti ibaga ti ari.”
8 Iti kasta, nangayab ti ari ti Israel iti maysa nga opisial ti palasio ket kinunana: “Darasem, iyegmo ditoy ni Mikaias nga anak ni Imla.”+
9 Nakatugaw idi ti ari ti Israel ken ni Jehosafat nga ari ti Juda iti tronoda a nakasuotda iti bado ti ari. Addada iti pagirikan idiay pagserkan ti ruangan ti Samaria. Agipadpadto iti sanguananda ti amin a propeta.
10 Nangaramid ni Zedekias nga anak ni Kenaana kadagiti sara a landok ket kinunana: “Daytoy ti kinuna ni Jehova, ‘Dagitoyto ti pangsangdom* kadagiti Siriano agingga a maibusmo ida.’”
11 Kasta met laeng ti ipadpadto ti dadduma pay a propeta, nga ibagbagada: “Mapanka idiay Ramot-gilead ket agballigikanto.+ Itedto dayta kenka ni Jehova.”
12 Inayaban ngarud ti mensahero ni Mikaias, ket kinunana: “Naimbag amin ti imbaga dagiti propeta iti ari. Pangngaasim ta naimbag met ti ibagam a kas kadakuada.”+
13 Ngem kinuna ni Mikaias: “Isapatak iti nagan ti sibibiag a Dios a ni Jehova, ibagakto no ania ti ibaga kaniak ti Diosko.”+
14 Napan iti ari ket insaludsod ti ari: “Mikaias, gubatenmi kadi ti Ramot-gilead wenno saan?” Dagus nga insungbatna: “Mapanka ket agballigika. Mayawatdanto iti imam.”
15 Kinuna kenkuana ti ari: “Mamin-ano a pagsapataenka a kinapudno laeng ti ibagam iti nagan ni Jehova?”
16 Gapuna, insungbatna: “Makitak ti amin nga Israelita a naiwarawara kadagiti bantay, kas kadagiti karnero nga awanan iti pastor.+ Kinuna ni Jehova: ‘Awanan dagitoy iti pangulo. Agsubli koma a sitatalna ti tunggal maysa iti balayna.’”
17 Kinuna ti ari ti Israel ken ni Jehosafat: “Saan aya nga imbagak kenka, ‘Awan a pulos ti naimbag nga ipadtona maipapan kaniak, dakes laeng’?”+
18 Iti kasta, kinuna ni Mikaias: “Denggem ngarud ti kuna ni Jehova: Nakitak ni Jehova a nakatugaw iti tronona+ ken ti intero nga armada ti langit+ nga agtaktakder iti kannawan ken kannigidna.+
19 Kinuna ni Jehova, ‘Asino ti mangallilaw ken Ari Ahab ti Israel, tapno mapan makigubat ket matay idiay Ramot-gilead?’ Simmungbat ti maysa nga anghel ket sabali met ti imbaga ti maysa pay nga anghel.
20 Immasideg ti maysa nga espiritu*+ ket nagtakder iti sanguanan ni Jehova sa kinunana, ‘Siak ti mangallilaw.’ Insaludsod ni Jehova, ‘Anianto ti aramidem?’
21 Insungbatna, ‘Mapanak ket mangikabilak iti kinaulbod iti dila ti amin a propetana.’ Iti kasta, kinuna ti Dios, ‘Sika ti mangallilaw, ket agballigikanto. Mapanka ket aramidem dayta.’
22 Gapuna, pinalubosan ni Jehova ti maysa nga anghel tapno pagsawenna iti ulbod dagitoy a propetam,+ ngem impakaammo ni Jehova a madidigrakanto.”
23 Immasideg ni Zedekias+ nga anak ni Kenaana ket tinungpana+ ni Mikaias+ sa kinunana: “Ibagbagam kadi a pimmanaw kaniak ti espiritu ni Jehova ket agsasaon kenka?”+
24 Insungbat ni Mikaias: “Makitamto dayta inton aldaw nga aglemmengka iti kaunegan a siled.”
25 Kinuna ti ari ti Israel: “Alaem ni Mikaias ket iyawatmo ken Amon a panguluen ti siudad ken ni Joas nga anak ti ari.
26 Ibagam kadakuada, ‘Daytoy ti kinuna ti ari: “Ibaludyo daytoy a tao+ ket bassit laeng ti itedyo kenkuana a tinapay ken danum agingga a makasubliak a sitatalged.”’”
27 Ngem kinuna ni Mikaias: “No makasublika a sitatalged, saan a nagsao kaniak ni Jehova.”+ Imbagana pay: “Laglagipenyo daytoy, dakayo amin.”
28 Nagturong ngarud idiay Ramot-gilead+ ti ari ti Israel ken ni Jehosafat nga ari ti Juda.
29 Kinuna ti ari ti Israel ken ni Jehosafat: “Agpammarangakto ken makigubatak, ngem isuotmo ti badom kas ari.” Iti kasta, nagpammarang ti ari ti Israel ket nakigubatda.
30 Imbilin ti ari ti Siria kadagiti komander dagiti karuahena: “Saankayo a makilaban iti asinoman, soldado wenno opisial, no di laeng iti ari ti Israel.”
31 Imbaga dagiti komander dagiti karuahe idi nakitada ni Jehosafat: “Isu ti ari ti Israel.” Iti kasta, dinarupda ni Jehosafat, ngem nagpatulong.+ Tinulongan ni Jehova, ket dagus nga inyadayona ida kenkuana.
32 Idi nabigbig dagiti komander dagiti karuahe a saan nga isu ti ari ti Israel, saandan a sinurot.
33 Ngem adda lalaki a nangipaspasarak a nangibiat iti panana, ket napuntaanna ti ari ti Israel iti nagsaipan ti kabalna. Iti kasta, kinuna ti ari iti kumakaruahena: “Agatrasta ket umadayota iti paggugubatan,* ta nakaro ti sugatko.”+
34 Nagmalmalem ti gubat, ket masapul a matulongan nga agtakder ti ari ti Israel iti karuahe, a nakasango kadagiti Siriano agingga iti rabii; ket natay idi lumneken ti init.+
