Ti Maikadua a Cronicas 24:1-27
24 Pito ti tawen ni Jehoas idi nagbalin nga ari,+ ket nagturay iti 40 a tawen idiay Jerusalem. Ti nanangna ket ni Zibia a taga-Beer-sheba.+
2 Inar-aramid ni Jehoas ti umiso iti imatang ni Jehova iti intero a panagbiag ni Jehoiada a padi.+
3 Nangpili ni Jehoiada iti dua nga asawa ni Jehoas, ket naaddaan iti annak a lallaki ken babbai.
4 Idi agangay, tinarigagayan ti puso ni Jehoas a tarimaanen ti balay ni Jehova.+
5 Iti kasta, inummongna dagiti papadi ken Levita ket kinunana: “Mapankayo kadagiti siudad ti Juda ket agkolektakayo iti kuarta iti intero nga Israel tapno tinawen a matarimaan ti balay ti Diosyo;+ ket agtignaykayo a dagus.” Ngem saan a nagtignay a dagus dagiti Levita.+
6 Gapuna, inayaban ti ari ni Jehoiada a pannakaulo ket kinunana:+ “Apay a dimo pinakolekta kadagiti Levita ti sagrado a buis iti Juda ken Jerusalem nga imbilin ni Moises+ nga adipen ni Jehova, ti sagrado a buis dagiti Israelita, para iti tolda ti Testimonia?+
7 Ta dagiti annak ni Atalia,+ dayta a dakes a babai, sinerrekda ti balay ti pudno a Dios,+ ket inusarda ti amin a nasantuan a banag iti balay ni Jehova para kadagiti Baal.”
8 Imbilin ti ari a mangaramidda iti kahon,+ ket inkabilda iti ruar iti ruangan ti balay ni Jehova.+
9 Iti kasta, naipakaammo iti intero a Juda ken Jerusalem nga itedda ken Jehova ti sagrado a buis+ nga imbilin ni Moises nga adipen ti pudno a Dios iti Israel idiay let-ang.
10 Nagraragsak ti amin a prinsipe ken amin nga umili,+ ket nangipapaayda iti kontribusion ken impisokda dagita iti kahon agingga a napunno.*
11 Kada ipan dagiti Levita ti kahon iti ari ken makitada nga adu ti nagyanna a kuarta, umay ti sekretario ti ari ken ti komisionado ti panguluen a padi ket ikkatenda ti nagyan ti kahon+ ken isublida dayta iti ayanna. Kasta ti inaldaw nga ar-aramidenda idi ket adu a kuarta ti naurnongda.
12 Kalpasanna, ited dayta ni Jehoiada ken ti ari kadagiti mangidadaulo iti panagtrabaho iti balay ni Jehova, ket tangdananda dagiti paratikap iti bato ken eksperto a trabahador tapno matarimaan ti balay ni Jehova,+ kasta met dagiti trabahador iti landok ken gambang a mangtarimaan iti balay ni Jehova.
13 Dagiti mangidadaulo impairugida ti trabaho, ket adu ti mailepleppas babaen ti panangiwanwanda. Insublida ti balay ti pudno a Dios iti dati a kasasaadna ken pinalagdada dayta.
14 Idi nalpasdan ti trabaho, impanda ti natedda a kuarta iti ari ken ni Jehoiada, ket inusarda a nangaramid kadagiti alikamen para iti balay ni Jehova, dagiti alikamen a mausar iti panagserbi ken panagidaton, agraman dagiti kopa ken alikamen a balitok ken pirak.+ Kanayon a nangipaayda kadagiti daton a mapuoran+ iti balay ni Jehova iti amin nga aldaw a panagbiag ni Jehoiada.
15 Natay ni Jehoiada idi lakayen ken napneken iti tawtawen; agtawen iti 130 idi natay.
16 Intabonda iti nakaitaneman dagiti ari iti Siudad ni David,+ ta naimbag ti inaramidna iti Israel+ para iti pudno a Dios ken iti balay ti Dios.
17 Kalpasan ti ipapatay ni Jehoiada, napan dagiti prinsipe ti Juda iti ari ken nagruknoyda kenkuana, ket dimngeg kadakuada ti ari.
18 Binaybay-anda ti balay ni Jehova a Dios dagidi ammada ket nagserbida kadagiti sagrado a poste* ken idolo, isu a nakapungtot* ti Dios iti Juda ken Jerusalem gapu iti basolda.
19 Nangibabaon kadagiti propeta a mamagsubli kadakuada ken Jehova, ken pinakpakdaaranda* ida, ngem saanda a dimngeg.+
20 Nagtignay* ti espiritu ti Dios ken ni Zacarias nga anak ni Jehoiada+ a padi, ket timmakder iti sanguanan dagiti umili sa kinunana: “Daytoy ti kinuna ti pudno a Dios, ‘Apay a suksukirenyo dagiti bilin ni Jehova? Saankayto nga agballigi! Gapu ta binaybay-anyo ni Jehova, baybay-annakayto met.’”+
21 Ngem nagkakaduada a bimmusor kenkuana+ ket inuborda iti paraangan ti balay ni Jehova, kas imbilin ti ari.+
22 Saan a linagip ni Ari Jehoas ti napudno nga ayat nga impakita kenkuana ni Jehoiada nga amana,* ket pinatayna ti anakna, a nangibaga idi matayen: “Balsennaka koma ni Jehova gapu kadagiti inaramidmo.”+
23 Iti rugi ti tawen,* bimmusor ti armada ti Siria ken ni Jehoas, ket rinautda ti Juda ken Jerusalem.+ Pinatayda ti amin a prinsipe+ dagiti umili, ken impatulodda iti ari ti Damasco ti amin nga innalada.
24 Uray no bassit ti rimmaut nga armada ti Siria, inyawat kadakuada ni Jehova ti nagdakkel nga armada,+ ta binaybay-an dagiti umili ti Juda ni Jehova a Dios dagidi ammada. Iti kasta, impakatda* ken Jehoas ti pannusa.
25 Idi pinanawanda ni Jehoas (ta pinanawanda a nakaro ti sugatna*), nagkukumplot maibusor kenkuana dagiti adipenna gapu iti dara dagiti annak* ni Jehoiada+ a padi. Pinatayda iti mismo a katrena.+ Iti kasta, natay ket intabonda iti Siudad ni David,+ ngem saanda nga intabon iti nakaitaneman dagiti ari.+
26 Dagitoy ti nagkakadua a bimmusor+ kenkuana: ni Zabad nga anak ni Simeat nga Ammonita a babai ken ni Jehozabad nga anak ni Simrit a Moabita a babai.
27 Ti maipapan kadagiti annakna ken iti pannusa a linak-amna+ ken iti pannakatarimaan* ti balay ti pudno a Dios+ ket nairekord kadagiti surat* iti Libro ti Ar-ari. Ni Amazias nga anakna ti simmaruno nga ari.
Footnotes
^ Wenno mabalin nga, “agingga a nakaitedda amin.”
^ Lit., “nga adda pungtot.”
^ Wenno “inal-allukoyda.”
^ Lit., “Naikawes.”
^ Kayatna a sawen, ti ama ni Zacarias.
^ Lit., “Iti panagbaliw ti tawen.”
^ Kayatna a sawen, dagiti Siriano.
^ Wenno “nga adu ti sakitna.”
^ Wenno “ti anak.” Ti pang-adu a porma mabalin nga ipamatmatna ti panagraem.
^ Lit., “pannakaibangon.”
^ Wenno “salaysay; komentario.”
