Ti Maikadua a Cronicas 35:1-27
35 Sinelebraran ni Josias ti Paskua+ para ken Jehova idiay Jerusalem, ket pinartida ti maidaton iti Paskua+ iti maika-14 nga aldaw ti umuna a bulan.+
2 Intudingna ti trabaho dagiti papadi ket pinaregtana nga aramidenda ti responsabilidadda iti balay ni Jehova.+
3 Kinunana kadagiti Levita, dagiti instruktor iti intero nga Israel,+ dagidiay nasantuan ken Jehova: “Ikabilyo ti nasantuan a Lakasa iti balay nga imbangon ni Solomon nga anak ni David nga ari ti Israel;+ saanyon nga ibaklay dayta.+ Agserbikayo ken Jehova a Diosyo ken iti ilina nga Israel.
4 Agsaganakayo sigun iti pamilia dagidi ammayo ken kadagiti grupoyo, a surotenyo ti insurat ni Ari David+ ti Israel ken ni Solomon nga anakna.+
5 Agtakderkayo a nagrupogrupo iti nasantuan a disso sigun iti pamilia dagiti kakabsatyo, ti dadduma pay nga umili;* adda koma grupo ti pamilia dagiti Levita iti tunggal maysa kadakuada.
6 Partienyo ti maidaton iti Paskua+ ken pagbalinenyo a nasantuan ti bagiyo ket isaganaanyo dagiti kakabsatyo tapno matungpalyo ti sao ni Jehova babaen ken Moises.”
7 Nangted ni Josias kadagiti kalakian a karnero ken kalakian a kalding kas daton iti Paskua para iti amin a tattao nga adda sadiay. Agdagup iti 30,000 dagiti maidaton, kasta met ti 3,000 a baka. Naggapu dagitoy iti sanikua ti ari.+
8 Nangted met dagiti prinsipena iti boluntario a daton para kadagiti umili, papadi, ken Levita. Da Hilkias,+ Zacarias, ken Jehiel, dagiti lider iti balay ti pudno a Dios, ket nangted kadagiti papadi iti 2,600 a maidaton iti Paskua ken 300 a baka.
9 Ni Conanias ken da Semaias ken Netanel a kakabsatna, agraman da Hasabias, Jeiel, ken Jozabad, dagiti panguluen dagiti Levita, nangtedda kadagiti Levita iti 5,000 a maidaton iti Paskua ken 500 a baka.
10 Idi nalpasen ti panagsagana, nagtakder dagiti papadi iti nairanta a pagpuestuanda kasta met dagiti Levita sigun iti grupoda,+ kas imbilin ti ari.
11 Pinartida dagiti maidaton iti Paskua+ sa intedda ti dara kadagiti papadi. Inwarsi dagiti papadi ti dara,+ bayat a lallalatan dagiti Levita dagiti animal.+
12 Kalpasanna, insaganada dagiti daton a mapuoran tapno iwarasda kadagiti tattao, a nagrupogrupo sigun iti pamilia dagidi ammada, tapno maidatonda dagita ken Jehova kas naisurat iti libro ni Moises. Kasta met ti inaramidda kadagiti baka.
13 Inlutoda* dagiti maidaton iti Paskua sigun iti kaugalian.+ Inlutoda dagiti nasantuan a daton kadagiti banga, siliasi, ken pariok, sa intedda a dagus dagita iti dadduma pay nga umili.
14 Kalpasanna, nagsaganada iti para kadakuada ken kadagiti papadi, ta agingga iti rabii a nagidatdatag dagiti papadi a kaputotan ni Aaron kadagiti daton a mapuoran ken taba, isu a nagsagana dagiti Levita iti para kadakuada ken kadagiti papadi a kaputotan ni Aaron.
15 Adda idi dagiti kumakanta, dagiti annak ni Asaf,+ iti nairanta nga ayanda maitunos iti bilin da David,+ Asaf,+ Heman, ken Jedutun+ a managsirmata ti ari; ket nagpuesto dagiti parabantay iti nadumaduma a ruangan.+ Saandan a kasapulan a panawan ti ayanda nga agserserbi, ta insaganaan ida dagiti kakabsatda a Levita.
16 Iti dayta nga aldaw, naisaganada ti amin nga impaaramid ni Jehova para iti pannakaselebrar ti Paskua+ ken pannakaipaay dagiti daton a mapuoran iti altar ni Jehova, sigun iti bilin ni Ari Josias.+
17 Dagiti Israelita nga adda sadiay sinelebraranda ti Paskua iti dayta a tiempo ken ti Piesta ti Tinapay nga Awan Lebadurana iti pito nga aldaw.+
18 Awan pay ti naangay a Paskua a kas iti daytoy idiay Israel manipud idi kaaldawan ni propeta Samuel; ken awanen ti sabali pay nga ari ti Israel a nangselebrar iti Paskua a kas iti panangselebrar ni Josias,+ dagiti papadi, dagiti Levita, ti amin nga umili ti Juda ken Israel nga adda sadiay, ken dagiti agnanaed iti Jerusalem.
19 Naselebraran dayta a Paskua iti maika-18 a tawen ti panagturay ni Josias.
20 Kalpasan amin daytoy, idi naisaganan ni Josias ti templo,* immay ni Ari Neco+ ti Egipto tapno makigubat idiay Carkemis iti igid ti Eufrates. Ngem rimmuar ni Josias tapno makilaban kenkuana.+
21 Nangibaon ni Neco kadagiti mensahero a mangibaga ken Josias: “Apay koma a makilabanak kenka, O ari ti Juda? Saanak nga umay makigubat kenka, no di ket iti sabali a nasion, ket imbaga ti Dios a masapul nga agdardarasak. Tapno saanka a madangran, saanmo a kontraen ti Dios, nga adda kaniak, amangan no dadaelennaka.”
22 Ngem saan nga inkankano ni Josias, no di ket nagpammarang+ ken nakilaban. Saan a dimngeg iti imbaga ni Neco a naggapu iti ngiwat ti Dios. Gapuna, napan nakigubat iti Tanap ti Megiddo.+
23 Napuntaan dagiti pumapana ni Ari Josias, ket kinuna ti ari kadagiti adipenna: “Ipanawdak ditoy, ta nakaro ti sugatko.”
24 Gapuna, indissaag dagiti adipenna iti karuahe ket inluganda iti maikadua a karuahena a pakigubat sa impanda idiay Jerusalem. Sadiay a natay ni Josias ken naitabon iti tanem dagidi ammana,+ ket nagladingit ti intero a Juda ken Jerusalem iti ipapatayna.
25 Dinung-awan ni Jeremias+ ni Josias, ket ikankanta ti amin a kumakanta+ a lallaki ken babbai ti dung-awda* maipapan ken Josias agingga ita nga aldaw. Nagbalin nga alagaden a makanta dagita iti Israel, ket naisurat dagita iti koleksion dagiti dung-aw.
26 Ti dadduma pay a pasamak iti pakasaritaan ni Josias ken dagiti inaramidna a mangipakita iti napudno nga ayatna, kas panagtulnogna iti naisurat iti Linteg ni Jehova,
27 ken ti inaramidna, manipud rugi agingga iti ngudona, ket naisurat iti Libro ti Ar-ari ti Israel ken ti Juda.+
Footnotes
^ Lit., “annak dagiti umili.”
^ Wenno mabalin nga, “Intunoda.”
^ Lit., “balay.”
^ Wenno “kanta ti panagladingitda.”
