Ti Maikadua a Cronicas 5:1-14
5 Gapuna, naileppas ni Solomon ti amin a trabaho a masapul nga aramidenna para iti balay ni Jehova.+ Iti kasta, inserrekna dagiti banag a pinagbalin a nasantuan ni amana a David.+ Inkabilna dagiti pirak, balitok, ken amin nga alikamen kadagiti pagidulinan iti gameng iti balay ti pudno a Dios.+
2 Iti dayta a tiempo, inummong ni Solomon dagiti panglakayen ti Israel—ti amin a pannakaulo dagiti tribu ken panguluen dagiti pamilia iti Israel. Napanda idiay Jerusalem tapno alaenda ti lakasa ti tulag ni Jehova manipud Siudad ni David,+ ti Sion.+
3 Naguummong ti amin a lallaki ti Israel iti sanguanan ti ari bayat ti piesta* a naangay iti maikapito a bulan.+
4 Napan ti amin a panglakayen ti Israel, ket inawit dagiti Levita ti Lakasa.+
5 Insang-at dagiti papadi ken Levita* ti Lakasa, ti tolda a pagkonsultaan,+ ken ti amin a nasantuan nga alikamen iti tolda.
6 Ni Ari Solomon ken ti amin nga Israelita a naayaban ket adda idi iti sanguanan ti Lakasa. Saan a mabilang ti kaadu ti naidaton a karnero ken baka.+
7 Impan dagiti papadi ti lakasa ti tulag ni Jehova iti lugarna, iti kaunegan a siled ti balay, iti Kasasantuan, iti sirok dagiti payak dagiti kerubin.+
8 Nakaukrad dagiti payak dagiti kerubin iti ngatuen ti Lakasa, ket malinonganda ti Lakasa ken dagiti assiwna.+
9 Nakaat-atiddog dagiti assiw nga uray la makita dagiti murdongda manipud iti Nasantuan iti sango ti kaunegan a siled, ngem saan a makita dagita iti ruar. Addada pay la sadiay agingga ita nga aldaw.
10 Awan ti sabali a linaon ti Lakasa no di ti dua a tapi nga inkabil iti dayta ni Moises idiay Horeb,+ idi nakitulag ni Jehova+ kadagiti Israelita kalpasan a rimmuarda idiay Egipto.+
11 Idi rimmuar dagiti papadi iti nasantuan a disso (ta amin a padi nga adda sadiay pinagbalinda ti bagida a nasantuan,+ aniaman ti grupoda),+
12 amin a Levita a kumakanta+ a karaman kadagiti grupo nga idadauluan da Asaf,+ Heman,+ ken Jedutun,+ ken dagiti annak ken kakabsatda a nakabado iti dekalidad a lupot, nakaiggem iti piangpiang, dekuerdas nga instrumento, ken arpa; nakatakderda iti daya ti altar, agraman ti 120 a papadi a mangpuypuyot iti trumpeta.+
13 Bayat a sangsangkamaysa nga idaydayaw ken agyamyaman ken Jehova dagiti paratrumpeta ken kumakanta, ken mangmangngeg ti uni dagiti trumpeta, piangpiang, ken dadduma pay nga instrumento bayat nga idaydayawda ni Jehova, “ta isu ket naimbag; agnanayon ti napudno nga ayatna,”+ napno iti ulep ti balay, ti balay ni Jehova.+
14 Saan a naituloy dagiti papadi ti trabahoda gapu iti ulep, ta napno iti dayag ni Jehova ti balay ti pudno a Dios.+
