Ti Maikadua a Cronicas 8:1-18
8 Naibangon ni Solomon ti balay ni Jehova ken ti balayna*+ iti 20 a tawen.
2 Kalpasan dayta, binangon manen ni Solomon dagiti siudad nga inted idi kenkuana ni Hiram+ ket pinagnaedna sadiay dagiti Israelita.*
3 Kasta met, rinaut ken sinakup ni Solomon ti Hamat-zoba.
4 Kalpasanna, tinarimaanna* ti Tadmor idiay let-ang ken amin a siudad a pagidulinan+ nga imbangonna idiay Hamat.+
5 Binangonna met ti Makinngato a Bet-horon+ ken ti Makimbaba a Bet-horon,+ dagiti siudad nga addaan kadagiti pader, ruangan, ken trangka,
6 ken ti Baalat+ kasta met ti amin a siudad a pagidulinan a kukua ni Solomon, amin a siudad a pagyanan dagiti karuahe+ ken kumakabalio, ken aniaman a kayat nga ibangon ni Solomon idiay Jerusalem, Lebanon, ken iti intero a daga a pagturayanna.
7 Amin a natda a Heteo, Amoreo, Perizeo, Heveo, ken Jebuseo,+ a saan a paset ti Israel,+
8 dagiti kaputotanda a nabati—dagidiay saan a naikisap dagiti Israelita+—ket pinagtrabaho ni Solomon agingga ita nga aldaw.+
9 Ngem awan ti Israelita a pinagbalin ni Solomon nga adipen ken trabahadorna,+ ta nagserbida kas soldado, opisial iti militar, ken panguluen dagiti kumakaruahe ken kumakabalio.+
10 Adda 250 a panguluen dagiti opisial ni Ari Solomon, isuda ti mangidadaulo kadagiti trabahador.+
11 Inyakar met ni Solomon ti anak a babai ni Faraon+ manipud iti Siudad ni David ket pinagnaedna iti balay nga imbangonna para kenkuana,+ ta kinunana: “Nupay asawak, saan a rumbeng nga agnaed iti balay ni Ari David ti Israel, ta nasantuan dagiti disso nga ayan ti Lakasa ni Jehova.”+
12 Kalpasanna, nangipaay ni Solomon ken ni Jehova kadagiti daton a mapuoran+ iti altar+ ni Jehova nga imbangonna iti sango ti beranda.+
13 Maitunos iti inaldaw a maar-aramid, nagidaton sigun iti bilin ni Moises para kadagiti Sabbath,+ baro a bulan,+ ken kadagiti naituding a piesta a mamitlo iti makatawen+—ti Piesta ti Tinapay nga Awan Lebadurana,+ ti Piesta Dagiti Lawas,+ ken ti Piesta ti Abong-abong.*+
14 Kasta met, inyurnosna ti panagserbi dagiti grupo ti papadi+ sigun iti pagannurotan ni David nga amana, ken ti trabaho dagiti Levita, tapno agdaydayaw+ ken agserbida iti sanguanan dagiti papadi sigun iti inaldaw a maar-aramid, ken dagiti grupo dagiti parabantay iti nadumaduma a ruangan,+ ta kasta ti imbilin ni David, ti adipen ti pudno a Dios.
15 Saanda a sinukir ti bilin ti ari kadagiti padi ken Levita mainaig iti aniaman a banag wenno mainaig kadagiti pagidulinan.
16 Gapuna, nakaor-organisado* ti trabaho ni Solomon, manipud iti aldaw a naisaad ti pundasion ti balay ni Jehova+ agingga a nalpas. Iti kasta, nakompleto ti balay ni Jehova.+
17 Iti daydi a tiempo a napan ni Solomon idiay Ezion-geber+ ken idiay Elot+ iti igid ti baybay iti daga ti Edom.+
18 Nangibabaon ni Hiram+ kadagiti barko ken kadagiti adipenna nga eksperto a marino. Nakikaduada kadagiti adipen ni Solomon a napan idiay Ofir+ ket nangalada sadiay iti 450 a talento* a balitok+ sa inyegda ken Ari Solomon.+
Footnotes
^ Wenno “palasiona.”
^ Lit., “annak ni Israel.”
^ Wenno “binangonna manen.”
^ Wenno “Kalapaw.”
^ Wenno “nakaur-urnos; nakompleto.”
