Ti Maikadua a Cronicas 9:1-31
9 Nadamag ti reyna ti Sheba+ ti kinalatak ni Solomon, isu a napan idiay Jerusalem tapno subokenna ni Solomon babaen kadagiti narigat a saludsod.* Adu ti kakaduana a napan, a pakairamanan dagiti kamelio a nangawit iti lana ti balsamo ken nakaad-adu a balitok+ ken napateg a batbato. Napan ken Solomon ket sinaludsodna ti amin a kayatna a maammuan.+
2 Sinungbatan ni Solomon ti amin a saludsod ti reyna. Awan ti banag a di nailawlawag* ni Solomon kenkuana.
3 Idi naammuan ti reyna ti Sheba ti kinasirib ni Solomon,+ ken nakitana ti balay a binangonna,+
4 ti taraon iti lamisaanna,+ ti kinaurnos ti tugaw dagiti opisialna, ti panagserbi dagiti serbidorna ken ti badoda, dagiti paraiggem iti kopana ken ti badoda, ken dagiti datonna a mapuoran a kanayon nga idatonna iti balay ni Jehova,+ napalalo ti siddaaw* ti reyna.
5 Gapuna, kinunana iti ari: “Agpayso ti nadamagko idiay lugarmi maipapan kadagiti naaramidam* ken iti kinasiribmo.
6 Ngem diak namati kadagita agingga nga immayak ket nakitak a mismo.+ Awan pay gayam iti kagudua ti napalalo a kinasiribmo+ ti naipadamag kaniak! Adayo a nasaysayaatka ngem iti nadamagko.+
7 Naragsak dagiti tattaom, ken naragsak dagiti adipenmo a kanayon a kaduam, a dumdumngeg iti kinasiribmo!
8 Maidaydayaw koma ni Jehova a Diosmo, a naragsakan kenka ken nangisaad kenka iti trono kas ari para ken Jehova a Diosmo. Gapu ta ay-ayaten ti Diosmo ti Israel,+ tapno mapagtalinaedna dayta iti agnanayon, dinutokannaka kas ari a mangipakat iti hustisia ken kinalinteg.”
9 Kalpasanna, inikkanna ti ari iti 120 a talento* a balitok+ ken nakaad-adu a lana ti balsamo ken napateg a batbato. Dayta a lana ti balsamo nga inted ti reyna ti Sheba ti kaaduan pay laeng a naited ken Ari Solomon.+
10 Kasta met, dagiti adipen ni Hiram ken dagiti adipen ni Solomon a nangyeg iti balitok manipud Ofir+ nangyegda met kadagiti kayo ti algum ken napateg a batbato.+
11 Inusar ni Solomon dagiti kayo ti algum a pagaramid iti agdan iti balay ni Jehova+ ken iti balay* ti ari,+ ken kadagiti arpa ken dekuerdas nga instrumento nga usaren dagiti kumakanta.+ Awanen ti nakita a kasta ti kaaduna a kayo ti algum idiay Juda.
12 Inted met ni Ari Solomon iti reyna ti Sheba ti aniaman a kayatna ken kiniddawna, nga ad-adu ngem iti* intedna iti ari. Kalpasanna, nagawiden a kaduana dagiti adipenna.+
13 Ti kadagsen ti balitok a naited ken Solomon iti maysa a tawen ket katupag ti 666 a talento a balitok,+
14 malaksid pay iti inted dagiti komersiante ken negosiante ken dagiti balitok ken pirak nga inted ti amin nga ari dagiti Arabo ken dagiti gobernador ti daga ken ni Solomon.+
15 Nangaramid ni Ari Solomon iti 200 a dadakkel a kalasag a balitok a nalaokan iti sabali a metal+ (600 a siklo* a nalaokan a balitok ti nausar iti tunggal kalasag)+
16 ken 300 a sarapa* a balitok a nalaokan iti sabali a metal (tallo a mina* a balitok ti nausar iti tunggal kalasag). Kalpasanna, inkabilna dagita iti Balay iti Bakir ti Lebanon.+
17 Nangaramid met ti ari iti dakkel a trono a marfil ket kinalupkopanna iti puro a balitok.+
18 Innem ti tukad ti agdan nga umuli iti trono. Adda pagbatayan a balitok a naikapet iti trono, ken adda pagiparabawan iti ima iti agsumbangir a sikigan ti pagtugawan. Adda dua a sinanleon+ a sitatakder iti abay ti pagiparabawan iti ima.
19 Adda met 12 a sinanleon+ a sitatakder iti innem a tukad, saggaysa iti agsumbangir nga ungto ti tunggal tukad. Awanen ti sabali pay a pagarian a nakaaramid iti aniaman a kapada dayta.
20 Amin a paginuman ni Ari Solomon ket naaramid iti balitok, ken amin nga alikamen iti Balay iti Bakir ti Lebanon ket naaramid iti puro a balitok. Awan ti naaramid iti pirak, ta maibilang nga awan patpateg ti pirak idi tiempo ni Solomon.+
21 Ta mapan idiay Tarsis+ dagiti barko ti ari agraman dagiti adipen ni Hiram.+ Maminsan iti kada tallo a tawen, agsangpet dagiti barko ti Tarsis a nagkarga iti balitok ken pirak, marfil,+ bakes, ken paboreal.
22 Gapuna, nabakbaknang ken nasirsirib ni Ari Solomon ngem iti asinoman nga ari iti daga.+
23 Tartarigagayan ti amin nga ari iti daga ti mapan ken* Solomon tapno dumngeg iti sirib nga inkabil ti pudno a Dios iti pusona.+
24 Mangyeg ti tunggal maysa kadakuada iti sagut—alikamen a pirak ken balitok, badbado,+ kabal, lana ti balsamo, kabalio, ken mulo—ket tinawen a kasta ti maar-aramid.
25 Ken addaan ni Solomon iti 4,000 a kuadra para kadagiti kabalio ken karuahena ken 12,000 a kabalio,*+ ket inkabilna dagita kadagiti siudad a pagyanan dagiti karuahe nga asideg iti ari idiay Jerusalem.+
26 Inturayanna ti amin nga ari manipud iti Karayan* agingga iti daga dagiti Filisteo ken iti pagpatinggaan ti Egipto.+
27 Pinagbalinna ti pirak idiay Jerusalem a kas kaadu dagiti bato, ken ti kayo ti sedro a kas kaadu dagiti kayo a sikomoro idiay Sefela.+
28 Nangtedda ken Solomon kadagiti kabalio manipud Egipto+ ken iti dadduma pay a pagilian.
29 Ti dadduma pay a pasamak iti pakasaritaan ni Solomon,+ manipud rugi agingga iti ngudona, ket nairaman kadagiti surat ni Natan+ a propeta, iti padto ni Ahias+ a taga-Shilo, ken iti nakaisuratan dagiti sirmata ni Iddo+ a managsirmata maipapan ken Jeroboam+ nga anak ni Nebat.
30 Nagturay ni Solomon iti intero nga Israel iti 40 a tawen idiay Jerusalem.
31 Naginana ni Solomon a kas kadagidi ammana. Iti kasta, intabonda iti Siudad ni David nga amana,+ ket ni Rehoboam nga anakna ti simmaruno nga ari.+
Footnotes
^ Wenno “burburtia.”
^ Lit., “nga inlemmeng.”
^ Lit., “awan ti nabati nga espiritu.”
^ Wenno “sasaom.”
^ Wenno “palasio.”
^ Wenno mabalin a, “malaksid kadagiti sagut a katupag ti gatad ti.”
^ Bassit a kalasag a masansan nga awiten dagiti pumapana.
^ Lit., “a sapulen ti rupa ni.”
^ Wenno “kumakabalio.”
^ Kayatna a sawen, ti Eufrates.
