Ti Maikadua a Samuel 12:1-31
12 Imbaon ni Jehova ni Natan+ a mapan ken David. Napan ni Natan ken David+ ket kinunana: “Adda dua a lallaki iti maysa a siudad. Nabaknang ti maysa ken napanglaw ti sabali.
2 Nakaad-adu ti karnero ken baka ti nabaknang;+
3 ngem awan ti kukua ti napanglaw no di laeng ti maysa a bassit a kabaian nga urbon a karnero a ginatangna.+ Tinarakenna dayta, ken dimmakkel a kaduana ken dagiti annakna a lallaki. Uray bassit ti taraonna, pinakpakanna ken pinainumna iti bukodna a kopa, ken saklotenna no maturog. Imbilangna a kasla anakna a babai.
4 Naminsan, adda immay a bisita ti nabaknang, ngem saan a kadagiti mismo a karnero ken bakana ti nangalaanna iti impasidana iti biahero a bisitana. Innalana ketdi ti urbon a karnero ti napanglaw ket pinartina para iti bisitana.”+
5 Nakapungtot unay ni David iti nabaknang, ket kinunana ken Natan: “Isapatak iti nagan ti sibibiag a Dios a ni Jehova,+ rumbeng a mapapatay dayta a tao!
6 Masapul a suktanna iti uppat ti innalana nga urbon a karnero+ gapu iti dayta nga inaramidna. Saan man la a naasian.”
7 Kinuna ni Natan ken David: “Sika dayta a tao! Daytoy ti kinuna ni Jehova a Dios ti Israel: ‘Siak a mismo ti nangdutok kenka kas ari ti Israel,+ ket insalakanka iti ima ni Saul.+
8 Situtulok nga intedko kenka ti balay ti apom+ ken dagiti assawana,+ ken intedko kenka ti balay ti Israel ken ti Juda.+ No saan koma nga umdas dayta, situtulokak a mangted iti ad-adu pay ngem iti dayta.+
9 Apay a sinukirmo ti sao ni Jehova? Apay nga inaramidmo ti dakes iti imatangna? Pinataymo ni Urias a Heteo!+ Pinataymo iti espada dagiti Ammonita,+ sa innalam ti asawana tapno agbalin nga asawam.+
10 Ita, gapu ta sinukirnak ken innalam ti asawa ni Urias a Heteo tapno agbalin nga asawam, kanayonto a madidigra ti balaymo iti espada.’+
11 Daytoy ti kinuna ni Jehova: ‘Didigraek ti mismo a balaymo;+ ket makitamto a mismo ti panangalak kadagiti assawam ken panangtedko kadakuada iti sabali a tao,*+ ket kaiddaennanto ida iti tengnga ti aldaw.*+
12 Nupay inaramidmo dayta iti nalimed,+ aramidek daytoy iti imatang ti intero nga Israel ken iti tengnga ti aldaw.’”*
13 Kinuna ni David ken Natan: “Nakabasolak ken Jehova.”+ Kinuna ni Natan ken David: “Ngem pakawanen ni Jehova ti basolmo.*+ Saanka a matay.+
14 Nupay kasta, gapu ta saanmo a pulos rinaem ni Jehova iti daytoy a banag, sigurado a matayto ti kaipaspasngay nga anakmo.”
15 Kalpasanna, nagawiden ni Natan.
Ket pinagsakit ni Jehova ti ubing a putot ni David iti asawa ni Urias.
16 Impakpakaasi ni David iti pudno a Dios nga umimbag koma ti ubing. Nagayunar ni David, ken iti rabii, agidda iti suelo ti kuartona.+
17 Isu a napan kenkuana dagiti panglakayen iti palasiona ket pinadasda a bangonen ngem dina kinayat. Saanna met a kayat ti makipangan kadakuada.
18 Iti maikapito nga aldaw, natay ti ubing. Ngem mabuteng dagiti adipen ni David a mangibaga kenkuana a natayen ti ubing. Kinunada: “Idi sibibiag pay ti ubing, saanna a dengdenggen ti ibagbagatayo no kasaritatayo. Kasanotayo nga ibaga a natayen ti ubing? Amangan no adda dakes nga aramidenna.”
19 Idi nakita ni David nga agiinnarasaas dagiti adipenna, naawatanna a natayen ti ubing. Kinuna ni David kadagiti adipenna: “Natay kadin ti ubing?” Insungbatda: “Wen, natayen.”
20 Bimmangon ni David. Nagdigus, sinapsapuanna ti bagina iti lana,+ sinukatanna ti badona, ken napan nagruknoy iti balay+ ni Jehova. Kalpasanna, nagawiden iti palasiona ket nagpaidasar iti makan, ket nangan.
21 Dinamag dagiti adipenna: “Apay a kasta ti inaramidmo? Idi sibibiag pay ti ubing, nagayunarka ken nagsangsangitka. Ngem idi natayen ti ubing, bimmangonka ket nanganka.”
22 Insungbatna: “Idi sibibiag pay ti ubing, nagayunarak+ ken nagsangsangitak, ta kinunak iti un-unegko, ‘Bareng no kaasiannak ni Jehova ken saan a matay ti anakko.’+
23 Ita ta natayen, apay koma nga agayunarak pay? Kabaelak kadi a pasublien ti biagna?+ Addanto aldaw a makikaduaak kenkuana idiay tanem,+ ngem saanen nga agsubli kaniak.”+
24 Liniwliwa ni David ni Bat-sheba+ nga asawana. Napan kenkuana ket dinennaanna. Idi agangay, nangipasngay ni Bat-sheba iti anak a lalaki a pinanaganan ni David iti Solomon.*+ Inayat ni Jehova ti ubing,+
25 ket impaibagana ken propeta Natan+ a panagananna iti Jedidias,* maigapu ken Jehova.
26 Intultuloy ni Joab ti nakigubat iti Rabba+ a kukua dagiti Ammonita,+ ket naparmekna ti naarian a siudad.*+
27 Isu a nangibaon ni Joab kadagiti mapan mangibaga ken David: “Nakigubatak iti Rabba,+ ket naparmekko ti siudad ti dandanum.*
28 Ummongem ngarud dagiti nabati a soldado ket agkampoda iti siudad tapno maparmekda dayta. Ta no saan, siak ti mangparmek iti dayta, ket siak ti maidaydayaw.”*
29 Isu nga inummong ni David ti amin a soldadona ket napanda idiay Rabba. Sinerrekda dayta ket naparmekda.
30 Kalpasanna, innala ni David ti korona iti ulo ni Malcam. Maysa a talento* a balitok ti kadagsen ti korona, agraman ti agkakapateg a batbatona, ket naikabil dayta iti ulo ni David. Innalana met ti nakaad-adu a kinabaknang+ iti dayta a siudad.+
31 Innalana met dagiti umili sadiay ket pinagbalinna ida a pararagadi iti batbato, paraaramid iti ladrilio, ken trabahador nga agusar kadagiti natadem a remienta a landok ken wasay a landok. Kasta ti inaramidna iti amin a siudad dagiti Ammonita. Kalpasanna, nagsubli ni David ken ti amin a soldadona idiay Jerusalem.
Footnotes
^ Wenno “padam a tao.”
^ Lit., “kadagiti mata daytoy nga init.”
^ Lit., “iti imatang ti init.”
^ Wenno “palabsenna ti basolmo.”
^ Nagtaud iti Hebreo a sao a kaipapananna, “Talna.”
^ Kaipapananna, “Dungdungnguen ni Jah.”
^ Wenno “siudad ti pagarian.”
^ Mabalin a tumukoy kadagiti paggapgapuan ti danum iti siudad.
^ Lit., “mayawag iti dayta ti naganko.”
