Ti Maikadua a Samuel 15:1-37
15 Kalpasan amin dagitoy, nagpaaramid ni Absalom iti karuahe sa nangala kadagiti kabalio ken 50 a lallaki nga agtaray iti sanguananna.+
2 Masapa a bumangon ni Absalom ket agtakder iti igid ti dalan nga agturong iti ruangan ti siudad.+ No adda asinoman nga addaan iti kaso a kayatna nga ipausig iti ari,+ ayaban ni Absalom ken damagenna: “Tagaanoka?” ket no ibagana: “Naggapu daytoy adipenmo iti maysa kadagiti tribu ti Israel.”
3 Ibaga no kua ni Absalom: “Makitak nga umiso ti ilablabanmo, ngem awan ti inyurnos ti ari a mangasikaso iti kasom.”
4 Ibaga pay ni Absalom: “No naisaadak la koma a hues iti daga! Siguraduek a makagun-od iti hustisia ti amin nga umay kaniak nga addaan iti kaso wenno problema.”
5 No umasideg ti tao tapno agruknoy kenkuana, arakupen ken agkan ni Absalom.+
6 Kasta ti inar-aramid ni Absalom iti amin nga Israelita nga addaan iti problema a kayatda nga ipasolbar iti ari; ket intultuloy ni Absalom nga inagaw ti puso dagiti tattao iti Israel.+
7 Kalpasan ti uppat a tawen,* kiniddaw ni Absalom iti ari: “Pangngaasim ta palubosannak a mapan idiay Hebron+ tapno tungpalek ti inkarik ken Jehova.
8 Ta inkari daytoy adipenmo+ idi agnanaedak idiay Gesur+ iti Siria: ‘No isublinak ni Jehova iti Jerusalem, agdatonakto* ken Jehova.’”
9 Isu a kinuna ti ari: “Inkan, agan-annadka.” Isu a nagsagana ket napan idiay Hebron.
10 Nangibaon ni Absalom kadagiti espia a mapan iti amin a tribu ti Israel. Ibagbagana: “Apaman a mangngegyo ti uni ti tangguyob, iwaragawagyo, ‘Nagbalinen ni Absalom nga ari idiay Hebron!’”+
11 Adda 200 a lallaki a taga-Jerusalem a napan iti ayan ni Absalom; inawisna ida ngem awan a pulos ti ammoda maipapan iti mapaspasamak.
12 Bayat nga agidatdaton ni Absalom, pinaayabanna ti mamalbalakad*+ ni David a ni Ahitofel+ a Gilonita nga adda idiay siudadna a Gilo.+ Pumigpigsa ti kumplot ken umad-adu ti mangsupsuporta ken Absalom.+
13 Idi agangay, adda nangipadamag ken David: “Ni Absalom ti dasdasiganen dagiti tattao iti Israel.”
14 Imbaga a dagus ni David iti amin nga adipenna a kaduana idiay Jerusalem: “Agsaganakayo ta pumanawtayon,+ ta agpeggadtayo no ditay itarayan ni Absalom! Darasenyo, amangan no makamakamnatayo ket agaramid iti pakadidigraantayo ken patayennatayo!”+
15 Kinuna dagiti adipen ti ari: “Aniaman ti desision ti apo ari, nakasaganakami a mangaramid iti dayta.”+
16 Isu a pimmanaw ti ari ken ti intero a sangakabbalayanna, ngem imbatina ti 10 a sabali pay nga assawana+ a mangaywan iti palasio.*
17 Nagtalaw ti ari agraman ti amin a simmurot kenkuana, ket nagsardengda idiay Bet-merak.
18 Pinalpaliiw ti ari ti kasasaad ti amin nga adipenna a kimmuyog kenkuana* ken amin a Kereteo, Peleteo,+ ken ti 600 a lallaki a Gitita,+ a kimmuyog kenkuana manipud idiay Gat,+ bayat a palpaliiwen ti ari ti kasasaadda.*
19 Imbaga ti ari ken Ittai+ a Gitita: “Apay a simmurotka kadakami? Agsublika ket makipagyanka iti baro nga ari; ta maysaka a ganggannaet, ken napagtalawka iti pagilianyo.
20 Sangsangpetmo idi kalman. Masapul kadi nga agalla-allaka a kas kadakami idinto ta diak pay ketdi ammo no sadino ti papanak? Agsublika ket ikuyogmo dagiti kakabsatmo, ken sapay koma ta ipakita kenka ni Jehova ti napudno nga ayat ken kinamatalekna!”+
21 Ngem insungbat ni Ittai iti ari: “Isapatak iti nagan ti sibibiag a Dios a ni Jehova, ken bayat a sibibiagka, apo ari, sumurot kenka daytoy adipenmo iti sadinoman a papanam, uray pay no pakatayak!”+
22 Kinuna ngarud ni David ken Ittai:+ “Intay ngaruden.” Isu a bimmallasiw ni Ittai a Gitita, agraman ti amin a tattao ken dagiti pamiliada.
23 Nagsangsangit iti napigsa ti amin nga umili ti Jerusalem bayat a magmagnada, ket palpaliiwen ida ti ari iti abay ti Tanap ti Kidron.+ Amin a tattao ket magmagna iti dalan nga agturong iti let-ang.
24 Simmurot met kadakuada ni Zadok+ agraman ti amin a Levita+ a mangaw-awit iti lakasa+ ti tulag ti pudno a Dios.+ Indissoda ti lakasa ti pudno a Dios agingga a nakaruar ti amin a tattao iti siudad; adda met sadiay ni Abiatar.+
25 Ngem kinuna ti ari ken Zadok: “Isublim ti Lakasa ti pudno a Dios iti siudad.+ No maragsakan kaniak ni Jehova, ipalubosnanto a makasubliak tapno makitak dayta ken ti disso nga ayanna.+
26 Ngem no ibagana, ‘Diak maragsakan kenka,’ aramidenna ngarud kaniak ti aniaman a nasayaat iti imatangna.”
27 Kinuna ti ari ken Zadok a padi: “Saan aya a maysaka a pumaparmata?+ Agan-annadkayo ken Abiatar nga agsubli iti siudad, ket ikuyogmo ti anakmo a ni Ahimaaz ken ni Jonatan+ nga anak ni Abiatar.
28 Agyanak pay laeng iti asideg ti let-ang ket urayek ti ipadamagyo kaniak.”+
29 Isu a binagkat da Zadok ken Abiatar ti Lakasa ti pudno a Dios ken insublida idiay Jerusalem, ket nagyanda pay laeng sadiay.
30 Agsangsangit ni David bayat a sumangsang-at iti Bantay Dagiti Olibo;+ adda abbong ti ulona ken magmagna a sakasaka. Inabbongan met ti amin a tattao ti uloda ken agsangsangitda bayat a sumangsang-atda.
31 Naipadamag ken David: “Makikumkumplot+ metten ni Ahitofel ken Absalom.”+ Isu a kinuna ni David: “O Jehova, pagbalinem ti balakad* ni Ahitofel a kas balakad ti maag!”+
32 Idi makadanon ni David iti tapaw a pagdaydayawan idi dagiti tattao iti Dios, simmabat kenkuana ni Husai+ nga Arkita,+ a napisang ti badona ken adda rugit iti ulona.
33 Ngem kinuna ni David kenkuana: “Awan ti maitulongmo kaniak no sumurotka kaniak.
34 Ngem no agsublika iti siudad ket ibagam ken Absalom, ‘Agserbiak kenka, O Ari. Nagserbiak idi ken amam ngem agserbiak itan kenka,’+ madadaelmonto ngarud ti balakad ni Ahitofel ket matulongannak.+
35 Saan aya a kaduam idiay ti papadi a da Zadok ken Abiatar? Masapul nga ibagam iti papadi a da Zadok ken Abiatar ti amin a mangngegmo iti palasio ti ari.+
36 Kaduada idiay ti dua nga annakda a da Ahimaaz+ nga anak ni Zadok ken ni Jonatan+ nga anak ni Abiatar, ket isudanto ti ibaonyo a mangipakaammo kaniak iti amin a mangngegyo.”
37 Napan ngarud ni Husai a gayyem* ni David+ iti siudad bayat a sumsumrek ni Absalom idiay Jerusalem.
Footnotes
^ Wenno mabalin nga, “40 a tawen.”
^ Wenno “agdaydayawakto.” Lit., “agserbiakto.”
^ Wenno “mammagbaga.”
^ Wenno “balay.”
^ Wenno “kaduana a bimmallasiw.”
^ Wenno “bumalballasiwda iti sanguanan ti ari.”
^ Wenno “pammagbaga.”
^ Wenno “pagtaltalkan.”
