Maikadua a Surat ken Timoteo 2:1-26
2 Gapuna, anakko,+ itultuloymo ti dumawat iti bileg babaen ti nagpaiduma a kinaimbag nga adda ken Kristo Jesus;
2 ken ti bambanag a nangngegmo kaniak a patalgedan ti adu a testigo,+ isurom dagitoy a banag kadagiti matalek a lallaki, nga agbalinto met a kualipikado a mangisuro iti sabsabali.
3 Kas pudno a soldado+ ni Kristo Jesus, makipagsagabaka iti rigat.+
4 Awan ti soldado a makiraman* iti negosio* bayat nga adda iti serbisio, tapno maay-ayona daydiay nangiserrek kenkuana kas soldado.
5 Uray kadagiti paay-ayam, saan a makoronaan ti asinoman a makikompetensia no saanna a suroten dagiti pagannurotan.+
6 Ti nagaget a mannalon ti umuna a mangan iti bunga ti talonna.
7 Kanayonmo koma a panunoten ti ibagbagak; ikkannakanto ti Apo iti pannakaawat* iti amin a banag.
8 Laglagipem a napagungar+ ni Jesu-Kristo ken maysa a kaputotan* ni David,+ sigun iti naimbag a damag nga ikaskasabak,+
9 a dayta ti makagapu nga agsagsagabaak ken naibaludak a kas kriminal.+ Ngem saan a nagalutan ti sao ti Dios.+
10 Gapu iti daytoy, itultuloyko nga ibturan ti amin a banag maigapu kadagiti napili,+ tapno maisalakanda met babaen ken Kristo Jesus, ken maipaayanda iti agnanayon a dayag.
11 Mapagtalkan daytoy a sasao: No nataytayo a kaduana, agbiagtayto met a kaduana;+
12 no itultuloytayo ti agibtur, agturaytayto met a kaduana kas ari;+ no ilibaktayo, ilibaknatayto met;+
13 no saantayo a matalek, agtultuloy latta a matalek ti Dios, ta saanna a mabalin nga ilibak ti bagina.
14 Itultuloymo nga ipalagip kadakuada dagitoy a banag, nga isurom ida* iti sanguanan ti Dios a saanda a pagaapaan dagiti sasao, nga awan a pulos serbina ta makaperdi* dayta kadagiti dumdumngeg.
15 Aramidem ti amin a kabaelam a mangiparang iti bagim iti Dios kas naaprobaran, maysa a trabahador nga awan ti aniaman nga ibainna, nga usarem a siuumiso ti sao ti kinapudno.+
16 Ngem laksidem dagiti awan serserbina a sasao a maikontra iti nasantuan,+ ta agresulta dagita iti nakarkaro pay a kinadakes,
17 ken agwarasto ti saoda a kas iti gangrena. Karaman kadakuada da Himeneo ken Fileto.+
18 Simmina iti kinapudno dagitoy a lallaki, nga ibagbagada a napasamaken ti panagungar,+ ket daddadaelenda ti pammati ti dadduma.
19 Nupay kasta, agtalinaed a sitatakder ti natibker a pundasion ti Dios, a namarkaan iti, “Ammo ni Jehova* dagidiay kukuana,”+ ken, “Tumallikud koma iti kinakillo ti asinoman nga umaw-awag iti nagan ni Jehova.”*+
20 Kas ammoyo, saan laeng a balitok ken pirak dagiti alikamen* iti dakkel a balay no di ket kayo ken damili pay, ket maus-usar ti dadduma iti nadayaw a pamay-an ngem ti dadduma iti nakababain a pamay-an.
21 Asinoman ngarud nga umadayo kadagiti alikamen a maus-usar iti nakababain a pamay-an, agbalinto nga alikamen* a nadayaw ti pakausaranna, nasantuan, adu ti usarna iti makinkukua kenkuana, nakasagana iti tunggal naimbag nga aramid.
22 Gapuna, adaywam ti tarigagay dagiti agtutubo, ket ikagumaam nga ipakita ti kinalinteg, pammati, ayat, talna, a kadua dagidiay umaw-awag iti Apo a nadalus ti pusoda.
23 Laksidem met dagiti minamaag ken awan serserbina a panagdedebate,+ ta ammom nga agresulta dagita iti panagaapa.
24 Ta saan a kasapulan a makiapa ti adipen ti Apo, no di ket masapul a naalumamay* iti amin,+ kualipikado a mangisuro, nga agteppel no adda mangaramid iti dakes kenkuana,+
25 a siaalumamay nga isurona dagidiay bumusbusor.+ Bareng no palubosan ida ti Dios nga agbabawi* tapno maaddaanda iti umiso a pannakaammo iti kinapudno,+
26 ket agsubli ti nasimbeng a panunotda ken makalapsutda iti silo ti Diablo, ta natiliwna ida a sibibiag a mangaramid iti pagayatanna.+
Footnotes
^ Lit., “maigalut.”
^ Wenno mabalin nga, “iti inaldaw nga aktibidad.”
^ Wenno “pannakatarus.”
^ Lit., “bin-i.”
^ Lit., “a naan-anay nga ilawlawagmo kadakuada.”
^ Wenno “makadadael; mangbalintuag.”
^ Wenno “pagkargaan.”
^ Wenno “a pagkargaan.”
^ Wenno “nataktika.”
^ Wenno “a mangbaliw iti panunotda.”
