Maikadua a Surat ken Timoteo 3:1-17
3 Ngem ammuem daytoy nga iti maudi nga al-aldaw,+ dumtengto dagiti delikado ken narigat a tiempo.
2 Ta ay-ayatento laeng dagiti tattao ti bagbagida, managayat iti kuarta, napangas, natangsit, agsasao maibusor iti Dios ken iti tao, nasukir kadagiti nagannak, saan a managyaman, saan a matalek,
3 awanan iti ayat iti padada a tao, saanda a kayat ti makitulag, manangpadakes, awanan panagteppel, nauyong, kagurada ti kinaimbag,
4 traidor, natangken ti uloda, napannakkel, ayatenda ti ragragsak imbes a ti Dios,
5 a kasla relihiosoda ngem saanda nga agbibiag a kasta.+ Saanka a makilangen iti kasta a tattao.
6 Agtaud kadakuada dagiti lallaki a sisisikap a sumrek kadagiti sangakabbalayan tapno allilawenda dagiti nakapuy a babbai nga adu ti basolna, a tumultulok iti nadumaduma a tarigagayda,
7 a kanayon nga agsursuroda ngem pulos a saanda a matarusan ti umiso a pannakaammo iti kinapudno.
8 Kas iti panangbusor da Jannes ken Jambres ken ni Moises, busbusoren met dagitoy a lallaki ti kinapudno. Nakadakdakes ti panunotda, ken saanda a maikari no maipapan iti pammati.
9 Nupay kasta, saandanto a maitultuloy ti aramidda, ta nalawagto iti amin ti kinamaagda, a kas kadagidiay dua a lallaki.+
10 Ngem sinurotmo a naimbag ti pannursurok, ti panagbiagko,+ ti panggepko, ti pammatik, ti kinaanusko, ti ayatko, ti panagibturko,
11 ken ammom dagiti pannakaidadanes ken panagsagaba a kas iti napadasak idiay Antioquia,+ Iconio,+ ken Listra.+ Ngem inibturak amin dagitoy a pannakaidadanes, ket insalakannak ti Apo.+
12 Kinapudnona, maidadanesto met ti amin nga agtarigagay nga agbiag maitunos iti debosionda iti Dios kas adalan ni Kristo Jesus.+
13 Ngem ad-addanto pay a dumakes dagiti dakes ken impostor a tattao, a mangallilawda ken maallilawda.+
14 Nupay kasta, itultuloymo a suroten ti bambanag a nasursurom ken nakakombinsiram a patien,+ ta ammom no siasino ti nakasursuruam kadagita
15 ken naammuam ti nasantuan a sursurat+ manipud idi maladagaka,+ a namagbalin kenka a masirib para iti pannakaisalakanmo babaen ti pammati ken Kristo Jesus.+
16 Inwanwan ti Dios* ti pannakaisurat ti intero a Kasuratan+ ken makagunggona dayta iti panangisuro,+ panangtubngar, panangilinteg* iti bambanag, ken panangdisiplina para iti kinalinteg,+
17 tapno agbalin a naan-anay a kualipikado ti adipen ti Dios, a naan-anay a nakasagana para iti tunggal naimbag nga aramid.
