Amos 2:1-16
2 “Daytoy ti imbaga ni Jehova,‘“Gapu iti tallo a panagrebelde* ti Moab,+ ken gapu iti uppat, diakto ibabawi dayta,Ta pinuoranna dagiti tulang ti ari ti Edom tapno agbalin nga apug.
2 Isu a mangyegakto iti apuy iti Moab,Ket dayta ti manguram kadagiti natibker a torre ti Keriot;+Matayto ti Moab bayat ti panagpupukkaw,Panagiikkis dagiti aggugubat, ken panaguni ti tangguyob.+
3 Ikkatekto ti mangiturturay* kenkuanaKen patayekto met ti amin a prinsipena,”+ kuna ni Jehova.’
4 Daytoy ti imbaga ni Jehova,‘Gapu iti tallo a panagrebelde ti Juda,+ ken gapu iti uppat, diakto ibabawi dayta,Ta inlaksidda ti linteg* ni Jehova,Ken saanda a sinurot dagiti regulasionna;+Ngem nayaw-awanda kadagiti kinaulbod a sinurot dagidi ammada.+
5 Isu a mangyegakto iti apuy iti Juda,Ket dayta ti manguram kadagiti natibker a torre ti Jerusalem.’+
6 Daytoy ti imbaga ni Jehova,‘Gapu iti tallo a panagrebelde ti Israel,+ ken gapu iti uppat, diakto ibabawi dayta,Ta gapu iti pirak, ilakoda dagiti nalinteg,Ken gapu iti sangaparis a sandalias, ilakoda dagiti napanglaw.+
7 Ibaddebaddekda dagiti kakaasi a tattao iti katapokan,+Ken saan nga umiso ti panangtratoda kadagiti naemma.+
Maymaysa a babai ti kadenna ti lalaki ken ti amana,Isu nga ibabainda ti nasantuan a naganko.
8 Iyaplagda iti kada altar+ dagiti lupot nga innalada kas garantia nga agbayad* dagiti immutang kadakuada;+Ken dagiti nasingirda a multa ket inggatangda iti arak nga inumenda iti balay* dagiti diosda.’
9 ‘Ngem siak ti nangpapatay kadagiti Amoreo iti sanguananda,+A kas kadagiti kayo a sedro ti katayagda ken kas kadagiti kayo a roble ti kinatibkerda;Dinadaelko ti nangato a bungana ken dagiti ramutna.+
10 Inruarkayo iti Egipto,+Ken 40 a tawen a pinapagnakayo iti let-ang,+Tapno matagikuayo ti daga dagiti Amoreo.
11 Dinutokak ti dadduma nga annakyo a lallaki kas propeta+Ken ti dadduma nga agtutuboyo a lallaki kas Nazareo.+
Saan kadi a kasta a talaga ti inaramidko, O tattao ti Israel?’ kuna ni Jehova.
12 ‘Ngem intultuloyyo a pinainum dagiti Nazareo iti arak,+Ken imbilinyo kadagiti propeta: “Dikay agipadto.”+
13 Isu a rumekenkayto iti lugaryo,Kas iti kareson a napno iti kagapgapas a mangrumek iti madalananna.
14 Awanto ti pagkamangan ti nasiglat,+Kumapsutto ti napigsa,Ken awanto ti soldado a makaisalakan iti biagna.*
15 Matumbanto ti pumapana,Saanto a makalibas ti napartak a tumaray,Ken saanto a maisalakan ti kumakabalio ti biagna.*
16 Uray ti katuturedan* a soldadoKet agtalawto a nakaussob iti dayta nga aldaw,’+ kuna ni Jehova.”
Footnotes
^ Wenno “krimen.”
^ Lit., “ukom.”
^ Wenno “instruksion.”
^ Wenno “templo.”
^ Wenno “kas pammatalged.”
^ Wenno “kararuana.”
^ Wenno “kararuana.”
^ Wenno “dagidiay nabileg ti pakinakemda.”
