Amos 7:1-17
7 Daytoy ti impakita kaniak ti Kangatuan* nga Apo Jehova: Kitaem! Nangibaon iti nagadu a dudon idi rugrugi ti maudi a panagmumula.* Dayta ti maudi a panagmumula idi nagapasen dagiti ruot ti ari.
2 Idi naibusen dagiti dudon ti amin a mula iti daga, imbagak: “O Kangatuan nga Apo Jehova, pangngaasim ta mangpakawanka!+ Kasano a makalasat* ni Jacob? Ta nakapuy isuna!”+
3 Isu a pinanunot manen* dayta ni Jehova.+ “Saanto a mapasamak dayta,” kinuna ni Jehova.
4 Daytoy ti impakita kaniak ti Kangatuan nga Apo Jehova: Kitaem! Ti Kangatuan nga Apo Jehova ket nangyeg iti apuy a pangdusa. Pinuoranna ti baybay agingga a nagmaga ken pinuoranna ti dadduma a paset ti daga.
5 Isu nga imbagak: “O Kangatuan nga Apo Jehova, pangngaasim ta dimo ituloy.+ Kasano a makalasat* ni Jacob? Ta nakapuy isuna!”+
6 Isu a pinanunot manen* dayta ni Jehova.+ “Saanto met a mapasamak dayta,” kinuna ti Kangatuan nga Apo Jehova.
7 Daytoy ti impakitana kaniak: Kitaem! Nakatakder ni Jehova iti pader ken adda ig-iggamanna a tinnag a nausar iti pannakaaramid ti pader.
8 Kinuna ni Jehova: “Ania ti makitkitam, Amos?” Insungbatko: “Maysa a tinnag.” Imbaga ngarud ni Jehova: “Mangikabilak iti tinnag iti ilik nga Israel. Saankonto idan a pakawanen.+
9 Malangalangto dagiti nangato a disso ni Isaac,+ ken mabaybay-anto dagiti pagdaydayawan ti Israel.+ Patayekto met ti sangakabbalayan ni Jeroboam iti espada.”+
10 Impaibaga ni Amazias a padi ti Bethel+ daytoy a mensahe ken Ari Jeroboam+ ti Israel: “Makikumkumplot ni Amos maikontra kenka idiay Israel.+ Saan a maanusan dagiti umili ti amin nga imbagana.+
11 Ta daytoy ti imbaga ni Amos, ‘Matayto ni Jeroboam iti espada, ket sigurado a maipanawto ti Israel iti dagana.’”+
12 Imbaga ngarud ni Amazias ken Amos: “O managsirmata, agtarayka a mapan idiay Juda, sadiay nga agbirokka iti pagbiagmo* ken idiayka nga agipadto.+
13 Ngem saankan nga agipadto iti Bethel,+ ta dayta ti santuario ti ari+ ken ti balay ti pagarian.”
14 Kalpasanna, sinungbatan ni Amos ni Amazias: “Saanak a propeta wenno anak ti propeta; no di ket maysaak nga agpaspastor+ ken agay-aywan kadagiti kayo a higos a sikomoro.*
15 Ngem inayabannak ni Jehova idi agipaspastorak iti arban, ket imbaga kaniak ni Jehova, ‘Mapanka agipadto iti ilik nga Israel.’+
16 Isu a denggem ita ti kuna ni Jehova, ‘Ibagbagam, “Dika agipadto maibusor iti Israel,+ ken dika agsao+ maikontra iti sangakabbalayan ni Isaac.”
17 Daytoy ngarud ti imbaga ni Jehova: “Ti asawam ket agbalinto a balangkantis iti siudad, ken matayto iti espada dagiti annakmo a lallaki ken babbai. Mabingaybingay ken marukodto ti dagam, ket mataykanto iti narugit a daga; ket sigurado a maipanawto ti Israel iti dagana.”’”+
Footnotes
^ Wenno “Soberano.”
^ Kayatna a sawen, bayat ti Enero ken Pebrero.
^ Lit., “tumakder.”
^ Wenno “nagladingitan.”
^ Lit., “tumakder.”
^ Wenno “nagladingitan.”
^ Lit., “manganka iti tinapay.”
^ Wenno “agkedkeddel kadagiti higos ti kaykayo a sikomoro.”