Daniel 11:1-45
11 “Iti umuna a tawen ti panagturay ni Dario+ a Medo, timmakderak ket pinapigsak ken sinalaknibak isuna.*
2 Ti ibagak kenka itan ket ti kinapudno:
“Addanto pay tallo nga ari a tumakder* para iti Persia, ket ti maikapat agakupto iti ad-adu a kinabaknang ngem kadakuada amin. Inton bumileg gapu iti kinabaknangna, sugsogannanto ti amin a kumontra iti pagarian ti Grecia.+
3 “Addanto agturay a nabileg nga ari ket nakalawlawanto ti sakupenna+ ken aramidennanto ti kaykayatna.
4 Inton kapigsa ti panagturayna, madadaelto ti pagarianna ken mabingbingay iti uppat nga angin iti langit,+ ngem saanto a maipasa kadagiti annakna,* ken saanton a kas iti dati ti kabileg ti panagturayna; ta maikkatto dayta a pagarian ken tagikuaen ti sabsabali.
5 “Pumigsanto ti ari ti abagatan, kayatna a sawen, ti maysa kadagiti prinsipena; ngem addanto sabali a nabilbileg ngem isuna a nalawlawa ken ad-adu ti iturayanna.
6 “Kalpasan ti sumagmamano a tawen, mangaramiddanto iti aliansa. Ti anak a babai ti ari ti abagatan ket mapanto iti ari ti amianan tapno mangaramidda iti patas a tulagan. Ngem saanto a mapagtalinaed daytoy a babai ti bileg ti takiagna; ket saanto nga agtakder ti ari, wenno saanto nga agtalinaed ti pannakabalinna; mayawatto ti babai iti sabali, agraman dagidiay nangyeg kenkuana, ken ti amana, ken daydiay mangpappapigsa kenkuana iti dayta a tiempo.
7 Addanto mangsukat kenkuana nga ari manipud iti mismo a pamiliana. Isu ti mapan iti armada ken dumarup iti napaderan a siudad ti ari ti amianan. Makilabanto kadakuada ket mangabakto.
8 Ipannanto idiay Egipto dagiti didiosenda, dagiti metal nga imahenda,* dagiti napapateg nga alikamen a naaramid iti pirak ken balitok, agraman dagiti kautibona. Iti sumagmamano a tawen, adaywanna ti ari ti amianan,
9 nga umayto rumaut iti pagarian ti ari ti abagatan, ngem agsublinto iti mismo a pagilianna.
10 “Agsagananto dagiti annakna a makigubat ken mangummongda iti dakkel nga armada. Sigurado a dumarupto a kas iti mangyanud a layus. Ngem agsanudto, ken makigubat agingga a makadanon iti napaderan a siudadna.
11 “Makapungtotto ti ari ti abagatan ket rummuarto a makigubat kenkuana, kayatna a sawen, iti ari ti amianan. Mangummongto daytoy iti adu a soldadona, ngem dagita a soldado ket mayawatto iti ima daydiay nga ari.
12 Maipanawto dagita a soldado. Agragragsakto ken dadaelennanto ti pinullo a ribu; ngem saannanto a gundawayan nga usaren ti nabileg a saadna.
13 “Agsublinto a makiranget ti ari ti amianan a kaduana ti ad-adu a soldado ngem iti immuna. Iti pagpatinggaan ti tiempo, kalpasan ti sumagmamano a tawen, sigurado nga agsubli a kadua ti dakkel nga armada a kompleto ti armasda.
14 Kadagidiay a tiempo, adunto ti bumusor iti ari ti abagatan.
“Ket maimpluensiaanto dagiti naranggas a tattao* iti ilim tapno padasenda nga itungpal ti sirmata; ngem saandanto nga agballigi.
15 “Umayto ti ari ti amianan tapno mangaramid iti bunton a pagdalanan ken parmekenna ti napaderan a siudad. Saanto a kabaelan a labanan ti armada ti abagatan, wenno uray dagiti kalalaingan a soldadona; ket awanto ti bilegda a lumaban.
16 Daydiay um-umay makilaban kenkuana aramidennanto ti kaykayatna, ken awanto ti makapagtakder iti sanguananna. Agtakderto iti daga ti Dekorasion,*+ ket addanto bilegna a mangdadael.
17 Determinado nga umay a kaduana ti intero a puersa militar ti pagarianna, ken mangaramidto iti katulagan kenkuana; ket agballiginto. Mapalubosanto a mangdadael iti anak a babai. Saanto nga agtakder ti babai, ket saanto nga agtultuloy a kukua ti ari.
18 Mapanto kadagiti daga nga adda iti igid ti baybay ket adunto a lugar ti parmekenna. Ngem addanto komander a mangpasardeng kenkuana a mangpabpabain iti sabsabali. Agsardengto dayta a panangpabpabain, ta maibabainto daydiay mangpabpabain.
19 Ket agsublinto isuna kadagiti napaderan a siudad iti mismo a dagana. Maabak ken maparmekto ket daytanton ti pagpatinggaanna.
20 “Addanto sumukat iti saadna a mangibilin nga adda agsingir* a lumasat iti nangayed a pagarian, ngem iti sumagmamano nga aldaw, madadaelto isuna nupay saan a gapu iti pungtot wenno iti gubat.
21 “Addanto magurgura a sumukat iti saadna, ken saandanto nga ited kenkuana ti kinadayag ti pagarian; ken umayto bayat ti tiempo ti kinatalged* ket alaenna ti pagarian babaen ti panangallilaw.*
22 Parmekennanto a kasla layus dagiti armada a bumusor kenkuana, ket madadaeldanto; ket kastanto met ti mapasamak iti Lider+ ti tulag.+
23 Gapu iti pannakialiansada kenkuana, itultuloyna ti mangallilaw ken makigubat ket bumileg babaen ti bassit a nasion.
24 Bayat ti tiempo ti kinatalged,* mapanto kadagiti kababaknangan a paset* ti probinsia* ket aramidenna dagiti saan nga inaramid dagidi ammana. Dagiti sinamsam, naalana a bambanag, ken kinabaknang ket iwarasnanto kadakuada; aramidennanto dagiti planona maibusor kadagiti napaderan a siudad, ngem iti maysa laeng a panawen.
25 “Papigsaennanto ti pannakabalinna ken ti pakinakemna* maibusor iti ari ti abagatan a kaduana ti dakkel nga armadana. Agsagananto ti ari ti abagatan para iti gubat a kaduana ti nakadakdakkel ken nakabilbileg nga armada. Saanto nga agtakder ta adunto ti iplanoda maibusor kenkuana.
26 Dagidiay mangmangan iti naimas a taraonna ti mangdadaelto kenkuana.
“Madadaelto* ti armadana ken adunto ti mapapatay.
27 “Agduyosto ti puso dagitoy dua nga ari nga agaramid iti dakes, ket agsangodanto nga agin-innulbod iti maymaysa a lamisaan. Ngem awanto ti agballigi ta ti panungpalan ket mapasamakto pay laeng iti naikeddeng a tiempo.+
28 “Agsublinto iti dagana nga awitna ti nakaad-adu a banag, ket busorento ti pusona ti nasantuan a tulag. Agballiginto sa agsubli iti dagana.
29 “Iti naikeddeng a tiempo, agsublinto ken rautenna ti abagatan. Ngem iti daytoy a tiempo, saanen a kas iti immuna,
30 ta darupento dagiti barko ti Kitim,+ ket ipakumbabananto ti bagina.
“Agsublinto ket ibulosna ti pungtotna* iti nasantuan a tulag+ ket agballiginto; agsublinto ken ipamaysana ti atensionna kadagidiay nangtallikud iti nasantuan a tulag.
31 Agtignayto dagiti armada nga agtaud kenkuana; ket rugitandanto ti santuario,+ nga isu ti pagkamangan, ken ikkatenda ti kanayon a daton.*+
“Isaaddanto iti dayta ti makarimon a banag a mangdadael.+
32 “Tignayennanto dagidiay nangtallikud iti tulag babaen ti makaallilaw a sasao.* Ngem napigpigsanto ken agballigi dagiti tattao a makaam-ammo iti Diosda.
33 Dagiti makatarus+ manipud kadagiti umili ket mangiranudto iti pannakaawat iti adu. Agsagabadanto iti espada ken apuy, pannakaibalud ken pannakaagaw dagiti sanikua, iti sumagmamano nga aldaw.
34 Ngem inton agrigrigatda, makaawatdanto iti bassit a tulong; ket adunto ti makikadua kadakuada babaen ti makaallilaw a sasao.*
35 Agsagabanto ti dadduma kadagiti makatarus, tapno masubok dagiti tattao gapu kadakuada ken tapno madalusan ken mapapudawda+ agingga iti tiempo ti panungpalan; gapu ta mapasamakto pay laeng iti naikeddeng a tiempo.
36 “Aramidento ti ari ti kaykayatna, ket itan-ok ken ipasindayagnanto ti bagina a nangatngato ngem iti amin a dios; ken agsaonto kadagiti nakaskasdaaw a banag maikontra iti Dios dagiti dios.+ Agballiginto agingga a bumaaw ti pungtot; gapu ta masapul a matungpal ti naikeddeng a mapasamak.
37 Saannanto nga ikankano ti Dios dagidi ammana; wenno saannanto nga ikabilangan ti tarigagay dagiti babbai wenno ti asinoman a sabali a dios, no di ket ipasindayagnanto ti bagina iti isuamin.
38 Idaydayawnanto ketdi ti dios dagiti pagkamangan; idaydayawnanto ti dios a di am-ammo dagidi ammana babaen ti balitok, pirak, nangina a batbato, ken napapateg a bambanag.
39 Agballiginto kadagiti kabibilgan a pagkamangan, a kaduana* ti sabali a dios. Napalalonto ti panangpadayawna kadagiti mangpadayaw kenkuana,* ken isaadna ida nga agturay iti adu a tattao; ket bingaybingayennanto* ti daga depende iti presio.
40 “Iti tiempo ti panungpalan, makidinnuronto* kenkuana ti ari ti abagatan, ken dumarupto kenkuana ti ari ti amianan a kaduana dagiti karuahe, kumakabalio, ken adu a barko; ken serkennanto dagiti pagilian ken dumarupto a kas iti layus.
41 Sumrekto met iti daga ti Dekorasion,*+ ket adunto a daga ti maparmek. Ngem dagitoy ti makalisi iti irarautna: ti Edom ken Moab ken ti kangrunaan a paset dagiti Ammonita.
42 Itultuloynanto a rauten dagiti nasion; ket saanto a makalisi ti Egipto.
43 Iturayannanto dagiti nailemmeng a kinabaknang a balitok ken pirak ken amin a napapateg a bambanag ti Egipto. Surotento dagiti taga-Libya ken taga-Etiopia.
44 “Ngem addanto damdamag manipud iti daya* ken iti amianan a mangriribuk kenkuana, isu a rummuarto a napalalo ti pungtotna ket adunto ti patayen ken dadaelenna.
45 Mangipatakderto kadagiti pimmalasio* a toldana iti nagbaetan ti dakkel a baybay ken ti nasantuan a bantay ti Dekorasion;*+ ket aglaylayon nga agturong iti pannakadadaelna, ken awanto ti tumulong kenkuana.
Footnotes
^ Wenno “nagbalinak a kamangna.”
^ Wenno “bumangon.”
^ Wenno “kaputotanna.”
^ Wenno “a sinukog nga estatuada.”
^ Wenno “annak dagiti mannanakaw.”
^ Wenno “ti Kinapintas.”
^ “Agsingir,” nalabit kadagiti buis. Wenno “mangidadaulo kadagiti trabahador.”
^ Wenno mabalin nga, “a di mapakpakadaan.”
^ Wenno “dakes a panggep.”
^ Wenno mabalin nga, “a di mapakpakadaan.”
^ Lit., “nalukmeg.”
^ Wenno “masakupan a distrito.”
^ Lit., “pusona.”
^ Wenno “Malayusto.”
^ Wenno “iturongna ti ungetna.”
^ Wenno “ti agtultuloy a daton.”
^ Wenno “panangartiok; panangpatiray-ok.”
^ Wenno “panangartiok; panangpatiray-ok.”
^ Wenno “iti tulong.”
^ Wenno mabalin a, “kayatna a padayawan.”
^ Wenno “iwarasnanto.”
^ Wenno “makisinnangdonto.”
^ Wenno “ti Kinapintas.”
^ Wenno “pagsingisingan ti init.”
^ Wenno “naarian.”
^ Wenno “ti Kinapintas.”
