Deuteronomio 12:1-32
12 “Dagitoy ti regulasion ken pangngeddeng a masapul a surotenyo a naimbag iti amin nga aldaw nga addakayo iti daga nga ited kadakayo ni Jehova a Dios dagidi ammayo.
2 Kadagiti nasion a sakupenyo, dadaelenyo a naan-anay ti amin a disso a nagdaydayawanda kadagiti diosda,+ kadagiti man nangato a bantay, turod, wenno sirok ti narukbos a kayo.
3 Rakrakenyo dagiti altarda, rebbaenyo dagiti sagrado nga adigida,+ puoranyo dagiti sagrado a posteda,* ken dadaelenyo dagiti kinitikitan nga imahenda,+ tapno maikkat ti naganda iti dayta a disso.+
4 “Saanyo a dayawen ni Jehova a Diosyo iti kasta a pamay-an.+
5 Imbes ketdi, mapankayo iti disso a pilien ni Jehova a Diosyo a pakaidaydayawan ti naganna kadagiti teritoria ti tribuyo.+
6 Ipanyo sadiay dagiti datonyo a mapuoran,+ apagkapulloyo,+ kontribusionyo,+ daton a pangtungpal iti kariyo, boluntario a datonyo,+ ti dadduma pay a datonyo, ken dagiti inauna nga urbon a baka, karnero, ken kaldingyo.+
7 Masapul a mangankayo sadiay iti sanguanan ni Jehova a Diosyo+ ket pagragsakanyo ti amin a naaramidanyo,+ ta binendisionannakayo ni Jehova a Diosyo.
8 “Diyo aramiden sadiay ti ar-aramidentayo ita, ta ar-aramiden ti tunggal maysa ti umiso iti imatangna,*
9 gapu ta dikay pay nakastrek iti lugar a paginanaan+ ken iti tawid nga ited kadakayo ni Jehova a Diosyo.
10 Inton bumallasiwkayo iti Jordan+ ken agnaedkayo iti daga nga ited ni Jehova a Diosyo a tagikuaenyo, sigurado nga ipaayannakayto iti talna ken dinakayto singaen ti amin a kabusoryo iti aglawlawyo, ket natalgedto ti panagbiagyo.+
11 Itugotyo ti amin nga ibilinko kadakayo iti disso a pilien ni Jehova a Diosyo a pakaidaydayawan ti naganna+—dagiti daton a mapuoran, apagkapullo,+ kontribusion, daton a pangtungpal iti kariyo ken Jehova, ken ti dadduma pay a daton.
12 Agragsakkayto iti sanguanan ni Jehova a Diosyo+—dakayo, ti annakyo a lallaki ken babbai, ti adipenyo a lallaki ken babbai, ken dagiti Levita iti uneg dagiti siudadyo,* ta saanda a naikkan iti bingay wenno tawid, saan a kas kadakayo.+
13 Siguraduenyo a diyo ipan dagiti datonyo a mapuoran iti sabali a disso a makitayo.+
14 Ipanyo laeng dagiti datonyo a mapuoran iti disso a pilien ni Jehova iti maysa kadagiti teritoria ti tribuyo, ket aramidenyo sadiay ti amin nga ibilinko kadakayo.+
15 “Ngem kaanoman a kayatyo,* mabalinyo ti agparti ken mangan iti karne,+ sigun iti bendision nga inted kadakayo ni Jehova a Diosyo iti amin a siudadyo.* Mabalin a mangan iti dayta ti tao a maibilang a narugit ken nadalus, kas iti pannanganyo iti gasela wenno ugsa.
16 Ngem dikay mangan iti dara;+ masapul nga ibukbokyo dayta iti daga a kas iti danum.+
17 Diyo mabalin a kanen iti uneg dagiti siudadyo* ti apagkapullo ti bukbukel, baro nga arak, lana, dagiti inauna nga urbon a baka, karnero, ken kalding,+ aniaman a daton a pangtungpal iti kariyo, dagiti boluntario a datonyo, wenno kontribusionyo.
18 Kanenyo dagitoy iti sanguanan ni Jehova a Diosyo, iti disso a pilien ni Jehova a Diosyo+—dakayo, ti anakyo a lalaki ken babai, ti adipenyo a lalaki ken babai, ken dagiti Levita iti uneg dagiti siudadyo.* Pagragsakanyonto iti sanguanan ni Jehova a Diosyo ti amin a naaramidanyo.
19 Siguraduenyo a saan a mabaybay-an dagiti Levita+ bayat ti panagnaedyo iti dagayo.
20 “Inton palawaen ni Jehova a Diosyo ti teritoriayo,+ kas inkarina kadakayo,+ ket ibagayo, ‘Kayatko ti mangan iti karne,’ gapu ta tarigagayanyo dayta,* mabalinyo ti mangan kaanoman a kayatyo.*+
21 No adayo kadakayo ti disso a pilien ni Jehova a Diosyo a pakaidaydayawan ti naganna,+ mangpartikayo iti sumagmamano a baka, karnero, wenno kalding nga inted kadakayo ni Jehova, kas iti imbilinko kadakayo, ket mangankayo iti uneg dagiti siudadyo* kaanoman a kayatyo.*
22 Mabalinyo a kanen dayta kas iti pannanganyo iti gasela ken ugsa;+ mabalin a mangan ti narugit ken nadalus a tao.
23 Ngem saanyo a kanen ti dara,+ ta ti dara isu ti biag,*+ ket saanyo a kanen ti biag* a karaman iti lasag.
24 Diyo kanen dayta. Masapul nga ibukbokyo dayta iti daga a kas iti danum.+
25 Diyo kanen dayta, tapno nasayaat ti pagbanaganyo ken dagiti annakyo, ta ar-aramidenyo ti umiso iti imatang ni Jehova.
26 Dagiti laeng nasantuan a banag a kukuayo ken dagiti daton a pangtungpal iti kariyo ti itugotyo no mapankayo iti disso a pilien ni Jehova.
27 Ipanyonto sadiay dagiti datonyo a mapuoran, ti lasag ken ti dara,+ iti rabaw ti altar ni Jehova a Diosyo, ket ibukbokyo ti dara dagiti datonyo iti abay ti altar+ ni Jehova a Diosyo, ngem mabalinyo a kanen ti lasag dagita.
28 “Tungpalenyo a naimbag ti amin nga ibilinko kadakayo, tapno nasayaatto ti pagbanaganyo ken dagiti annakyo, ta ar-aramidenyo ti naimbag ken umiso iti imatang ni Jehova a Diosyo.
29 “Inton dadaelen ni Jehova a Diosyo ti amin a nasion a papanawenyo,+ ken agnaedkayo iti dagada,
30 agannadkayo a saanyo a tultuladen ida, kalpasan a naibusda iti sanguananyo. Dikay agusioso iti maipapan kadagiti diosda, nga ibagayo, ‘Kasano ngata ti panagdayaw dagitoy a nasion kadagiti diosda? Kasta met ti aramidek.’+
31 Diyo aramiden daytoy ken Jehova a Diosyo, ta aramidenda para iti diosda ti aniaman a makarimon a banag a kagura ni Jehova, nga uray la puoranda ti annakda a lallaki ken babbai para kadagiti diosda.+
32 Masapul a tungpalenyo a naimbag ti amin nga ibilinko kadakayo.+ Diyo nayonan wenno kissayan.+
Footnotes
^ Wenno “pagarupna nga umiso.”
^ Lit., “ruanganyo.”
^ Lit., “iti uneg ti amin a ruanganyo.”
^ Wenno “iti amin a tarigagayan ti kararuayo.”
^ Lit., “ruanganyo.”
^ Lit., “ruanganyo.”
^ Wenno “tarigagayan dayta ti kararuayo.”
^ Wenno “iti amin a tarigagayan ti kararuayo.”
^ Lit., “ruanganyo.”
^ Wenno “iti amin a tarigagayan ti kararuayo.”
^ Wenno “kararua.”
^ Wenno “kararua.”
