Deuteronomio 2:1-37
2 “Kalpasanna, nagnatayo iti let-ang nga agturong iti Nalabaga a Baybay, kas imbaga kaniak ni Jehova,+ ket adu nga aldaw a nagnagnatayo iti aglawlaw ti Bantay Seir.
2 Kamaudiananna, kinuna ni Jehova,
3 ‘Nabayagen nga addakayo iti aglawlaw daytoy a bantay. Ita, agpaamianankayo.
4 Ibilinmo kadagiti tattao: “Lumasatkayo iti pagpatinggaan ti teritoria dagiti kakabsatyo, dagiti annak ni Esau,+ nga agnanaed iti Seir,+ ket agbutengdanto kadakayo,+ ngem masapul nga agan-annadkayo.
5 Dikay dangran* ida, ta saankonto nga ited kadakayo ti aniaman a paset ti dagada uray kas kaakaba laeng ti dapan, gapu ta intedko ti Bantay Seir kas sanikua ni Esau.+
6 Masapul a bayadanyo ti taraon a kanenyo, ken masapul a bayadanyo ti danum nga inumenyo.+
7 Ta binendisionan ni Jehova a Diosyo ti amin nga inaramidyo. Ammona a magmagnakayo iti daytoy nalawa a let-ang. Adda kadakayo ni Jehova a Diosyo kadagitoy 40 a tawen, ket saankayo a nagkurang iti aniaman.”’+
8 Iti kasta, limmabastayo iti lugar dagiti kakabsattayo, dagiti annak ni Esau,+ nga agnanaed idiay Seir, ket saantayo a nagna iti Araba, Elat, ken Ezion-geber.+
“Kalpasanna, nagturongtayo iti let-ang ti Moab.+
9 Kinuna kaniak ni Jehova, ‘Dikay dangran wenno gubaten ti Moab, ta saankonto nga ited kadakayo kas sanikua ti aniaman a paset ti dagada gapu ta intedko ti Ar kas sanikua ti kaputotan ni Lot.+
10 (Dati nga agnanaed sadiay dagiti Emim.+ Napipigsa, nakaad-adu, ken natatayagda a kas kadagiti Anakim.
11 Maibilang met dagiti Refaim+ a kapadpada dagiti Anakim,+ ket aw-awagan ida dagiti Moabita iti Emim.
12 Sigud nga agnanaed dagiti Horeo+ idiay Seir, ngem inagaw dagiti annak ni Esau ti dagada ket pinapatayda ida sa nagnaedda sadiay.+ Kastanto met ti aramiden ti Israel iti daga nga agbalin a sanikuada, a sigurado nga ited kadakuada ni Jehova.)
13 Ita, ballasiwenyo ti Tanap* ti Zered.’ Iti kasta, binallasiwtayo ti Tanap* ti Zered.+
14 Nagpaut iti 38 a tawen ti pannagnatayo manipud Kades-barnea agingga a nakaballasiwtayo iti Tanap* ti Zered, agingga a natay iti kampo ti intero a henerasion dagiti lallaki a mannakigubat, kas inkari kadakuada ni Jehova.+
15 Bimmusor kadakuada ti ima ni Jehova ket inikkatna ida iti kampo agingga a natayda amin.+
16 “Idi natay aminen a lallaki a mannakigubat,+
17 kinuna manen kaniak ni Jehova,
18 ‘Lumasatkayo ita iti teritoria ti Moab, wenno ti Ar.
19 Inton makaasidegkayo kadagiti Ammonita, diyo gubaten wenno riribuken ida, ta saankonto nga ited kadakayo kas sanikua ti aniaman a paset ti daga dagiti Ammonita, gapu ta intedko dayta kas sanikua ti kaputotan ni Lot.+
20 Daga idi daytoy dagiti Refaim.+ (Agnanaed idi sadiay dagiti Refaim, ket aw-awagan ida dagiti Ammonita iti Zamzumim.
21 Napipigsa, nakaad-adu, ken natatayagda a kas kadagiti Anakim;+ ngem pinarmek ida ni Jehova iti sanguanan dagiti Ammonita ket pinapanawda ida tapno agnaedda iti lugarda.
22 Kasta ti inaramidna iti kaputotan ni Esau, nga agnanaed itan idiay Seir,+ idi tinulonganna ida a mangparmek ken mangpapanaw kadagiti Horeo+ tapno agnaedda iti lugarda agingga ita nga aldaw.
23 Nagnaed met dagiti Avim iti rehion ti Gaza+ agingga nga immay dagiti Caftorim+ a naggapu idiay Caftor* a nangibus kadakuada ken nagnaed iti lugarda.)
24 “‘Agrubbuatkayo ket ballasiwenyo ti Tanap ti Arnon.*+ Inyawatkon kadakayo ni Sihon+ nga Amoreo ken ari ti Hesbon. Gapuna, rugianyo a tagikuaen ti dagana, ket makigubatkayo kenkuana.
25 Ita nga aldaw, pagbutngek dagiti tattao iti intero a daga a makadamag iti maipapan kadakayo. Mariribukan ken agpigergerdanto* gapu kadakayo.’+
26 “Kalpasanna, nangibaonak kadagiti mensahero manipud let-ang ti Kedemot+ a mapan ken Ari Sihon ti Hesbon, ket sikakappia nga imbagada,+
27 ‘Palubosannak a lumasat iti dagam. Magnaak laeng iti kalsada ket saanakto nga agpakannawan wenno agpakannigid.+
28 Kanek laeng ti taraon ken inumek laeng ti danum nga ilakom kaniak. Palubosannak laeng a lumasat
29 —kas iti inaramid kaniak ti kaputotan ni Esau nga agnanaed idiay Seir ken dagiti Moabita nga agnanaed idiay Ar—agingga a maballasiwmi ti Jordan nga agturong iti daga nga ited kadakami ni Jehova a Diosmi.’
30 Ngem dinatayo pinalasat ni Ari Sihon ti Hesbon, ta binay-an ni Jehova a Diosmo nga agsukir+ ken tumangken ti pusona, tapno mayawatna kadatayo kas ita nga aldaw.+
31 “Gapuna, kinuna kaniak ni Jehova, ‘Intedkon kadakayo ni Sihon ken ti dagana. Rugianyo a tagikuaen ti dagana.’+
32 Idi rimmuar ni Sihon ken ti amin a tattaona tapno makilaban kadatayo idiay Jahaz,+
33 inyawat kadatayo ni Jehova a Diostayo, isu a naparmektayo agraman dagiti annakna ken ti amin a tattaona.
34 Sinakuptayo idi ti amin a siudadna ket pinarmektayo dagita, agraman dagiti lallaki, babbai, ken ubbing. Awan ti pinalubosantayo a makalasat.+
35 Dagiti laeng taraken ken alikamen ti sinamsamtayo manipud kadagiti siudad a sinakuptayo.
36 Manipud Aroer,+ nga adda iti igid ti Tanap ti Arnon* (agraman ti siudad iti dayta a tanap), agingga idiay Gilead, awan idi ti ili a saantayo nga inabak. Inyawat amin ida kadatayo ni Jehova a Diostayo.+
37 Ngem saantayo nga immasideg iti daga dagiti Ammonita,+ ti intero nga igid ti Tanap* ti Jabok+ ken dagiti siudad iti kabambantayan, wenno ti aniaman a lugar nga imparit ni Jehova a Diostayo.
Footnotes
^ Wenno “pagpungtoten.”
^ Wenno “Karayan.”
^ Wenno “Karayan.”
^ Wenno “Karayan.”
^ Kayatna a sawen, ti Creta.
^ Wenno “Karayan Arnon.”
^ Wenno “agpaut-otdanto a kas iti aganak.”
^ Wenno “Karayan Arnon.”
^ Wenno “Karayan.”
