Eclesiastes 5:1-20
5 Saluadam ti addangmo no mapanka iti balay ti pudno a Dios;+ nasaysayaat nga umasidegka a dumngeg+ ngem ti agdaton kas iti ar-aramiden dagiti maag,+ ta saanda nga ammo a dakes ti ar-aramidenda.
2 Saan koma a nadarasudos nga agsao ti ngiwat ken pusom iti sanguanan ti pudno a Dios,+ ta adda idiay langit ti pudno a Dios idinto ta addaka ditoy daga. Isu a manmano la koma ti saom.+
3 Ta agtagtagainep ti tao gapu iti adu unay a pakakumikoman,*+ ken sao a sao ti maag gapu iti adu unay a sasao.+
4 No agkarika iti Dios, dimo itantan a tungpalen,+ ta saan a maragsakan kadagiti maag.+ Tungpalem ti karim.+
5 Nasaysayaat a dika agkari ngem ti agkarika a dimo tungpalen.+
6 Dimo ipalubos a ti ngiwatmo ti mamagbasol kenka,*+ ken dimo ibagbaga iti sanguanan ti anghel* a kamali dayta.+ Apay koma a pagpungtotem ti pudno a Dios gapu iti imbagam ket dadaelenna ti gapuanan ti imam?+
7 Ta no kasano nga agresulta iti tagtagainep ti adu a pakakumikoman,+ awan met ti serserbi ti adu a sasao. Ngem agbutengka iti pudno a Dios.+
8 No adda makitam a maidaddadanes a napanglaw ken no saan a maipakpakat ti hustisia ken kinalinteg iti lugaryo, dika masdaaw.+ Ta dayta a nangato nga opisial ket sipsiputan ti nangatngato ngem isuna, ken adda pay dadduma a nangatngato ngem kadakuada.
9 Kasta met, pagbibingayan ti amin ti produkto ti daga; uray ti ari ket agpannuray iti talon.+
10 Ti managayat iti pirak saanto a mapnek iti pirak, uray ti managayat iti kinabaknang saanto a mapnek iti sapulna.+ Awan met serserbi daytoy.+
11 No umadu ti naimbag a banag, umadu ti mangibus kadagita.+ Ket ania ti magunggona ti makinkukua, no di ti panangkitana laeng kadagita?+
12 Naimas ti turog ti agserserbi, bassit man wenno adu ti kanenna, ngem saan a makaturog ti nabaknang gapu iti adu a sanikuana.
13 Dakkel met a didigra* ti nakitak iti baba ti init: ti kinabaknang nga indulin ti makinkukua iti dayta ket pakadangranna.
14 Mapukaw dagita a kinabaknang gapu iti pannakalugina,* ket no maaddaan iti anak, awanen ti ipatawidna a sanikua.+
15 No kasano nga awan ti bado ti maysa a rummuar iti tian ni inana, awanto met ti badona a pumanaw.+ Ken awan ti maitugotna a bunga ti amin a napasnek a panagtrabahona.+
16 Dakkel met a didigra* daytoy: No kasano nga immay, kastanto met ti ipapanawna; ket ania ti magunggona ti maysa a sipapasnek nga agtrabtrabaho a kasla agkamkamat iti angin?+
17 Inaldaw met a mangan iti sipnget, a maup-upay, masaksakit, ken agpupungtot.+
18 Daytoy ti nakitak a naimbag ken umiso: mangan, uminum, ken tagiragsaken ti maysa ti bunga ti amin a napasnek a panagtrabahona+ a nagbannoganna iti baba ti init bayat ti ababa a biag nga inted kenkuana ti pudno a Dios, ta dayta ti gunggonana.*+
19 Kasta met, no mangted ti pudno a Dios iti kinabaknang ken material a sanikua+ iti maysa a tao kasta met iti abilidad a mangtagiragsak kadagita, masapul nga alaenna ti gunggonana* ken agragsak iti bunga ti napasnek a panagtrabahona. Sagut ti Dios daytoy.+
20 Ta saanna a mapupuotan* ti panaglabas dagiti aldaw ti biagna, ta pinagbalin ti pudno a Dios a makumikom iti panagragsak ti pusona.+
Footnotes
^ Wenno “adu unay a pakaseknan.”
^ Lit., “iti lasagmo.”
^ Wenno “mensahero.”
^ Wenno “kalamidad.”
^ Wenno “makadangran nga aramidna.”
^ Wenno “kalamidad.”
^ Wenno “bingayna.”
^ Wenno “bingayna.”
^ Wenno “malagip.”
