Esdras 3:1-13
3 Iti maikapito a bulan,+ nakadanonen dagiti Israelita* kadagiti siudadda, ket naguummongda idiay Jerusalem.
2 Ti altar ti Dios ti Israel ket imbangon ni Jesua+ nga anak ni Jehozadak ken dagiti kaduana a papadi, kasta met ni Zerubabel+ nga anak ni Sealtiel+ ken dagiti kakabsatna, tapno makaipaayda kadagiti daton a mapuoran, kas naisurat iti Linteg ni Moises+ nga adipen ti pudno a Dios.
3 Imbangonda ti altar iti dati nga ayanna, uray no mabutengda kadagiti tattao iti dadduma a lugar.+ Nangidatagda manen ken Jehova kadagiti daton a mapuoran, iti bigat ken iti rabii.+
4 Sinelebraranda ti Piesta ti Abong-abong* kas iti naisurat,+ ket inaldaw nga indatagda ti naikeddeng a kaadu ti daton a mapuoran iti tunggal aldaw.+
5 Kalpasanna, intultuloyda ti nangidatag kadagiti inaldaw a daton a mapuoran.+ Nangidatagda met kadagiti daton a mapuoran para iti baro a bulan,+ para iti amin a nasantuan a piesta+ ni Jehova, ken dagiti boluntario nga inted ti asinoman+ para ken Jehova.
6 Manipud iti umuna nga aldaw ti maikapito a bulan,+ nangrugidan a mangidatag ken Jehova kadagiti daton a mapuoran, uray saan pay a naibangon ti pundasion ti templo ni Jehova.
7 Nangtedda iti kuarta a pangtangdan kadagiti paratikap iti bato+ ken kadagiti eksperto a trabahador.+ Nangipaayda met iti taraon, inumen, ken lana kadagiti taga-Sidon ken Tiro gapu kadagiti troso ti sedro nga impatapawda iti baybay manipud Lebanon agingga iti Joppe,+ kas imbilin ni Ari Ciro ti Persia.+
8 Inrugi dagiti Israelita ti nagtrabaho iti maikadua a bulan ti maikadua a tawen kalpasan ti panagsublida iti balay ti pudno a Dios iti Jerusalem. Nagtitinnulong da Zerubabel nga anak ni Sealtiel, ni Jesua nga anak ni Jehozadak ken ti dadduma pay, a pakairamanan dagiti papadi ken Levita, ken amin a nagsubli idiay Jerusalem.+ Dagiti Levita nga agtawen iti 20 nga agpangato ti nadutokan a mangidaulo iti panagtrabaho iti balay ni Jehova.
9 Gapuna, ni Jesua agraman dagiti annak ken kakabsatna, ni Kadmiel ken dagiti annakna, ken dagiti annak ni Juda, nagtitinnulongda a mangidaulo kadagiti agtrabtrabaho iti balay ti pudno a Dios. Timmulong met dagiti annak ni Henadad,+ dagiti annak ken kakabagianda, dagiti Levita.
10 Idi nalpasen ti pundasion ti templo ni Jehova,+ insuot dagiti papadi ti opisial a badoda ken nangalada kadagiti trumpeta.+ Nangala met dagiti Levita nga annak ni Asaf kadagiti piangpiang ket indaydayawda ni Jehova maitunos iti bilin ni Ari David ti Israel.+
11 Rinugianda ti nagkanta kas+ panagdayaw ken panagyaman ken Jehova, “ta isu ket naimbag; agnanayon ti napudno nga ayatna iti Israel.”+ Impukkaw met ti amin nga umili ti panangidaydayawda ken Jehova ta nalpasen ti pundasion ti balay ni Jehova.
12 Adu a lallakay a papadi, Levita, ken ulo dagiti pamilia a nakakita iti dati a balay+ ti nagsangsangit iti napigsa idi nakitada a nalpasen ti pundasion daytoy a balay. Nagririaw met ti dadduma pay gapu iti ragsakda.+
13 Gapuna, saanen a mailasin ti riaw ti ragsak ken ti panagsangit, ta nakapigpigsa ti pukkaw dagiti umili nga uray la mangngeg iti adayo.
