Esdras 5:1-17
5 Gapuna, nakisarita da propeta Haggeo+ ken Zacarias+ nga apoko ni Iddo+ kadagiti Judio iti Juda ken Jerusalem, iti nagan ti Dios ti Israel a mangiwanwanwan kadakuada.
2 Rinugian ngarud da Zerubabel+ nga anak ni Sealtiel ken ni Jesua+ nga anak ni Jehozadak a bangonen manen ti balay ti Dios,+ nga adda idiay Jerusalem. Kaduada dagiti propeta ti Dios ket dagitoy ti nangparegta kadakuada.+
3 Iti dayta a tiempo, napan kadakuada ni Tatenai a gobernador iti Labes ti Karayan* ken ni Setar-bozenai ken dagiti kakaduada, ket insaludsodda: “Asino ti nangibilin a bangonenyo daytoy a balay ken leppasenyo daytoy a patakder?”
4 Dinamagda pay: “Ania ti nagan dagiti lallaki a mangibangbangon iti daytoy a patakder?”
5 Ngem bambantayan* ti Dios dagiti panglakayen dagiti Judio,+ isu a saan a pinasardeng ida ni Tatenai ken dagiti kakaduana agingga a makapagsuratda ken Dario ken maawatda ti sungbatna maipapan iti daytoy.
6 Daytoy ti surat ni Tatenai a gobernador iti Labes ti Karayan, ni Setar-bozenai, ken dagiti kakaduada a gobernador iti Labes ti Karayan, nga impatulodda ken Ari Dario;
7 kastoy ti impadamag ken insuratda:
“Kenka Ari Dario:
“Natalna koma ti panagturaymo!
8 Kayatmi nga ipakaammo iti ari a napankami idiay probinsia* ti Juda iti balay ti naindaklan a Dios, ket maibangbangon dayta kadagiti dadakkel a bato ken naballaetan iti dadakkel a kayo ti paderna. Nagagetda nga agtrabtrabaho ken adu ti mailepleppasda.
9 Insaludsodmi kadagiti panglakayenda: ‘Asino ti nangibilin a bangonenyo daytoy a balay ken leppasenyo daytoy a patakder?’+
10 Sinaludsodmi pay dagiti naganda tapno maisuratmi no siasino dagiti lallaki a mangidadaulo kadakuada.
11 “Kastoy ti insungbatda: ‘Dakami dagiti adipen ti Dios ti langit ken daga, ken bangbangonenmi manen ti balayna nga impatakder idi ken inleppas ti nabileg nga ari ti Israel adu a tawenen ti napalabas.+
12 Ngem gapu ta napagpungtot dagidi ammami ti Dios ti langit,+ inyawatna ida iti ima ni Ari Nabucodonosor+ ti Babilonia, a maysa a Caldeo, a nangdadael iti daytoy a balay+ ket impanna ida idiay Babilonia kas balud.+
13 Nupay kasta, iti umuna a tawen a panagturay ni Ari Ciro ti Babilonia, imbilinna a mabangon manen daytoy a balay ti Dios.+
14 Inruar met ni Ari Ciro manipud iti templo ti Babilonia dagiti balitok ken pirak nga alikamen iti balay ti Dios nga innala idi ni Nabucodonosor iti templo ti Jerusalem sa impanna iti templo ti Babilonia.+ Naited dagitoy ken Sesbazzar,*+ a dinutokan ni Ciro kas gobernador.+
15 Kinuna kenkuana ni Ciro: “Alaem dagitoy nga alikamen sa ipanmo iti templo idiay Jerusalem, ket maibangon manen ti balay ti Dios iti dati nga ayanna.”+
16 Iti kasta, napan ni Sesbazzar ket insaadna dagiti pundasion ti balay ti Dios,+ nga adda iti Jerusalem; ket manipud idi agingga ita, nagtultuloy ti panagibangon ngem saan pay a nalpas.’+
17 “Ita, no pagayatan ti ari, masukimat koma ti pagidulinan iti gameng ti palasio ti Babilonia, tapno maammuan no adda imbilin ni Ari Ciro a mabangon manen ti balay ti Dios idiay Jerusalem.+ Maipakaammo koma kadakami ti desision ti ari mainaig iti daytoy.”
