Esdras 6:1-22
6 Impaulog ngarud ni Ari Dario ti bilin a masukimat ti pagidulinan* iti gameng ti Babilonia.
2 Adda lukot a nasarakan iti kastilio iti Ecbatana, iti probinsia* ti Media, ket kastoy ti linaon ti bilin:
3 “Iti umuna a tawen a panagturay ni Ari Ciro, impaulogna daytoy a bilin maipapan iti balay ti Dios idiay Jerusalem:+ ‘Mabangon koma manen ti balay tapno makapagdaton dagiti Judio, ket maisaad koma dagiti pundasionna; 60 a kasiko* ti kangatona ken 60 a kasiko ti kaakabana.+
4 Addaan dagiti paderna iti tallo a katuon ti dadakkel a batbato ken maysa a katuon ti dadakkel a kaykayo.+ Maala ti magastos iti balay ti ari.+
5 Dagiti balitok ken pirak nga alikamen ti balay ti Dios nga innala idi ni Nabucodonosor iti templo ti Jerusalem ken impanna iti Babilonia+ ket maisubli met koma iti dati nga ayanda iti balay ti Dios.’+
6 “Dakayo, Tatenai a gobernador iti Labes ti Karayan,* Setar-bozenai, ken dagiti kakaduayo a gobernador iti Labes ti Karayan,+ baybay-anyo ida.
7 Diyo bibiangan ti pannakaibangon ti balay ti Dios. Palubosanyo ti gobernador dagiti Judio ken dagiti panglakayenda a mangbangon manen iti balay ti Dios iti dati nga ayanna.
8 Maysa pay, daytoy ti ibilinko nga aramidenyo kadagiti panglakayen dagiti Judio maipapan iti pannakabangon manen ti balay ti Dios: Maala dagiti magastos iti pondo ti ari,+ kadagiti buis a nakolekta iti Labes ti Karayan, ket dagus a maited kadagitoy a lallaki.+
9 Aniaman ti kasapulan—dagiti urbon a kalakian a baka+ kasta met dagiti kalakian a karnero+ ken urbon a karnero+ a maidatag iti Dios ti langit kas daton a mapuoran, dagiti trigo,+ asin,+ arak,+ ken lana,+ kas kiddaw dagiti papadi idiay Jerusalem—ket masapul a maited kadakuada iti inaldaw.
10 Iti kasta, agtultuloy a makaipaayda iti daton a makaay-ayo iti Dios ti langit ken maikararagda ti pagimbagan ti ari ken dagiti annakna.+
11 Ibilinko met a no adda mangsukir iti daytoy a bilin, maikkat ti maysa a kayo iti balayna sa maibitay* iti dayta, ket agbalin ti balayna a kasilias* ti publiko.
12 Ket ti Dios a nangikabil iti naganna sadiay+ parmekenna koma ti asinoman nga ari ken ili nga agpanggep a mangsukir iti daytoy a bilin ken mangdadael iti balay ti Dios, nga adda idiay Jerusalem. Siak, ni Dario, ipaulogko daytoy a bilin, ket matungpal koma a dagus.”
13 Inaramid a dagus ni Tatenai a gobernador iti Labes ti Karayan, ni Setar-bozenai,+ ken dagiti kakaduada, ti amin nga imbilin ni Ari Dario.
14 Intultuloy dagiti panglakayen dagiti Judio ti nagibangon ket adu ti mailepleppasda+ gapu ta naparegtada iti panagipadto da propeta Haggeo+ ken Zacarias+ nga apoko ni Iddo. Nalpasda a naibangon dayta kas imbilin ti Dios ti Israel+ ken kas imbilin da Ciro,+ Dario,+ ken ni Ari Artaxerxes+ ti Persia.
15 Nalpasda daytoy a balay iti maikatlo nga aldaw ti bulan ti Adar,* iti maikanem a tawen ti panagturay ni Ari Dario.
16 Kalpasanna, dagiti Israelita, papadi, Levita,+ ken ti dadduma pay a dati a napagtalaw siraragsak nga indedikarda daytoy a balay ti Dios.
17 Iti pannakaidedikar ti balay ti Dios, nangidatonda iti 100 a kalakian a baka, 200 a kalakian a karnero, ken 400 nga urbon a karnero. Nangidatagda met iti 12 a kalakian a kalding kas daton gapu iti basol maipaay iti intero nga Israel, maysa iti tunggal tribu ti Israel.+
18 Nangpilida kadagiti papadi sigun iti grupoda ken kadagiti Levita sigun iti grupoda tapno agserbida iti Dios idiay Jerusalem,+ maitunos iti naisurat iti libro ni Moises.+
19 Ket sinelebraran dagiti dati a napagtalaw ti Paskua iti maika-14 nga aldaw ti umuna a bulan.+
20 Dinalusan ti amin a papadi ken Levita ti bagbagida+ ket naibilangda amin a nadalus; pinartida ti daton para iti Paskua para iti amin a dati a napagtalaw, iti padada a papadi, ken iti bagbagida.
21 Nangan iti dayta dagiti Israelita a dati a napagtalaw, agraman ti amin a kimmuyog kadakuada a nangisardeng kadagiti narugit nga aramid dagiti nasion tapno agdayawda* ken Jehova a Dios ti Israel.+
22 Pito nga aldaw met a siraragsak a sinelebraranda ti Piesta ti Tinapay nga Awan Lebadurana,+ ta pinagrag-o ida ni Jehova ken tinignayna ti ari ti Asiria a maasian kadakuada,+ iti kasta, sinuportaranna ida* a mangbangon manen iti balay ti pudno a Dios, ti Dios ti Israel.
Footnotes
^ Lit., “balay a pagidulinan iti rekord.”
^ Wenno “masakupan a distrito.”
^ Wenno “Laud ti Eufrates.”
^ Wenno “mailansa.”
^ Wenno mabalin a, “bunton ti basura; bunton ti takki.”
^ Lit., “sapulenda.”
^ Lit., “pinapigsana ti imada.”
