Esdras 7:1-28
7 Kalpasan dagitoy, bayat ti panagturay ni Ari Artaxerxes+ ti Persia, adda lalaki nga agnagan iti Esdras.*+ Isu ti anak ni Seraias,+ nga anak ni Azarias, nga anak ni Hilkias,+
2 nga anak ni Salum, nga anak ni Zadok, nga anak ni Ahitub,
3 nga anak ni Amarias, nga anak ni Azarias,+ nga anak ni Meraiot,
4 nga anak ni Zerahias, nga anak ni Uzi, nga anak ni Buki,
5 nga anak ni Abisua, nga anak ni Finehas,+ nga anak ni Eleazar,+ nga anak ni Aaron+ a nangato a padi.
6 Daytoy nga Esdras ket naggapu idiay Babilonia, maysa a parakopia* a kabesadona* ti Linteg ni Moises,+ nga inted ni Jehova a Dios ti Israel. Inted ti ari ti amin a kiddaw ni Esdras gapu iti tulong ni Jehova a Diosna.
7 Nagsubli idiay Jerusalem ti dadduma nga Israelita, papadi, Levita,+ kumakanta,+ parabantay iti ruangan,+ ken agserserbi iti templo*+ bayat ti maikapito a tawen ti panagturay ni Ari Artaxerxes.
8 Nakadanon ni Esdras idiay Jerusalem iti maikalima a bulan ti maikapito a tawen ti panagturay ti ari.
9 Pimmanaw idiay Babilonia iti umuna nga aldaw ti umuna a bulan ket nakasangpet idiay Jerusalem iti umuna nga aldaw ti maikalima a bulan, gapu iti tulong ti Diosna.+
10 Insagana ni Esdras ti pusona* a mangadal iti Linteg ni Jehova ken mangyaplikar iti dayta,+ ken mangisuro iti Israel kadagiti regulasion ken pangngeddeng ti Dios.+
11 Daytoy ti surat nga inted ni Ari Artaxerxes ken Esdras a padi ken parakopia,* nga eksperto a mangadal* kadagiti bilin ken regulasion ni Jehova iti Israel:
12 * “Artaxerxes,+ nga ari dagiti ari, para ken Esdras a padi, ti parakopia* iti Linteg ti Dios ti langit: Adda koma kadakayo ti talna.
13 Ita, ibilinko a mapalubosan ti asinoman nga Israelita iti pagariak, kasta met dagiti papadi ken Levita, a mayat a kumuyog kenka nga agsubli idiay Jerusalem.+
14 Gapu ta ibaonnaka ti ari ken dagiti pito a mamalbalakadna a mangammo no maipatpatungpal met laeng iti Juda ken Jerusalem ti Linteg ti Diosmo nga adda kenka,*
15 ken mangipan kadagiti pirak ken balitok a boluntario nga inted ti ari ken dagiti mamalbalakadna para iti Dios ti Israel, a ti balayna ket adda idiay Jerusalem,
16 agraman ti amin a pirak ken balitok nga ited kenka* ti amin a probinsia* ti Babilonia, kasta met ti sagut dagiti umili ken dagiti papadi a boluntario nga itedda iti balay ti Diosda, nga adda idiay Jerusalem.+
17 Usarem a dagus daytoy a kuarta a panggatang kadagiti kalakian a baka,+ kalakian a karnero,+ urbon a karnero,+ agraman dagiti kakuyog dagitoy a daton a bukbukel+ ken daton nga inumen,+ ket idatagmo dagitoy iti altar ti balay ti Diosyo, nga adda idiay Jerusalem.
18 “Ti matedda a pirak ken balitok ket mabalinmo nga usaren ken dagiti kailiam* iti aniaman a kayatyo, maitunos iti pagayatan ti Diosyo.
19 Masapul nga idatagmo iti Dios ti amin nga alikamen a naited kenka a mausar iti panagdaydayaw iti balay ti Diosmo idiay Jerusalem.+
20 Mangalaka iti gastuem manipud iti pondo ti ari para iti dadduma pay a kasapulan ti balay ti Diosmo.+
21 “Siak, ni Ari Artaxerxes, ibilinko iti amin a tesorero iti Labes ti Karayan* nga itedyo a dagus ti amin a kiddawen ni Esdras+ a padi, ti parakopia* iti Linteg ti Dios ti langit,
22 agingga iti 100 a pirak a talento,* 100 a cor* a trigo, 100 a bat* nga arak,+ 100 a bat a lana,+ ken amin nga asin+ a masapulna.
23 Ikagumaanyo nga aramiden ti aniaman nga ibilin ti Dios ti langit+ mainaig iti balayna, tapno saan a makapungtot kadagiti umili iti pagarian ti ari ken kadagiti annakna.+
24 Maiparit met nga agsingirkayo iti aniaman a buis*+ kadagiti papadi ken Levita, musikero,+ parabantay iti ruangan, agserserbi iti templo,*+ ken agtrabtrabaho iti balay ti Dios.
25 “Ket sika, Esdras, maitunos iti sirib nga inted kenka ti Diosmo,* mangdutokka kadagiti mahistrado ken ukom a mangukom iti amin nga umili iti Labes ti Karayan, iti amin a makaammo kadagiti linteg ti Diosmo; ket masapul nga isuroyo dagita a linteg kadagiti saan pay a makaammo.+
26 Asinoman a saan a mangtungpal iti Linteg ti Diosmo ken iti linteg ti ari ket dagus a madusa—mapapatay, mapagtalaw, maala dagiti sanikuana, mamulta, wenno maibalud.”
27 Maidaydayaw koma ni Jehova a Dios dagidi ammatayo, a nangtignay iti puso ti ari a mangpasayaat iti balay ni Jehova idiay Jerusalem!+
28 Ken gapu iti napudno nga ayat ti Dios, nagbalin a naimbag kaniak ti ari+ ken dagiti mamalbalakadna+ ken ti amin a nabileg a prinsipe ti ari. Iti kasta, pinapigsak ti pakinakemko ta tultulongannak ni Jehova a Diosko, ken inummongko dagiti lallaki a panguluen* ti Israel a kumuyog kaniak nga agsubli.
Footnotes
^ Kaipapananna, “Tulong.”
^ Wenno “eskriba.”
^ Wenno “nalaing a parakopia.”
^ Wenno “Netineo.” Lit., “dagidiay naipaay.”
^ Wenno “Determinado ti puso ni Esdras.”
^ Wenno “eskriba.”
^ Wenno “a parakopia iti sasao.”
^ Ti Esd 7:12 agingga iti 7:26 ket orihinal a naisurat iti Aramaiko.
^ Wenno “eskriba.”
^ Lit., “nga adda iti imam.”
^ Wenno “masakupan a distrito.”
^ Lit., “masarakam.”
^ Lit., “kakabsatmo.”
^ Wenno “Laud ti Eufrates.”
^ Wenno “eskriba.”
^ Iti orihinal a lengguahe, tallo a buis ti matuktukoy ditoy: sedula, excise tax, ken toll fee.
^ Wenno “Netineo.” Lit., “dagidiay naipaay.”
^ Lit., “maitunos iti sirib ti Diosmo nga adda iti imam.”
^ Lit., “ulo.”