Esdras 8:1-36
8 Daytoy ti listaan dagiti ulo ti pamilia agraman dagiti pamiliada a kimmuyog kaniak a pimmanaw idiay Babilonia bayat ti panagturay ni Ari Artaxerxes:+
2 ni Gersom, iti pamilia ni Finehas;+ ni Daniel, iti pamilia ni Itamar;+ ni Hatus, iti pamilia ni David;
3 ni Zacarias, iti pamilia ni Secanias, iti pamilia ni Paros, agraman ti nairehistro a 150 a lallaki;
4 ni Elieho-enai nga anak ni Zerahias, iti pamilia ni Pahat-moab,+ agraman ti 200 a lallaki;
5 ni Secanias nga anak ni Jahaziel, iti pamilia ni Zattu,+ agraman ti 300 a lallaki;
6 ni Ebed nga anak ni Jonatan, iti pamilia ni Adin,+ agraman ti 50 a lallaki;
7 ni Jesaias nga anak ni Atalias, iti pamilia ni Elam,+ agraman ti 70 a lallaki;
8 ni Zebadias nga anak ni Miguel, iti pamilia ni Sefatias,+ agraman ti 80 a lallaki;
9 ni Abdias nga anak ni Jehiel, iti pamilia ni Joab, agraman ti 218 a lallaki;
10 ni Selomit nga anak ni Josifias, iti pamilia ni Bani, agraman ti 160 a lallaki;
11 ni Zacarias nga anak ni Bebai,+ iti pamilia ni Bebai, agraman ti 28 a lallaki;
12 ni Johanan nga anak ni Hakkatan, iti pamilia ni Azgad,+ agraman ti 110 a lallaki;
13 da Elifelet, Jeiel, ken Semaias, iti pamilia ni Adonikam,+ agraman ti 60 a lallaki (naud-udida a nagsubli);
14 ken da Utai ken Zabbud, iti pamilia ni Bigvai,+ agraman ti 70 a lallaki.
15 Inummongko ida iti karayan nga agturong iti Ahava,+ ket nagkampokami sadiay iti tallo nga aldaw. Ngem idi kinitak dagiti umili ken dagiti papadi, awan ti nasarakak a Levita.
16 Gapuna, pinaayabak dagiti pannakaulo a da Eliezer, Ariel, Semaias, Elnatan, Jarib, Elnatan, Natan, Zacarias, ken Mesulam, ken dagiti mannursuro a da Joiarib ken Elnatan.
17 Imbaonko ida a mapan ken Iddo a lider iti lugar a Casifia. Imbilinko nga ibagada ken Iddo ken kadagiti kakabsatna nga agserserbi iti templo* a taga-Casifia a mangibaonda kadagiti agserbi iti balay ti Diosmi.
18 Gapu ta naimbag kadakami ti Dios, nangibaonda iti masirib a lalaki manipud iti pamilia ni Mali+ nga apoko ni Levi nga anak ni Israel, nga isu ni Serebias+ ken dagiti annakna ken kakabsatna, 18 a lallaki.
19 Imbaonda pay ni Hasabias, kaduana ni Jesaias iti pamilia ni Merari,+ agraman dagiti kakabsatna, ken dagiti annakda, 20 a lallaki.
20 Adda pay 220 nga agserserbi iti templo* a nailista ti naganda, a pinili idi ni David ken dagiti prinsipe a tumulong kadagiti Levita.
21 Kalpasanna, imbagak nga agayunarkami* iti igid ti karayan nga Ahava ket agpakumbabakami iti Dios tapno iwanwannakami iti panagsublimi, ken salaknibannakami ken dagiti annakmi agraman ti amin a sanikuami.
22 Ta nakababain no agkiddawak iti ari kadagiti soldado ken kumakabalio a mangsalaknib kadakami kadagiti kabusor a masabatmi iti dalan, gapu ta kinunami iti ari: “Adda ti naimbag nga ima ti Diosmi iti amin a mangsapsapul kenkuana,+ ngem dusaenna ti amin a mangtallikud kenkuana.”+
23 Gapuna, nagayunarkami ken nagpakaasikami iti Dios, ket impangagna dagiti kararagmi.+
24 Ita, nangpiliak iti 12 kadagiti panguluen a papadi, da Serebias ken Hasabias,+ ken ti 10 pay a kakabsatda.
25 Tinimbangko ti pirak, balitok, ken dagiti alikamen para iti balay ti Diosmi nga inted ti ari, dagiti mamalbalakadna, prinsipena, ken ti amin nga Israelita nga adda idi sadiay.+
26 Dagitoy ti tinimbang ken intedko kadakuada: 650 a talento* a pirak, 100 nga alikamen a pirak nga aggatad iti 2 a talento, 100 a talento a balitok,
27 20 a babassit a balitok a malukong nga aggatad iti 1,000 a darik,* ken 2 a dekalidad ken nasileng a gambang nga alikamen a kas kapateg ti balitok.
28 Kinunak kadakuada: “Nasantuankayo ken Jehova,+ kasta met dagiti alikamen. Ti pirak ken balitok ket boluntario a daton ken Jehova a Dios dagidi ammayo.
29 Bantayanyo a naimbag agingga a matimbangyo dagita iti sanguanan dagiti panguluen a papadi, dagiti Levita, ken prinsipe dagiti pamilia iti Israel idiay Jerusalem,+ sa maikabil kadagiti siled a pagidulinan* iti balay ni Jehova.”
30 Ket innala dagiti papadi ken Levita ti pirak ken balitok ken dagiti alikamen a natimbang iti sanguananda, tapno maikabilda iti balay ti Dios idiay Jerusalem.
31 Iti maika-12 nga aldaw ti umuna a bulan,+ pimmanawkami iti karayan nga Ahava+ ket nagturongkami idiay Jerusalem. Inwanwannakami ti Diosmi ken sinalaknibannakami kadagiti kabusormi ken kadagiti mangtambang kadakami iti dalan.
32 Nakadanonkami idiay Jerusalem+ ket nagtalinaedkami sadiay iti tallo nga aldaw.
33 Iti maikapat nga aldaw, tinimbangmi ti pirak, balitok, ken dagiti alikamen iti balay ti Diosmi+ ket intedmi ken Meremot+ nga anak ni Uria a padi, kaduana ni Eleazar nga anak ni Finehas ken dagiti Levita a da Jozabad+ nga anak ni Jesua ken ni Noadias nga anak ni Binui.+
34 Nabilang ken natimbang amin dagita sa nairekord ti timbangda.
35 Dagidiay nagsubli a dati a naipanaw ket nangipaay iti Dios ti Israel kadagiti daton a mapuoran, 12 a kalakian a baka+ para iti intero nga Israel, 96 a kalakian a karnero,+ 77 a kalakian nga urbon a karnero, ken 12 a kalakian a kalding+ kas daton gapu iti basol. Amin dagitoy ket daton a mapuoran para ken Jehova.+
36 Kalpasanna, intedmi dagiti bilin ti ari+ kadagiti satrapa* ti ari ken kadagiti gobernador iti Labes ti Karayan,*+ ket tinulonganda dagiti umili ken sinuportaranda ti balay ti pudno a Dios.+
Footnotes
^ Wenno “Netineo.” Lit., “dagidiay naipaay.”
^ Wenno “Netineo.” Lit., “dagidiay naipaay.”
^ Wenno “siled a panganan.”
^ Titulo a kaipapananna ti “mangsalsalaknib iti pagarian.” Tumukoy kadagiti gobernador kadagiti probinsia ti Imperio ti Persia.
^ Wenno “Laud ti Eufrates.”
