Esdras 9:1-15
9 Idi nalpasen dagitoy, immasideg kaniak dagiti prinsipe ket kinunada: “Dagiti umili ti Israel ken dagiti papadi ken Levita makilanglangenda pay laeng kadagiti Canaanita, Heteo, Perizeo, Jebuseo, Ammonita, Moabita, Egipcio,+ ken Amoreo,+ ket tultuladenda pay dagiti narugit nga aramidda.+
2 Innalada ti dadduma nga annak a babbai dagita a nasion kas assawada ken assawa dagiti annakda.+ Isu a ti nasantuan a kaputotan*+ ket nalaokan kadagiti tattao dagita a nasion.+ Dagiti prinsipe ken opisial ti kangrunaan a nagbasol iti daytoy.”
3 Idi nangngegko daytoy, pinisangko dagiti badok ket pinarutko ti sumagmamano a buok ken barbasko, ket nagtugawak a nakamulengleng.
4 Inaribungbongandak ti amin nga addaan panagraem* iti sasao ti Dios ti Israel gapu iti di kinamatalek dagiti dati a napagtalaw, bayat a nakatugawak a nakamulengleng agingga a dimteng ti pannakaidaton dagiti bukbukel iti rabii.+
5 Iti tiempo a pannakaidaton ti bukbukel iti rabii,+ timmakderak iti ayanko nga agladladingit ken nakasuot pay laeng dagiti napisang a badok. Nagparintumengak ket inngatok dagiti imak ken Jehova a Diosko.
6 Ket kinunak: “O Diosko, mabainak unay a tumangad kenka, O Diosko, ta nakaad-adu dagiti basolmi nga uray la dumanon sadi langit.+
7 Idi pay tiempo dagidi ammami agingga ita, nagadun ti basolmi.+ Gapu kadagiti biddutmi, nayawatkami, agraman dagiti ar-ari ken papadimi, kadagiti ar-ari ti dadduma a nasion. Napapataykami babaen ti espada,+ naibaludkami,+ naala dagiti sanikuami,+ ken naibabainkami, a kas ita.+
8 Ngem kinaasiannakami iti apagbiit, Jehova a Diosmi, ta pinalubosannakami a makalasat ken agnaed a sitatalged* iti nasantuan a lugarmo.+ Iti kasta, rimmaniag dagiti matami iti ragsak, O Diosmi, ken nakagin-awakami bassit iti pannakaadipenmi.
9 Ta uray no adipenkami,+ saannakami a binaybay-an ti Diosmi tapno saankami nga agtalinaed nga adipen; no di ket impakitaannakami iti napudno nga ayat iti sanguanan dagiti ari ti Persia,+ tapno pumigsakami ket maibangonmi manen ti balay ti Diosmi+ ken matarimaanmi dagiti rebbana ken tapno maipaayannakami iti pader a bato* iti Juda ken Jerusalem.
10 “Ngem kalpasan amin dagitoy, ania ti maibagami, O Diosmi? Ta saanmi a tinungpal dagiti bilin
11 nga intedmo babaen kadagiti propeta nga adipenmo. Kinunam: ‘Saan a nadalus ti daga a tagikuaenyo gapu kadagiti narugit nga aramid dagiti umili ti daga. Pinunnoda dayta kadagiti nagdakes ken narugit nga aramidda.+
12 Gapuna, diyo ited ti annakyo a babbai iti annakda a lallaki, diyo met awaten ti annakda a babbai para iti annakyo a lallaki.+ Dikay mangaramid iti aniaman a mangyeg iti talna ken kinarang-ayda,+ tapno bumilegkayo ken kanenyo ti nasayaat a maapit iti daga ket maipatawidyo dayta kadagiti kaputotanyo iti agnanayon.’
13 Kalpasan ti amin a napasamak kadakami gapu kadagiti dakes nga aramid ken nadagsen a basolmi—ta sika, O Diosmi, saannakami a dinusa sigun iti kadagsen ti basolmi,+ ken pinalubosannakami a makalasat+—
14 sukirenmi kadi manen dagiti bilinmo ket makialiansakami iti tattao a nagdakes ti aramidda babaen ti pannakiasawami kadakuada?+ Saankanto kadi a makapungtot unay kadakami ken dadaelennakami amin, agingga nga awan ti mabati wenno makalasat?
15 O Jehova a Dios ti Israel, nalintegka,+ ta sibibiagkami pay laeng agingga ita. Adtoykami a mangipudno kadagiti basolmi, nupay ammomi a saankami a maikari nga umasideg kenka gapu kadagiti inaramidmi.”+
Footnotes
^ Lit., “bin-i.”
^ Lit., “nga agpigpigerger.”
^ Lit., “inikkankami iti maysa a pasok.”
^ Wenno “mangsalaknib a pader.”
