Exodo 22:1-31
22 “No adda tao a nagtakaw iti maysa a kalakian a baka wenno karnero ket partien wenno ilakona dayta, lima a baka ti isukatna iti maysa a baka ken uppat a karnero ti isukatna iti maysa a karnero.+
2 (“No iti rabii ket matiliwan a serserken ti maysa a mannanakaw+ ti maysa a balay ket makabil ken mapapatay, saan a madusa ti nakapatay kenkuana.
3 Ngem no iti aldaw a mapasamak dayta, madusa ti pimmatay.)
“Rumbeng a bayadanna ti tinakawna. No awan pagbayadna, isu ti mailako kas adipen tapno mabayadanna dagiti tinakawna.
4 No ti tinakawna ket masarakan a sibibiag iti poderna, kalakian man a baka wenno asno wenno karnero, rumbeng a doblienna ti isukatna iti dayta.
5 “No ipaarab ti maysa a tao dagiti animalna iti maysa a talon wenno kaubasan ken bay-anna nga agarabda iti talon ti sabali, rumbeng nga isukatna dagiti kasayaatan nga apit iti bukodna a talon wenno kaubasan.
6 “No agpuor ti maysa a tao ket agkayamkam dayta kadagiti sisiitan ken mapuoran dagiti nagapas wenno di pay nagapas wenno ti talon, rumbeng a bayadanna ti amin a napuoran.
7 “No ipaidulin ti maysa iti padana a tao ti kuarta wenno aniaman a kukuana, ket matakaw dagita iti balay ti nangipaidulinanna, no matiliw ti nagtakaw, doble ti isukatna kadagiti tinakawna.+
8 No saan a matiliwan ti nagtakaw, ti makimbalay ket rumbeng a maidatag iti sanguanan ti pudno a Dios+ tapno maammuan a saan nga isu ti nangala kadagiti impaidulin ti padana a tao.
9 No adda kaso ti dua a tao mainaig iti baka, asno, karnero, bado, wenno aniaman a napukaw gapu ta kuna ti maysa kadakuada a ‘Kukuak daytoy!’ maidatag ti kasoda iti pudno a Dios.+ Asinoman ti sentensiaan ti Dios a nakabasol, doblien dayta a tao ti isublina iti makinkukua.+
10 “No adda nangipaaywan iti asno wenno baka wenno karnero wenno aniaman a taraken nga animal iti padana a tao, ket matay ti animal wenno madangran wenno maipanaw nga awan ti makakitkita,
11 ti nakaipaaywanan ti animal ket rumbeng nga agsapata iti nagan ni Jehova nga awan ti dakes nga inaramidna iti naipaaywan kenkuana. Masapul nga akseptaren dayta ti makinkukua, ken saan nga obligado nga agbayad ti nakaipaaywanan ti animal.+
12 Ngem no natakaw ti animal, masapul nga agbayad iti makinkukua iti dayta.
13 No pinatay ti narungsot nga animal, masapul nga ipakitana ti bangkay ti animal kas ebidensia. Saan nga obligado a mangbayad iti pinatay ti narungsot nga animal.
14 “No buloden ti maysa a tao ti animal ti padana a tao, ket madangran wenno matay dayta a saan a nakita ti makinkukua, obligado ti nangbulod a mangbayad iti dayta.
15 No nakita ti makinkukua ti napasamak iti animal, saan nga agbayad ti bimmulod. Ngem no naabangan ti animal, umdasen ti abang a pagbayadna iti natay nga animal.
16 “No sulisogen ti maysa a lalaki ti maysa a balasang* a saan pay a naitulag a mayasawa ket kaiddaenna, masapul a bayadanna ti sab-ong tapno agbalin nga asawana.+
17 No saan a kayat ti ama ti balasang nga iyasawa ti anakna iti dayta a lalaki, masapul a bayadan ti lalaki ti naikeddeng a gatad ti sab-ong.
18 “Rumbeng a mapapatay ti asinoman a babai a mangkukulam.+
19 “Rumbeng a mapapatay ti asinoman a makidenna* iti animal.+
20 “Rumbeng a mapapatay ti asinoman nga agidaton iti sabali a dios. Ni Jehova laeng ti rumbeng a pagidatonan.+
21 “Diyo maltratuen wenno irurumen ti ganggannaet a residente,+ ta ganggannaetkayo met a residente idi addakayo idiay Egipto.+
22 “Diyo maltratuen ti asinoman a balo a babai wenno awanan ama* nga ubing.+
23 No maltratuenyo latta ket agpaarayat kaniak, denggekto ti panagpakaasina.+
24 Makapungtotakto ken papatayenkayto iti espada, ket mabalonto dagiti assawayo a babbai ken maulila dagiti annakyo.
25 “No pautanganyo iti kuarta ti maysa a napanglaw* kadagiti tattaok, diyo tultuladen dagiti agpapautang nga adda interes ti ipautangda. Pautanganyo ngem awan ti singirenyo nga interesna.+
26 “No alaem ti bado ti padam a tao a kas garantia nga agbayad,*+ masapul nga isublim sakbay a lumnek ti init.
27 Ta dayta laeng ti bado a pagpaimengna iti bagina.* Anianto pay ngarud ti usarenna inton maturog?+ No agpaarayat kaniak, denggekto ta manangngaasiak.*+
28 “Dika agsao iti maikontra iti Dios*+ wenno iti maysa a mangidadaulo* kadakayo.+
29 “Dikay agpangadua a mangted iti daton manipud iti adu nga apityo ken naruay nga arak ken lanayo.+ Masapul nga itedyo kaniak dagiti inauna nga annakyo a lallaki.+
30 Kastoy ti aramidenyo kadagiti baka ken karneroyo:+ Saanyo pay la nga isinsina ti urbon iti inana iti uneg ti pito nga aldaw. Iti maikawalo nga aldaw, itedyonto kaniak.+
31 “Masapul a paneknekanyo a nasantuankayo iti imatangko,+ ken diyo kankanen ti karne ti aniaman a pinatay ti atap nga animal.+ Masapul nga ipuruakyo dagita kadagiti aso.
Footnotes
^ Wenno “birhen.”
^ Tumukoy iti seksual a pannakidenna.
^ Wenno “ulila.”
^ Wenno “marigrigatan.”
^ Wenno “kas pammatalged.”
^ Lit., “kudilna.”
^ Wenno “nakonsiderarak.”
^ Wenno “nga agturay.”
^ Wenno “Dimo padpadaksen ti Dios.”
