Exodo 23:1-33
23 “Dikay agiwaras* iti saan nga agpaypayso a damag.+ Diyo tulongan* ti nakabasol babaen ti panagtestigoyo iti saan a pudno.+
2 Diyo suroten ti kaaduan no agaramidda iti dakes. Diyo met killuen ti hustisia babaen ti panangtedyo iti ulbod a testimonia tapno laeng pagustuanyo ti kaaduan.*
3 Saanyo nga ipakita nga adda pabpaboranyo no maidarum ti napanglaw.+
4 “No makitayo a nakabulos ti baka wenno asno ti kabusoryo, isubliyo kenkuana.+
5 No makitayo a natumba ti asno ti kabusoryo gapu ta nadagsen ti awitna, diyo panawan ken baybay-an. Tulonganyo ti kabusoryo a mangikkat iti awit ti asnona.+
6 “Diyo ipaidam ti hustisia no desisionanyo ti kaso ti maysa a napanglaw.+
7 “Liklikanyo ti ulbod nga akusasion.* Diyo patayen ti awan basolna ken ti nalinteg, ta diak ibilang a nalinteg ti nakillo a tao.*+
8 “Diyo awaten ti pasuksok, ta allilawennakayo ket saankayon a makapanunot iti umiso ken balbaliwanna dagiti desision ti nalinteg a tao.+
9 “Diyo irurumen ti ganggannaet a residente a makipagnanaed kadakayo. Ammoyo ti rikna ti maysa a ganggannaet* ta ganggannaetkayo met idi a residente idiay Egipto.+
10 “Iti innem a tawen, mulaanyo ti dagayo ken urnongenyo dagiti maapit.+
11 Ngem iti maikapito a tawen, diyo mulmulaan ken diyo ap-apiten ti aniaman nga agtubo iti dayta. Bay-anyo nga alaen dayta dagiti napanglaw kadakayo kas taraonda. Aniaman a mabati ket kanen dagiti atap nga animal. Kasta ti aramidenyo iti kaubasan ken kaolibuanyo.
12 “Innem nga aldaw nga agtrabahokayo; ngem iti maikapito nga aldaw, saankayo nga agtrabaho, tapno makainana ti baka ken ti asnoyo agraman ti anak a lalaki ti adipenyo a babai ken ti ganggannaet a residente a makipagnanaed kadakayo.+
13 “Siguraduenyo nga aramiden ti amin nga imbagak kadakayo;+ ket dikay umawag iti nagan dagiti sabali a dios. Saan koma a mangngeg dagita iti ngiwatyo.+
14 “Mamitlo iti makatawen nga agselebrarkayo iti piesta para kaniak.+
15 Selebraranyo ti Piesta ti Tinapay nga Awan Lebadurana.+ Pito nga aldaw a mangankayto iti tinapay nga awan lebadurana kas iti imbilinko kadakayo, iti bulan ti Abib,*+ ta iti dayta a tiempo a rimmuarkayo idiay Egipto. Awan koma ti ima-ima nga umay agparang kaniak.+
16 Selebraranyo met ti Piesta ti Panagani* kadagiti umuna a maapityo kadagiti immulayo iti talon.+ Selebraranyo pay ti Piesta ti Panagurnong* iti ngudo ti tawen, inton urnongenyo dagiti naapityo iti talon.+
17 Kada tawen, masapul a mamitlo nga umay ti amin a lallaki tapno agdaydayawda iti pudno nga Apo a ni Jehova.+
18 “Diyo pakuyogan iti tinapay nga adda lebadurana ti dara ti animal a maidaton kaniak. Diyo met ipabigat ti taba dagiti animal a maidaton kaniak kadagiti piesta.
19 “Ipanyo iti balay ni Jehova a Diosyo dagiti kasayaatan kadagiti umuna a naapityo iti talon.+
“Diyo iluto ti urbon a kalding iti gatas ti inana.+
20 “Mangibaonak iti maysa nga anghel iti sanguananyo+ a mangsalaknib ken mangiturong kadakayo iti lugar nga insaganak para kadakayo.+
21 Denggenyo ti anghel ken agtulnogkayo iti ibagana. Dikay sumuksukir kenkuana ta saannanto a pakawanen dagiti basolyo,+ gapu ta adda kenkuana ti naganko.
22 Ngem no ikagumaanyo ti agtulnog iti timekna ken aramidenyo ti amin nga ibagak, gubatekto dagiti kabusoryo ken busorekto dagiti bumusor kadakayo.
23 Ta addanto iti sanguananyo ti anghelko ken ipannakayto iti daga dagiti Amoreo, Heteo, Perizeo, Canaanita, Heveo, ken Jebuseo, ket ibusekto amin ida.+
24 Dikay agdayaw wenno agserbi kadagiti diosda ken diyo tultuladen dagiti ar-aramidenda.+ Dadaelenyo dagiti rebultoda ken rebbaenyo dagiti sagrado nga adigida.*+
25 Masapul nga agserbikayo ken Jehova a Diosyo,+ ket bendisionannanto ti taraon ken danumyo.+ Saannanto nga ipalubos nga agsakitkayo.+
26 Awanto ti maalisan wenno lupes*+ a babai kadakayo, ket paatiddogekto ti biagyo.
27 “Sakbay pay a makitadakayo, mangngegdanton ti maipapan kaniak isu nga agbutengda,+ ket riribukekto ti amin a tattao a masabatyo, ken pagsanudekto ti amin a kabusoryo gapu iti pannakaabakda.+
28 Mangyegakto iti pagbutnganda* sakbay pay a makadanonkayo,+ ket agtatarayto a pumanaw dagiti Heveo, Canaanita, ken Heteo.+
29 Saankonto pay laeng a pagtalawen ida iti uneg ti makatawen, tapno saan a mabaybay-an ti daga ken saan unay nga umadu dagiti atap nga animal ket dangrandakayo.+
30 In-inutekto a paksiaten ida agingga nga umadukayo ken matagikuayo ti daga.+
31 “Itedkonto kadakayo ti daga manipud iti Nalabaga a Baybay agingga iti baybay dagiti Filisteo ken manipud iti let-ang agingga iti Karayan;*+ agsipud ta itedkonto kadakayo dagiti agnanaed iti daga ket papanawenyonto ida.+
32 Dikay makitulag kadakuada wenno kadagiti diosda.+
33 Diyo pagnaeden ida iti dagayo, tapno saandakayo nga impluensiaan nga agbasol kaniak. No agserbikayo kadagiti diosda, sigurado nga agbalin a silo dayta kadakayo.”+
Footnotes
^ Lit., “agsagap.”
^ Wenno “ayonan.”
^ Wenno “popular a testimonia.”
^ Lit., “a sao.”
^ Wenno “absueltuen ti managdakdakes.”
^ Wenno “Ammoyo ti biag (kararua) ti maysa a ganggannaet.”
^ Naawagan met iti Piesta ti Abong-abong (Tabernakulo).
^ Naawagan met iti Piesta Dagiti Lawas, wenno Pentecostes.
^ Saan nga agsikog.
^ Wenno mabalin a, “makagapu a matarantada, madanaganda.”
^ Kayatna a sawen, ti Eufrates.
