Exodo 25:1-40
25 Kinuna ni Jehova ken Moises:
2 “Ibagam kadagiti Israelita a mangtedda iti kontribusion kaniak. Awatem ti kontribusion a naimpusuan nga ited ti asinoman.+
3 Dagitoy ti awatem a kontribusionda: balitok,+ pirak,+ gambang,+
4 asul a sinulid, purpura a sinulid a delana,* nalabaga a sinulid,* napino a lienso a sinulid, dutdot ti kalding,
5 lalat dagiti kalakian a karnero a natinaan iti nalabaga, lalat ti foka, kayo ti akasia,*+
6 lana para kadagiti lampara,+ lana ti balsamo para iti nasantuan a lana+ ken iti nabanglo nga insienso,+
7 ken onix a batbato ken dadduma a batbato a maikabil iti efod+ ken iti pektoral.+
8 Iyaramidandak iti santuario, ket agnaedakto* iti tengngayo.+
9 Aramidenyo ti tabernakulo ken ti amin nga alikamenna nga eksakto a kapada ti disenio nga ipakitak kadakayo.+
10 “Mangaramidkayo iti lakasa a kayo ti akasia a dua ket kagudua a kasiko* ti kaatiddogna, maysa ket kagudua a kasiko ti kaakabana, ken maysa ket kagudua a kasiko ti kangatona.+
11 Kalupkopanyo iti puro a balitok.+ Kalupkopanyo ti uneg ken ruarna, ken mangaramidkayo iti balitok a dekorasion iti intero nga aglawlawna.+
12 Mangaramidkayo iti uppat a balitok a sinansingsing a pagyusokan ken ikabilyo dagita iti ngato ti uppat a sakana, dua a sinansingsing a pagyusokan iti kannigid a sikiganna ken dua a sinansingsing a pagyusokan iti kannawan a sikiganna.
13 Mangaramidkayo kadagiti assiw a kayo ti akasia ket kalupkopanyo iti balitok.+
14 Iyusokyo dagiti assiw kadagiti sinansingsing iti agsumbangir a sikigan ti Lakasa tapno maawityo dayta.
15 Diyo ik-ikkaten dagiti assiw kadagiti sinansingsing iti sikigan ti Lakasa; masapul nga agtalinaedda iti nakayusokanda.+
16 Ikabilyonto iti uneg ti Lakasa ti itedkonto kadakayo a Testimonia.+
17 “Mangaramidkayo iti kalub a puro a balitok a dua ket kagudua a kasiko ti kaatiddogna ken maysa ket kagudua a kasiko ti kaakabana.+
18 Agusarkayo iti martilio a pagaramid iti dua a kerubin a balitok a maikabil iti agsumbangir a pungto ti kalub.+
19 Aramidenyo dagiti kerubin a maikabil iti dua a pungto, saggaysa iti agsumbangir a pungto ti kalub.
20 Nakaukrad dagiti payakda iti ngatuenda tapno malinongan ti kalub.+ Agsinnangoda ken nakadumogda iti kalub.
21 Ikabilyo ti kalub+ iti rabaw ti Lakasa ket ikabilyonto iti uneg ti Lakasa ti itedkonto kadakayo a Testimonia.
22 Agparangakto kenka sadiay ken makisaritaak kenka manipud iti ngato ti kalub.+ Manipud iti nagbaetan ti dua a kerubin nga adda iti rabaw ti lakasa ti Testimonia, ipakaammokto kenka ti amin nga ibilinko para kadagiti Israelita.
23 “Mangaramidkayo met iti lamisaan+ a kayo ti akasia a dua a kasiko ti kaatiddogna, maysa a kasiko ti kaakabana, ken maysa ket kagudua a kasiko ti kangatona.+
24 Kalupkopanyo iti puro a balitok ket mangaramidkayo iti balitok a dekorasion iti aglawlawna.
25 Mangikabilkayo iti kayo a sangadakulap* ti kaakabana ken dekorasionanyo iti balitok ti intero nga ikingna.
26 Iyaramidanyo dayta iti uppat a pagyusokan a balitok ket ikabilyo dagita iti uppat a suli a nakaikapetan ti uppat a sakana.
27 Dagiti pagyusokan ket masapul nga asideg iti kayo a naikabil iti aglawlaw ti iking ti lamisaan kas pangpatibker kadagiti assiw a pangawit iti dayta.
28 Mangaramidkayo kadagiti assiw a kayo ti akasia ket kalupkopanyo iti balitok ken dagita ti pagawityo iti lamisaan.
29 “Mangaramidkayo met kadagiti pinggan, kopa, agraman kadagiti pitser ken malukongna a pangibukbokanda kadagiti daton nga inumen. Masapul a puro a balitok amin dagita.+
30 Kanayon met a mangikabilkayo iti pamarang a tinapay iti rabaw ti lamisaanko.+
31 “Mangpandaykayo iti kandelero+ a puro a balitok. Ti puon, ungkay, ken sangsangana nga addaan kadagiti sabong, busel, ken petalo* ket mamimpinsan a mapanday.+
32 Iyaramidanyo iti innem a sanga ti agsumbangir a sikigan ti kandelero, tallo a sanga iti kannigid ken tallo iti kannawan.
33 Ti tunggal sanga iti maysa a bangir ket addaan iti tallo a sabong a kasla sabsabong ti almendro, a nabaetbaetan iti busel ken petalo. Kapada dayta ti tunggal sanga ti sabali a bangirna. Kasta ti itsura ti innem a sanga ti kandelero.
34 Iti ungkay ti kandelero ket adda uppat a sabong a kasla sabsabong ti almendro, a nabaetbaetan iti busel ken petalo.
35 Maysa a busel ti adda iti baba ti umuna a dua a sanga manipud iti ungkay. Maysa met a busel iti baba ti sumaganad a dua a sanga, ken maysa a busel iti baba ti sumaganad a dua pay a sanga, para iti innem a sanga manipud iti ungkay.
36 Dagiti busel ken dagiti sanga ken ti intero a kandelero ket puro a balitok a mamimpinsan a mapanday.+ Martilio ti usarenyo a mangaramid iti dayta.
37 Mangaramidkayo iti pito a lamparana, ket no mapasgedan, malawaganda ti disso iti sangona.+
38 Masapul a puro a balitok dagiti sipitna ken dagiti pagikkan iti narunot a pabilo ti silaw.+
39 Maysa a talento* a puro a balitok ti usarenyo a pangaramid iti kandelero ken kadagita nga alikamen.
40 Siguraduem a maaramid dagita a kapada ti disenio nga impakitak kenka iti bantay.+
Footnotes
^ Wenno “delana a natinaan iti lumabaga a purpura.”
^ Nakoloran iti tina ti insekto a coccus.
^ Klase ti akasia a siitan nga agtubo iti desierto.
^ Wenno “agtabernakuloakto.”
^ Iti Ingles, “petal.”
