Exodo 35:1-35
35 Kalpasanna, inummong ni Moises ti amin nga Israelita ket imbagana kadakuada: “Dagitoy ti imbilin ni Jehova nga aramidenyo:+
2 Mabalinyo ti agtrabaho iti innem nga aldaw, ngem ibilangyo a nasantuan ti maikapito nga aldaw, maysa nga espesial nga aldaw ti panaginana para ken Jehova.+ Mapapatay ti asinoman nga agtrabaho iti dayta nga aldaw.+
3 Iti aldaw ti Sabbath, dikay mangpasged iti apuy kadagiti pagnanaedanyo.”
4 Ket kinuna ni Moises iti amin nga Israelita: “Daytoy ti imbilin ni Jehova,
5 ‘Mangtedkayo iti kontribusion para ken Jehova.+ Asinoman nga addaan iti situtulok a puso+ ket mangted koma iti kontribusion para ken Jehova: balitok, pirak, gambang,
6 asul a sinulid, purpura a sinulid a delana, nalabaga a sinulid, napino a lienso a sinulid, dutdot ti kalding,+
7 lalat dagiti kalakian a karnero a natinaan iti nalabaga, lalat ti foka, kayo ti akasia,
8 lana para kadagiti lampara, lana ti balsamo para iti nasantuan a lana ken para iti nabanglo nga insienso,+
9 ken onix a batbato ken dadduma a batbato a maikabil iti efod+ ken iti pektoral.+
10 “‘Umay koma ti amin a nalaing*+ kadakayo ket aramidenda ti amin nga imbilin ni Jehova:
11 ti tabernakulo agraman ti tolda ken ti abbongna, dagiti kawitna ken dagiti hambana, dagiti trangkana, dagiti adigina, ken dagiti batay a pakaisulbongan dagiti adigi;
12 ti Lakasa+ ken dagiti assiwna,+ ti kalub,+ ken ti kortina para iti tabing;+
13 ti lamisaan+ ken dagiti assiwna ken amin nga alikamenna ken ti pamarang a tinapay;+
14 ti kandelero+ ken dagiti alikamenna ken dagiti lamparana ken ti lanada;+
15 ti altar ti insienso+ ken dagiti assiwna; ti nasantuan a lana ken ti nabanglo nga insienso;+ ti tabing* iti ruangan ti tabernakulo;
16 ti altar ti daton a mapuoran+ ken ti gambang a parilia, dagiti assiwna ken amin nga alikamenna; ti palanggana ken ti pagbatayanna;+
17 dagiti kortina iti paraangan,+ dagiti adigina ken dagiti batay a pakaisulbongan dagiti adigi; ti tabing* iti ruangan ti paraangan;
18 dagiti pasok ti tabernakulo ken dagiti pasok ti paraangan ken dagiti galutda;+
19 dagiti napintas a naabel a bado+ nga usaren dagiti agserbi iti santuario, dagiti nasantuan a bado ni Aaron+ a padi, ken dagiti bado ti annakna nga agserbi kas papadi.’”
20 Kalpasanna, pimmanawen ti amin nga Israelita iti sanguanan ni Moises.
21 Ket immay ti amin a situtulok a mangted. Naimpusuan nga inyegda+ dagiti kontribusionda para ken Jehova a mausar para iti tolda a pagkonsultaan ken iti panagserbi iti dayta ken para kadagiti nasantuan a bado.
22 Kanayon nga immay dagiti lallaki ken babbai nga addaan iti situtulok a puso a nangyeg kadagiti mayaspili nga arkos, aritos, singsing, ken dadduma pay nga alahas agraman ti amin a kita ti aruaten a balitok. Aminda ket nangted ken Jehova kadagiti daton* a balitok.+
23 Nangted met ti amin nga addaan iti asul a sinulid, purpura a sinulid a delana, nalabaga a sinulid, napino a lienso a sinulid, dutdot ti kalding, lalat dagiti kalakian a karnero a natinaan iti nalabaga, ken lalat ti foka.
24 Amin nga addaan iti pirak ken gambang inyegda dagita a kontribusion para ken Jehova. Kasta met ti inaramid ti amin nga addaan iti kayo ti akasia tapno mausar dagita iti aniaman a trabaho iti tabernakulo.
25 Amin a nalaing* a babbai+ ket manomano a nagaramid kadagiti sinulid,* ket inyegda dagiti inaramidda nga asul a sinulid, purpura a sinulid a delana, nalabaga a sinulid, ken napino a lienso a sinulid.
26 Nagboluntario met ti amin a nalaing a babbai a mangaramid kadagiti sinulid manipud kadagiti dutdot ti kalding.
27 Dagiti panguluen ket nangyeg met kadagiti onix a batbato ken dadduma a batbato a maikabil iti efod ken iti pektoral.+
28 Nangyegda pay iti lana ti balsamo ken lana dagiti silaw, nasantuan a lana,+ ken para iti nabanglo nga insienso.+
29 Amin a lallaki ken babbai a situtulok a mangted ket nangyeg kadagiti kasapulan iti trabaho nga imbilin ni Jehova ken Moises a maaramid; inyeg dayta dagiti Israelita kas boluntario a daton para ken Jehova.+
30 Kalpasanna, kinuna ni Moises kadagiti Israelita: “Pinili ni Jehova ni Bezalel nga anak ni Uri ken apoko ni Hur iti tribu ni Juda.+
31 Inikkan ti Dios iti espirituna tapno maaddaan iti sirib, pannakaawat, pannakaammo, ken kinasigo iti amin a kita ti trabaho,
32 iti panagdisenio, iti panagsukog iti balitok, pirak, ken gambang,
33 iti panagtabas ken panagimontar kadagiti napateg a bato, ken iti panagaramid iti amin a kita ti napintas nga alikamen a kayo.
34 Ni Bezalel agraman ni Oholiab+ nga anak ni Ahisamac iti tribu ni Dan ket inikkan ti Dios iti abilidad a mangisuro.
35 Inikkanna ida iti laing*+ nga agaramid iti amin a kita ti trabaho, agborda, agabel nga agusar kadagiti asul a sinulid, purpura a sinulid a delana, nalabaga a sinulid, ken napino a lienso a sinulid, ken agdisenio iti lupot. Dagita a lallaki ti mangaramid iti amin a kita ti trabaho ken mangisagana iti amin a kita ti disenio.
Footnotes
^ Lit., “masirib ti pusona.”
^ Wenno “kortina.”
^ Wenno “kortina.”
^ Wenno “daton a mailili.”
^ Lit., “masirib ti pusona.”
^ Wenno “nagtibbi.”
^ Lit., “kinasirib ti puso.”
