Exodo 5:1-23
5 Kalpasanna, napan da Moises ken Aaron ken ni Faraon ket kinunada: “Kastoy ti kinuna ni Jehova a Dios ti Israel, ‘Palubosam dagiti tattaok a mapan idiay let-ang tapno agpiestada para kaniak.’”
2 Ngem kinuna ni Faraon: “Asino koma ni Jehova+ tapno tungpalek ti imbagana a palubosak ti Israel?+ Diak pulos am-ammo ni Jehova ken maysa pay, diakto palubosan ti Israel.”+
3 Ngem kinunada: “Kinasaritanakami ti Dios dagiti Hebreo. Pangngaasim ta palubosannakami nga agdaliasat iti tallo nga aldaw a mapan idiay let-ang tapno agdatonkami ken Jehova a Diosmi;+ ta no saan, pagsakiten wenno ipapataynakami kadagiti kabusormi.”
4 Insungbat ti ari ti Egipto kada Moises ken Aaron: “Apay a pasardengenyo dagiti tattao iti trabahoda? Inkay ketdin ituloy dagiti obrayo!”+
5 Ket intuloy ni Faraon: “Nakaad-adun ti padayo nga Israelita ditoy Egipto. Sa ita, kayatyo nga isardengda ti agtrabaho?”
6 Iti dayta met la nga aldaw, imbilin ni Faraon kadagidiay mangidadaulo kadagiti trabahador ken kadagiti opisialda:
7 “Saanyon nga ikkan dagitoy a tattao iti garami a pagaramidda kadagiti ladrilio.+ Bay-anyo nga isudan ti agurnong.
8 Ngem ipaaramidyo latta kadakuada ti isu met la a bilang dagiti ladrilio a sigud nga ar-aramidenda. Diyo kiskissayan, ta sadutda. Dayta ti makagapu nga ipakpakaasida, ‘Kayatmi ti mapan, kayatmi ti agdaton iti Diosmi!’
9 Nayonanyo pay ketdi ti trabahoda tapno adu ti aramidenda ken awan tiempoda a dumngeg kadagiti ulbod a kari.”
10 Isu a dagiti mangidadaulo kadagiti trabahador+ ken dagiti opisialda ket napan kadagiti umili ken kinunada: “Imbaga ni Faraon, ‘Saankayon nga ikkan iti garami.
11 Dakayon a mismo ti mapan agbirok iti usarenyo a garami, ngem saan a pulos a makissayan ti trabahoyo.’”
12 Isu a nagsursor dagiti Israelita iti intero nga Egipto tapno agurnongda iti garami manipud kadagiti naggapasan.
13 Ket kanayon a dagdagen ida dagidiay mangidadaulo kadakuada nga ibagbagada: “Leppasenyo dagiti trabahoyo iti kada aldaw, kas idi maik-ikkankayo pay iti garami.”
14 Idi agangay, dagiti mangidadaulo kadagiti trabahador kinabkabilda dagiti Israelita nga opisial+ ket insaludsodda kadakuada: “Apay a diyo naaramid idi kalman ken ita nga aldaw ti eksakto a bilang dagiti ladrilio a masapul nga ileppasyo kas iti sigud?”
15 Isu a nagreklamo ken Faraon dagiti opisial dagiti Israelita: “Apay a kastoy ti panangtratom kadagiti adipenmo?
16 Awan la ngaruden ti mait-ited a garami kadakami ngem kaskasdi nga ibagbagada kadakami, ‘Agaramidkayo kadagiti ladrilio!’ Dakami ti makabkabil idinto ta dagiti tattaom ti makimbasol.”
17 Ngem kinuna ni Faraon: “Sadutkayo, sadut!+ Dayta ti makagapu nga ibagbagayo a kayatyo ti mapan agdaton ken Jehova.+
18 Inkay ketdin agtrabaho! Awan ti maited a garami kadakayo ngem masapul latta a malpasyo ti eksakto a bilang dagiti ladrilio.”
19 Nakita dagiti opisial dagiti Israelita a saan a nasayaat ti kasasaadda gapu iti daytoy a bilin: “Masapul a saan a maksayan ti eksakto a bilang dagiti ladrilio a rumbeng nga ileppasyo.”
20 Kalpasan dayta, nasabatda da Moises ken Aaron a mangur-uray kadakuada idi naggapuda ken Faraon.
21 Dagus a kinunada kadakuada: “Kitkitaennakayo ni Jehova ket sapay koma ta dusaennakayo. Gapu kadakayo, kagurguranakamin ni Faraon ken dagiti adipenna ket kayatdakami payen a patayen.”+
22 Imbaga ni Moises ken Jehova: “Jehova, apay a parparigatem dagitoy a tattao? Apay nga imbaonnak?
23 Manipud idi napanak ken Faraon tapno agsaoak iti naganmo,+ dimmakesen ti panangtratona kadakuada+ ket saanmo man la a pulos insalakan dagiti tattaom.”+
