Genesis 35:1-29
35 Kalpasanna, kinuna ti Dios ken ni Jacob: “Mapanka idiay Bethel+ ket agnaedka sadiay, ket mangaramidka iti altar para iti pudno a Dios a nagparang kenka idi intarayam ni Esau a kabsatmo.”+
2 Gapuna, kinuna ni Jacob iti sangakabbalayanna ken iti amin a naikuyog kenkuana: “Ibellengyo ti amin a didiosenyo+ ket dalusanyo ti bagiyo ken sukatanyo dagiti badoyo.
3 Mapantayo idiay Bethel ket mangaramidak sadiay iti maysa nga altar para iti pudno a Dios a nangipangag iti kararagko idi aldaw a panagrigatko ken mangtultulong kaniak iti sadinoman* a papanak.”+
4 Iti kasta, intedda ken Jacob ti amin a didiosenda ken dagiti aritos iti lapayagda, ket inkali* ni Jacob dagita iti sirok ti dakkel a kayo iti asideg ti Sikem.
5 Idi pimmanawda, pinagbuteng ti Dios dagiti siudad iti aglawlawda isu a saanda a kinamat dagiti annak ni Jacob.
6 Idi agangay, nakadanon ni Jacob ken ti amin a kakaduana idiay Luz,+ wenno Bethel, iti Canaan.
7 Nangaramid sadiay iti altar ket pinanagananna dayta a disso iti El-bethel,* gapu ta nagparang ti pudno a Dios kenkuana sadiay idi intarayanna ti kabsatna.+
8 Idi agangay, natay ni Debora+ a nangay-aywan ken Rebecca ket naitabon iti asideg ti Bethel iti sirok ti kayo a roble. Gapuna, pinanagananna dayta iti Alon-bakut.*
9 Nagparang manen ti Dios ken ni Jacob kalpasan ti panagsublina manipud Padan-aram ket binendisionanna.
10 Kinuna ti Dios kenkuana: “Jacob ti naganmo.+ Saanton a Jacob ti naganmo no di ket Israel.” Ket rinugian ti Dios nga awagan iti Israel.+
11 Kinuna pay ti Dios: “Siak ti Dios a Mannakabalin-amin.+ Agpaaduka. Agbalinkanto nga ama ti adu a nasion ken agtaudto kenka* dagiti ari.+
12 Itedkonto kenka ken iti kaputotam* ti daga nga intedko kada Abraham ken Isaac.”+
13 Kalpasanna, pimmanawen ti Dios iti lugar a nakisaritaanna ken Jacob.
14 Gapuna, nangaramid ni Jacob iti monumento iti disso a nakisaritaan kenkuana ti Dios, ket binukbokanna dayta iti daton nga inumen ken lana.+
15 Intultuloy nga inawagan ni Jacob iti Bethel+ ti disso a nakisaritaan kenkuana ti Dios.
16 Kalpasanna, pimmanawda idiay Bethel. Adayoda pay laeng idiay Efrat idi narikna ni Raquel nga aganaken, ket narigatan unay iti panagpasikalna.
17 Bayat a marigrigatan nga aganak, kinuna ti partera: “Dika madanagan ta maaddaanka iti sabali pay nga anak a lalaki.”+
18 Sakbay a nagsat ti angesna (ta matmatay idin), pinanagananna ti ubing iti Ben-oni,* ngem pinanaganan ni Jacob iti Benjamin.*+
19 Natay ni Raquel ket naitabon iti igid ti dalan nga agturong idiay Efrat, wenno Betlehem.+
20 Nangaramid ni Jacob iti monumento iti rabaw ti tanemna. Daytoy ti monumento ti tanem ni Raquel agingga ita.
21 Intuloy ni Israel ti nagdaliasat ket nagtolda iti labes ti torre ti Eder.
22 Naminsan, bayat ti panagnaed ni Israel iti dayta a lugar, dinennaan ti anakna a ni Ruben ni Bilha a sabali pay nga asawa ni amana, ket naammuan dayta ni Israel.+
Iti kasta, naaddaan ni Jacob iti 12 nga annak a lallaki.
23 Ti annakna ken Lea ket ni Ruben nga inauna,+ ni Simeon, Levi, Juda, Isacar, ken Zabulon.
24 Ti annakna ken Raquel ket da Jose ken Benjamin.
25 Ti annakna ken Bilha, nga adipen ni Raquel, ket da Dan ken Neftali.
26 Ti annakna ken Zilpa, nga adipen ni Lea, ket da Gad ken Aser. Dagitoy ti annak a lallaki ni Jacob a nayanak idiay Padan-aram.
27 Idi agangay, nakadanon ni Jacob iti ayan ni Isaac nga amana idiay Mamre,+ idiay Kiriat-arba, wenno Hebron, a nagnaedan idi ni Abraham ken ni Isaac kas ganggannaet.+
28 Nagbiag ni Isaac iti 180 a tawen.+
29 Kalpasanna, natay ket naitipon kadagiti kailianna.* Lakay unay idin ken napnek a nagbiag,* ket intabon da Esau ken Jacob nga annakna.+
Footnotes
^ Wenno “dalan.”
^ Wenno “inlemmeng.”
^ Kaipapananna, “Ti Dios ti Bethel.”
^ Kaipapananna, “Roble ti Panagdung-aw.”
^ Lit., “rummuarto kadagiti lomom.”
^ Lit., “bin-im.”
^ Kaipapananna, “Anak ti Panagladingitko.”
^ Kaipapananna, “Anak ti Makannawan nga Ima.”
^ Naindaniwan a sasao para iti ipapatay.
^ Lit., “lakayen ken aduanen iti aldaw.”
