Genesis 39:1-23
39 Impan dagiti Ismaelita+ ni Jose idiay Egipto,+ ket ginatang ni Potifar,+ maysa nga opisial ti palasio ni Faraon ken panguluen dagiti guardia.
2 Ngem adda idi ni Jehova ken ni Jose.+ Kas resultana, nagballigi ken nadutokan a mangaywan iti balay ti amona nga Egipcio.
3 Nadlaw ti amona nga adda kenkuana ni Jehova ken tultulongan ni Jehova nga agballigi iti amin nga aramidenna.
4 Naay-ayo ni Potifar ken ni Jose ket pinagbalinna a personal a katulonganna. Intalekna kenkuana ti balayna ken ti amin a kukuana.
5 Manipud idin, binembendisionan ni Jehova ti balay ti Egipcio gapu ken Jose. Pinaadu pay ni Jehova ti amin nga adda iti balayna ken iti talonna.+
6 Idi agangay, impabiangnan ken Jose ti amin ket awanen ti pakaseknanna malaksid iti kanenna. Kabayatanna, dimmakkel ni Jose a naguapo ken nabaked.
7 Di nagbayag, nagkursonada ken Jose ti asawa ti amona ket kinunana: “Dennaannak.”
8 Nagkedked ni Jose ket kinunana iti asawa ti amona: “Awanen ti pakaseknan ti apok iti balayna gapu ta addaak, ken intalekna kaniak ti amin.
9 Awan ti nangatngato ngem siak iti daytoy a balay, ken awan ti impaidamna kaniak malaksid kenka gapu ta asawanaka. Isu nga apay koma nga aramidek daytoy nakaro a kinadakes ket agbasolak iti Dios?”+
10 Inaldaw nga allukoyenna ni Jose ngem saan a kinayat ni Jose ti makidenna wenno makikadua kenkuana.
11 Ngem maysa nga aldaw, idi mapan ni Jose iti balay tapno aramidenna ti trabahona, nairana nga awan dagiti adipen iti balay.
12 Pagammuan ta ginammatan ti babai ti bado ni Jose sa kinunana: “Dennaannak!” Nagtaray a rimmuar ni Jose ngem nabati ti kagayna.
13 Idi nakita ti babai a nabati ni Jose ti kagayna idi nagtaray,
14 pinukkawanna dagiti lallaki iti balayna ket kinunana: “Kayatnatayo nga ibabain daytoy a Hebreo nga insangpet ti asawak! Kayatnak a dennaan, ngem nagikkisak.
15 Idi nangngegna a nagikkisak, nagtaray a rimmuar ngem nabatina ti kagayna iti abayko.”
16 Kalpasanna, saanna nga inikkat iti abayna ti kagay ni Jose agingga a simmangpet ni Potifar nga amo ni Jose.
17 Kasta met laeng ti imbagana ken Potifar: “Kayatnak nga ibabain ti Hebreo nga adipen nga insangpetmo.
18 Ngem idi nagikkisak, nagtaray ket nabatina ti kagayna iti abayko.”
19 Kasta unay ti pungtot ni Potifar idi nangngegna nga imbaga ti asawana: “Kastoy ti inaramid kaniak ti adipenmo.”
20 Gapuna, impaaresto ken impaibaludna ni Jose iti lugar a pakaipupokan dagiti balud ti ari, ket sadiay a nagtalinaed ni Jose.+
21 Ngem nagtultuloy nga adda ni Jehova ken ni Jose. Agtultuloy a pinakitaanna iti napudno nga ayat ken binendisionanna tapno maay-ayo kenkuana ti panguluen nga opisial ti pagbaludan.+
22 Gapuna, ti panguluen nga opisial ti pagbaludan impabiangna ken Jose ti panangidaulo iti amin a balud ken isu ti mangibaga no ania ti aramidenda.+
23 Saan a nakibiang ti panguluen nga opisial ti pagbaludan iti aniaman a naitalek ken Jose ta adda ni Jehova kenkuana ken pagbalballigien ni Jehova ti aniaman nga aramidenna.+
