Haggeo 1:1-15
1 Iti maikadua a tawen ti panagturay ni Ari Dario, iti umuna nga aldaw ti maikanem a bulan, imbilin ni Jehova ken propeta Haggeo*+ nga ibagana daytoy iti gobernador ti Juda a ni Zerubabel+ nga anak ni Sealtiel, ken iti nangato a padi a ni Josue nga anak ni Jehozadak:
2 “Kuna ni Jehova a panguluen dagiti armada, ‘Ibagbaga dagitoy a tattao: “Saan pay a tiempo a maibangon* ti balay* ni Jehova.”’”+
3 Impaibaga pay ni Jehova ken propeta Haggeo:+
4 “Tiempo kadi ita nga agyankayo kadagiti balayyo a napintas dagiti didingna, idinto ta marmarba ti balayko?+
5 Ita, daytoy ti kuna ni Jehova a panguluen dagiti armada, ‘Panunotenyo dagiti ar-aramidenyo.
6 Adu a bukel ti immulayo ngem bassit ti maapityo.+ Mangmangankayo ngem saankayo a mabsog. Umin-inumkayo ngem saankayo a mapnek. Agbadokayo ngem saankayo a maimengan. Abut-abut a pitaka ti pangikabilan ti trabahador iti sueldona.’”
7 “Daytoy ti kuna ni Jehova a panguluen dagiti armada, ‘Panunotenyo dagiti ar-aramidenyo.’
8 “‘Sumang-atkayo iti bantay ket mangalakayo kadagiti tarikayo.+ Bangonenyo ti balayko+ tapno maragsakanak ken maidayawak,’+ kuna ni Jehova.”
9 “‘Nagadu idi ti namnamaenyo ngem bassit ti maaw-awatyo; ket idi inserrekyo dayta iti balayko, pinuyotak ket naitayab.+ Apay?’ kuna ni Jehova a panguluen dagiti armada. ‘Gapu ta marmarba ti balayko, idinto ta dagiti laeng balayyo ti as-asikasuenyo.+
10 Isu a saan a nangyeg ti langit iti linnaaw ken saan a nangted ti daga iti apit.
11 Pinagtikagko ti dagayo ken ti bambantay, isu a bassit ti bukbukel, arak, lana, ken mulmula. Agrigrigatkayo ken uray dagiti tarakenyo, ket awan serserbi ti amin a panagbannogyo.’”
12 Ni Zerubabel+ nga anak ni Sealtiel,+ ken ti nangato a padi a ni Josue nga anak ni Jehozadak,+ ken ti amin a tattao ket impangagda ni Jehova a Diosda ken dagiti imbaga ni propeta Haggeo gapu ta imbaon ni Jehova a Diosda. Impakita dagiti tattao ti panagbutengda gapu ken Jehova.
13 Kalpasanna, imbaga ni Haggeo a mensahero ni Jehova daytoy a mensahe maitunos iti nangibaonan kenkuana ni Jehova: “‘Addaak kadakayo,’+ kuna ni Jehova.”
14 Isu a tinignay ni Jehova ti puso+ ti gobernador ti Juda+ a ni Zerubabel nga anak ni Sealtiel, ken ti nangato a padi a ni Josue+ nga anak ni Jehozadak, ken ti amin a nabati nga umili. Immayda nagtrabaho para iti balay ti Diosda a ni Jehova a panguluen dagiti armada.+
15 Napasamak dayta idi maika-24 nga aldaw ti maikanem a bulan iti maikadua a tawen ti panagturay ni Ari Dario.+
