Haggeo 2:1-23
2 Iti maika-21 nga aldaw iti maikapito a bulan, imbaga ni Jehova ken propeta Haggeo:+
2 “Pangngaasim ta isaludsodmo iti gobernador ti Juda+ a ni Zerubabel+ nga anak ni Sealtiel, ken iti nangato a padi a ni Josue+ nga anak ni Jehozadak,+ ken iti amin nga umili:
3 ‘Asino kadakayo ti nakakita iti kinadayag idi daytoy a balay?*+ Ania ti makitayo a kasasaadna itan? Panagkunayo, naiduma kadin no ikompara idi?’+
4 “‘Ngem ita agbalinka a natured, Zerubabel,’ kuna ni Jehova, ‘ken agbalinka a natured, Josue a nangato a padi nga anak ni Jehozadak.’
“‘Ken agbalinkayo a natured, dakayo amin nga umili iti daga,’+ kuna ni Jehova, ‘ket agtrabahokayo.’
“‘Ta addaak kadakayo,’+ kuna ni Jehova a panguluen dagiti armada.
5 ‘Laglagipenyo ti inkarik kadakayo idi pimmanawkayo idiay Egipto,+ ken nagtalinaed kadakayo ti espirituk.*+ Dikay agbuteng.’”+
6 “Ta imbaga ni Jehova a panguluen dagiti armada, ‘Ngem maminsan pay—saanen a mabayag—ket gunggonekto ti langit, daga, baybay, ken ti namaga a daga.’+
7 “‘Ken gunggonekto ti amin a nasion, ket sumrekto dagiti napateg* a bambanag manipud iti amin a nasion.+ Punnuekto iti dayag daytoy a balay,’+ kuna ni Jehova a panguluen dagiti armada.
8 “‘Kukuak ti pirak, ken kukuak ti balitok,’ kuna ni Jehova a panguluen dagiti armada.
9 “‘Nadaydayagto daytoy a balay ngem iti dati,’+ kuna ni Jehova a panguluen dagiti armada.
“‘Ken pagbalinekto a natalna daytoy a lugar,’+ kuna ni Jehova a panguluen dagiti armada.”
10 Iti maika-24 nga aldaw iti maikasiam a bulan, iti maikadua a tawen ti panagari ni Dario, imbaga ni Jehova ken propeta Haggeo:+
11 “Daytoy ti imbaga ni Jehova a panguluen dagiti armada, ‘Pangngaasim ta isaludsodmo kadagiti padi ti maipapan iti linteg:+
12 “No adda maysa a tao a nangisab-ok iti nasantuan a karne iti badona, ket naisagid ti badona iti tinapay wenno iti nadiguan a bukbukel wenno iti arak wenno iti lana wenno iti aniaman a makan, agbalinto pay kadi a nasantuan?”’”
Simmungbat dagiti padi: “Saan!”
13 Insaludsod pay ni Haggeo: “No ti maysa a naibilang a narugit gapu ta nakasagid iti bangkay* ket naiggamanna ti aniaman kadagitoy a banag, agbalinto kadi a narugit?”+
Simmungbat dagiti padi: “Agbalinto a narugit.”
14 Isu nga imbaga ni Haggeo: “‘Kasta dagitoy a tattao, ken kasta daytoy a nasion iti sanguanak,’ kuna ni Jehova, ‘ken kasta ti amin nga ar-aramidenda; narugit ti aniaman nga idatonda sadiay.’
15 “‘Ngem manipud ita, pangngaasiyo ta panunotenyo daytoy: Sakbay a nangrugi a naibangon manen ti templo ni Jehova,+
16 ania idi ti kasasaadna? Idi adda napan iti maysa a bunton ti bukbukel ken nangnamnama a makaala iti 20 a basket, 10 laeng a basket ti naalana; ken idi adda napan iti tangke ti arak tapno mangala iti 50 a botelia, 20 laeng ti naalana.+
17 Nangyegak iti makasinit a pudot, buot,+ ken uraro a nangdadael iti amin nga inaramidyo, ngem awan kadakayo ti nagsubli kaniak,’ kuna ni Jehova.
18 “‘Ngem manipud ita, pangngaasiyo ta panunotenyo daytoy, manipud iti maika-24 nga aldaw iti maikasiam a bulan, iti aldaw a naikabil ti pundasion ti templo ni Jehova;+ panunotenyo daytoy:
19 Adda pay laeng aya bin-i iti bodega?*+ Saan kadi nga awan pay bunga ti ubas, higos, granada, ken olibo? Ngem manipud ita, bendisionankayto.’”+
20 Iti maikadua a gundaway, imbaga ni Jehova ken Haggeo idi maika-24 nga aldaw ti bulan:+
21 “Ibagam ken Zerubabel a gobernador ti Juda, ‘Gunggonekto ti langit ken daga.+
22 Balintuagekto ti trono dagiti pagarian ken ikkatekto ti pannakabalin dagiti pagarian dagiti nasion;+ ken balintuagekto ti karuahe ken dagiti nakasakay, ken matayto dagiti kabalio ket agpipinnataydanto iti espada.’”+
23 “‘Iti dayta nga aldaw,’ kuna ni Jehova a panguluen dagiti armada, ‘alaenkanto, adipenko a Zerubabel+ nga anak ni Sealtiel,’+ kuna ni Jehova, ‘ket pagbalinenka a kas iti pangselio a singsing, ta sika ti pinilik,’ kuna ni Jehova a panguluen dagiti armada.”
Footnotes
^ Wenno “templo.”
^ Wenno mabalin a, “ken idi agtaktakder ti espirituk iti tengngayo.”
^ Wenno “matarigagayan.”
^ Wenno “pagikabilan iti bukbukel?”
