Isaias 13:1-22
13 Ti mensahe maibusor iti Babilonia+ a nasirmata ni Isaias+ nga anak ni Amoz:
2 “Ipangatoyo ti senial*+ iti nabato a bantay.
Ayaban ken payapayanyo ida,Tapno umayda kadagiti ruangan dagiti natan-ok.
3 Binilinko dagidiay dinutokak.*+
Inayabak dagiti mannakigubatko a mangyebkas iti pungtotko,Sipapannakkel a nagragsakda.
4 Denggenyo! Adda maysa a grupo iti bambantay;Kasla ariwawa ti adu a tattao!
Denggenyo! Ti ariwawa dagiti pagarian,Dagiti nasion a naguummong!+
Um-ummongen ni Jehova a panguluen dagiti armada dagiti makigubat.+
5 Manipud iti adayo a daga,+Iti ungto dagiti langit,Um-umay ni Jehova ken dagiti armas ti pungtotna,Tapno dadaelenna ti intero a daga.+
6 Agdung-awkayo ta asidegen ti aldaw ni Jehova!
Umayto mangdadael ti Mannakabalin-amin.+
7 Isu nga agkapuyto ti amin nga ima,Ken mapukawto ti tured ti tunggal tao.+
8 Agdanag dagiti tattao.+
Agpigerger ken agpaut-otda,Kas iti agpaspasikal a babai.
Agkikinnitada a mabutbuteng,Ket lumablabbaga ti rupada iti danagda.
9 Adtoy! Um-umayen ti aldaw ni Jehova,Naranggas ken addaan iti umap-apuy nga unget ken saan a mangngaasi,Tapno agbalin ti daga a pagbutbutngan,+Ken maibus dagiti managbasol iti dayta.
10 Ta saanto nga agraniagDagiti bituen ti langit ken dagiti konstelasionda;*+Agsipngetto ti sumingsingising nga init,Ken saanto nga agsilnag ti bulan.
11 Dusaekto ti lubong gapu iti kinadakesna,+Ken dagiti dakes gapu iti basolda.
Pagpatinggaekto ti kinatangsit dagiti napangas,Ken ipababakto ti kinapasindayag dagiti mangirurumen.+
12 Pagbalinekto nga ad-adu ti napasudi a balitok ngem ti tao,+Ken ti balitok ti Ofir ngem dagiti tattao.+
13 Isu nga agpigergerto dagiti langit,Ket magunggonto ti daga ken maikkat iti ayanna+Gapu iti unget ni Jehova a panguluen dagiti armada iti aldaw ti umap-apuy a pungtotna.
14 Agkamangto ti tunggal maysa iti dagana.Agsublinto ti tunggal maysa iti ilina,+Kas iti maan-anup a gasela ken kas kadagiti animal nga awan ti pastorna.
15 Maduyokto ti asinoman a masarakan,Ket mapapatay iti espada ti asinoman a matiliw.+
16 Maputedputedto dagiti annakda iti sangoda,+Maalanto ti nagyan dagiti balayda,Ken maramesto ti assawada.
17 Tignayek a bumusor kadakuada dagiti Medo,+A mangibilang nga awan serserbi ti pirakKen saanda a pagan-ano ti balitok.
18 Dadaelento ti panada dagiti agtutubo a lallaki;+Saandanto a kaasian dagiti maladagaWenno dagiti ubbing.
19 Ti Babilonia, ti kadayagan* kadagiti pagarian,+Ti pintas ken pagpampannakkel dagiti Caldeo,+Agbalinto a kas iti Sodoma ken Gomorra idi dinadael dagita ti Dios.+
20 Saanton a pulos mapagnaedan,Saanto metten a mapagnaedan iti amin a henerasion.+
Awanto ti Arabo nga agtolda sadiay,Ken awanto dagiti pastor a mangyapon kadagiti tarakenda sadiay.
21 Agiddanto sadiay dagiti animal iti desierto,Mapnonto iti kullaaw dagiti balayda.
Agtaengto sadiay dagiti abestrus,+Ken aglagtolagtonto sadiay dagiti atap a kalding.*
22 Agtaguobto dagiti animal kadagiti torrena,Ken dagiti chakal iti napipintas a palasiona.
Asidegen a maukom, ket saanen nga agbayag.”+
Footnotes
^ Wenno “pagilasinan a poste.”
^ Lit., “pinagbalinko a nasantuan.”
^ Lit., “ken dagiti Kesilda,” nalabit tumukoy iti Orion ken dagiti konstelasion iti aglawlawna.
^ Wenno “dekorasion.”
^ Wenno mabalin a, “kasla kalding a demonio.”
