Isaias 41:1-29
41 “Agulimekkayo* ket dumngegkayo kaniak, dakayo nga isla;Bumilegkayo, dakayo a nasion.
Umasideg ken agsaokayo.+
Agsasangotayo ket ukomenkayo.
2 Asino ti nangdutok iti maysa manipud iti pagsingisingan ti init,*+Nga ayabanna iti sakana tapno mangipakat iti hustisia,*Tapno iyawatna kenkuana dagiti nasionKet parmekenna dagiti ari?+
Asino ti namagbalin kadakuada a kasla tapok iti sanguanan ti espadana,Kas iti garami a nayangin iti sanguanan ti panana?
3 Kamatenna ida, awan ti makalapped kenkuana a lumasatKadagiti dalan a saanna pay a nagnagnaan.
4 Asino ti nagtignay ken nangaramid iti daytoy,A nangayab kadagiti henerasion manipud idi un-unana?
Siak, ni Jehova, Daydiay Umuna;+Ket kadagidiay maudi, siak met laeng daydiay.”+
5 Nakita dayta dagiti isla ket nagbutengda.
Nagpigerger dagiti ungto ti daga.
Immasideg ken nagpasangoda.
6 Tulongan ti tunggal maysa ti kaduanaKen ibagana iti kabsatna: “Bumilegka.”
7 Iti kasta, pabilgen ti eksperto a trabahador ti latero;+Daydiay parapitpit babaen ti martilioPabilgenna ti mammanday.
Ibagana maipapan iti panaglanang: “Nasayaat.”
Kalpasanna, mailansa tapno saan a matumba.
8 “Ngem sika ti adipenko, O Israel,+Sika ti pinilik, O Jacob,+Ti kaputotan* ni Abraham a gayyemko,+
9 Sika, nga innalak kadagiti ungto ti daga,+Ken sika, nga inayabak kadagiti kaadaywan a lugar.
Imbagak kenka, ‘Sika ti adipenko;+Pinilika; saanka nga inlaksid.+
10 Dika agbuteng, ta addaak kenka.+
Dika madanagan, ta siak ti Diosmo.+
Patibkerenkanto, wen, tulongankanto,+Talaga nga iggamankanto babaen ti kannawan nga imak ti kinalinteg.’
11 Maibabain ken maipababanto ti amin a makapungtot kenka.+
Awanto ti pagbanagan dagiti makilaban kenka ken mataydanto.+
12 Birokemto dagiti makilaban kenka, ngem saanmonto a mabirokan ida;Dagiti makilablaban kenka ket agbalinto a kasla awan.+
13 Ta siak, ni Jehova a Diosmo, ig-iggamak ti kannawan nga imam,Daydiay mangibagbaga kenka, ‘Dika agbuteng. Tulongankanto.’+
14 Dika agbuteng, sika nga igges* a Jacob,+Dakayo nga umili ti Israel, tulongankayto,” kuna ni Jehova, ti Manangsaka kadakayo,+ Daydiay Nasantuan ti Israel.
15 “Inaramidka a pagirik a pasagad,+Maysa a baro nga alikamen a pagirik a natadem.
Payatpayatemto dagiti bantay ket rumekem dagitaKen pagbalinemto dagiti turod a kasla taep.
16 Itaepmonto ida,Ket maitayabdanto;Iwarawaranto ida ti napigsa nga angin.
Agragsakkanto gapu ken Jehova,+Ken ipagpannakkelmonto Daydiay Nasantuan ti Israel.”+
17 “Dagidiay marigrigat ken napanglaw agsapsapulda iti danum, ngem awan.
Namagaan ti dilada gapu ta mawawda.+
Siak, ni Jehova, sungbatakto ida.+
Siak, ti Dios ti Israel, saankonto a baybay-an ida.+
18 Pagayusekto dagiti karayan kadagiti kalbo a turod+Ken addanto ubbog kadagiti tanap.+
Agbalinto a nadanum ti let-angKen agubbogto ti namaga a daga.+
19 Imulakto iti desierto ti kayo a sedro,Ti akasia,* mirto, ken saleng.+
Imulakto iti desierto ti kayo a parwa,Kasta met ti kayo a presno ken sipres,+
20 Tapno makita ken maammuan ti amin a taoKet dumngeg ken matarusandaNga inaramid daytoy ti ima ni Jehova,Ken pinarsua daytoy Daydiay Nasantuan ti Israel.”+
21 “Idatagyo ti darumyo,” kuna ni Jehova.
“Iparangyo dagiti argumentoyo,” kuna ti Ari ti Jacob.
22 “Mangpataudkayo iti ebidensia ken ibagayo kadakami dagiti banag a mapasamak.
Ibagayo kadakami dagiti napalabas* a banag,Tapno panunotenmi* dagita ket maammuanmi ti pagbanaganda.
Wenno ibagayo kadakami dagiti banag nga umay.+
23 Ibagayo kadakami ti mapasamak iti masanguanan,Tapno maammuanmi a dioskayo.+
Wen, agaramidkayo iti aniaman, naimbag man wenno dakes,Tapno masdaawkami no makitami.+
24 Awan serserbiyo,Awan a pulos ti nagapuananyo.+
Makarimon ti asinoman a mangpili kadakayo.+
25 Adda dinutokak manipud amianan, ket umayto,+Aggapu iti pagsingisingan ti init*+ nga umawag iti naganko.
Ipayatpayatnanto dagiti agtuturay* a kasla pila,+Kas iti agdamdamili a mangipayatpayat iti nabasa a pila.
26 Asino ti nangibaga iti daytoy manipud idi un-unana, tapno maammuanmi,Wenno iti napalabas, tapno maibagami, ‘Husto’?+
Wen, awan ti nangipakaammo iti dayta!
Awan ti nangibaga!
Awan ti nakangngeg kadakayo!”+
27 Siak ti immuna a nangibaga iti Sion: “Kitaenyo ti mapasamak!”+
Mangibaonakto idiay Jerusalem iti mangidanon iti naimbag a damag.+
28 Intultuloyko ti kimmita, ngem awan ti nakitak;Awan uray maysa kadakuada ti mangted iti balakad.
Nagsalsaludsodak, ngem awan ti simmungbat.
29 Aminda ket ilusion.*
Awan ti maaramidanda.
Saan nga agpaypayso ken kasla angin dagiti metal nga imahenda.*+
Footnotes
^ Wenno “Agulimekkayo iti sanguanak.”
^ Wenno “manipud iti daya.”
^ Kayatna a sawen, tapno agserbi Kenkuana.
^ Lit., “bin-i.”
^ Kayatna a sawen, awan gawayna ken nanumo.
^ Klase ti akasia a siitan nga agtubo iti desierto.
^ Lit., “immuna.”
^ Wenno “ipapusomi.”
^ Wenno “Manipud iti daya.”
^ Wenno “diputado.”
^ Wenno “banag nga awan.”
^ Wenno “sinukog nga estatuada.”
