Isaias 48:1-22
48 Dumngegkayo, O sangakabbalayan ni Jacob,Dakayo a mangaw-awag iti bagiyo iti nagan ti Israel+Ken naggapu kadagiti danum ti* Juda,Dakayo nga agsapsapata iti nagan ni Jehova+Ken mangidaydayaw iti Dios ti Israel,Nupay saan nga iti kinapudno ken kinalinteg.+
2 Ta aw-awaganda ti bagida iti nagan ti nasantuan a siudad,+Ken agpatpatulongda iti Dios ti Israel,+A ti naganna ket Jehova a panguluen dagiti armada.
3 “Nabayagen nga imbagak kadakayo dagiti napalabas* a banag.
Rimmuar dagita iti ngiwatko,Ken impakaammok dagita.+
Dagus a nagtignayak, ket natungpalda.+
4 Gapu ta ammok ti kinasukiryo—Landok ti tengngedyo ken gambang ti mugingyo+—
5 Idi pay nga imbagak kadakayo.
Impangngegko kadakayo sakbay pay a napasamak,Tapno diyo ibaga, ‘Inaramid daytoy ti idolok;Ken imbilin ti kinitikitan nga imahen ken ti metal nga imahenko.’*
6 Nangngeg ken nakitayo amin daytoy.
Saanyo kadi nga ipakaammo?+
Manipud ita, ibagak kadakayo dagiti baro a banag,+Dagiti sekreto a diyo naammuan.
7 Ita laeng a maparsuada, ket saan pay a nabayag,Ti bambanag nga ita laeng a mangngegyo,Tapno diyo ibaga, ‘Ammomin dagita.’
8 Saan, diyo nangngeg,+ diyo naammuan,Nakarikep idi ti lapayagyo.
Ta ammok a nakaro ti panangallilawyo,+Ken naawagankayo iti managbasol sipud idi nayanakkayo.+
9 Ngem igawidkonto ti pungtotko gapu iti naganko;+Ken agteppelakto gapu iti dayawko,Ket saankayto a papatayen.+
10 Pinasudikayo, ngem saan a kas iti pirak.+
Impalubosko nga agrigatkayo tapno madalusankayo* kas iti pannakatunaw ti metal iti urno.+
11 Agtignayakto maigapu laeng iti naganko,+Ta apay koma nga ipalubosko a malais ti naganko?+
Diak ited ti dayagko iti asinoman.*
12 Denggennak, O Jacob, ken sika Israel nga inayabak.
Siak met laeng Daydiay.+ Siak ti umuna; ken siak ti maudi.+
13 Insaad ti imak ti pundasion ti daga,+Ken inyunnat ti kannawan nga imak ti langit.+
Agtakderda amin no ayabak ida.
14 Aguummongkayo amin, ket dumngegkayo.
Asino kadakuada ti nangibaga kadagitoy a banag?
Isu ket inayat ni Jehova.+
Aramidennanto ti pakaragsakanna maibusor iti Babilonia,+Ken idissonanto ti imana maibusor kadagiti Caldeo.+
15 Siak ti nagsao, ken siak ti nangayab kenkuana.+
Inyegko, ket agballiginto ti aramidenna.+
16 Umasidegkayo kaniak, ket denggenyo daytoy.
Manipud rugi, saanak a nagilimlimed.+
Addaakon sadiay sakbay a napasamak dayta.”
Ket ita imbaonnak ti Kangatuan* nga Apo Jehova, ken* ti espirituna.
17 Daytoy ti kinuna ni Jehova, ti Manangsaka kadakayo, Daydiay Nasantuan ti Israel:+
“Siak, ni Jehova a Diosyo,Daydiay mangisursuro kadakayo tapno magunggonaankayo,*+Daydiay mangiturturong iti dalan a rumbeng a pagnaanyo.+
18 No laeng koma tungpalenyo dagiti bilinko!+
Iti kasta, agbalin ti talnayo a kas iti karayan,+Ken ti kinalintegyo a kas kadagiti dalluyon ti baybay.+
19 Umadunto ti kaputotam* a kas iti darat,Ken dagiti annakmo a kas kadagiti binukel dayta.+
Saanto a maikkat wenno mapunas ti naganda iti sanguanak.”
20 Rummuarkayo iti Babilonia!+
Libasanyo dagiti Caldeo!
Siraragsak nga ipakaammoyo dayta! Ideklarayo!+
Ibagayo dayta agingga kadagiti ungto ti daga.+
Kunayo: “Sinaka ni Jehova ti adipenna a ni Jacob.+
21 Saanda a nawaw idi inturongna ida kadagiti desierto.+
Pinagayusna ti danum iti dakkel a bato para kadakuada;Pinisina ti dakkel a bato ket pimsuak ti danum.”+
22 “Awan ti talna kadagiti dakes,” kuna ni Jehova.+
Footnotes
^ Wenno mabalin a, “nagtaud iti.”
^ Lit., “immuna.”
^ Wenno “sinukog nga estatuak.”
^ Wenno “masukimatkayo.” Wenno mabalin a, “mapilikayo.”
^ Wenno “Diak ibingay ti dayagko iti asinoman.”
^ Wenno “Soberano.”
^ Wenno “agraman.”
^ Wenno “para iti pagsayaatanyo.”
^ Lit., “bin-im.”
