Isaias 65:1-25
65 “Binay-ak a mabirokandak dagidiay saan a nagsaludsod maipapan kaniak;Binay-ak a masarakandak dagidiay saan a nangsapul kaniak.+
Kinunak iti nasion a saan nga umaw-awag iti naganko, ‘Adtoyak, adtoyak!’+
2 Agmalmalem nga inyunnatko ti imak iti nasukir nga ili,+Kadagidiay magmagna iti dakes a dalan,+A mangsursurot iti bukodda a kapanunotan;+
3 Ti ili a kanayonna nga iparupa ti pananginsultona kaniak,+Nga agdatdaton kadagiti hardin+ ken mangipapaay iti daton a mangpataud iti asuk iti rabaw dagiti ladrilio.
4 Agtugawda iti tengnga dagiti tanem,+Ken umyanda kadagiti nalmeng a disso,*A mangmanganda iti karne ti baboy,+Ken digo dagiti nabangsit* a banag nga adda iti malukongda.+
5 Kunada, ‘Ditaka laeng; dika umasideg kaniak,Ta nasansantuanak ngem sika.’*
Dagitoy ti asuk ti agongko, apuy a sumsumged iti agmalmalem.
6 Naisurat dayta iti sanguanak;Diakto agtalna,No di ket balsekto ida,+Naan-anayto a balsek ida*
7 Gapu iti biddutda ken iti biddut dagidi ammada,”+ kuna ni Jehova.
“Ta nangipaayda iti daton a mangpataud iti asuk kadagiti bantay,Ken linaisdak kadagiti turod,+Umunanto a rukodek a naan-anay* dagiti tangdanda.”
8 Daytoy ti kinuna ni Jehova:
“No kasano nga adda masarakan a baro nga arak iti sangaraay nga ubasKen adda mangibaga, ‘Dika dadaelen, ta adda nasayaat* iti dayta,’
Kastanto met ti aramidek kadagiti adipenko;Saankonto a dadaelen amin ida.+
9 Mangpataudakto ken Jacob iti kaputotan*Ket mangpataudak ken Juda iti agtawid kadagiti bantayko;+Tagikuaento dayta dagiti pinilik,Ket agyanto sadiay dagiti adipenko.+
10 Agbalinto ti Sharon+ a pagpastoran iti karneroKen ti Tanap* ti Akor+ kas paginanaan dagiti baka,Para iti ilik a mangsapul kaniak.
11 Ngem karamankayo kadagidiay nangtallikud ken Jehova,+Dagidiay nanglipat iti nasantuan a bantayko,+Dagidiay nangisagana iti lamisaan para iti dios ti Suerte,Ken nangpunno kadagiti kopa ti arak para iti dios ti Gasat.
12 Ikeddengkonto ngarud a mataykayo iti espada,+Ket agdumogkayto amin tapno mapapatay,+Gapu ta immawagak, ngem dikay simmungbat,Nagsaoak, ngem dikay dimngeg;+Inar-aramidyo ti dakes iti imatangko,Ken piniliyo ti saanko a pakaragsakan.”+
13 Gapuna, daytoy ti kinuna ti Kangatuan* nga Apo Jehova:
“Manganto dagiti adipenko, ngem agbisinkayto.+
Uminumto dagiti adipenko,+ ngem mawawkayto.
Agrag-onto dagiti adipenko,+ ngem maibabainkayto.+
14 Agpukkawto a siraragsak dagiti adipenko gapu ta nasayaat ti pusoda,Ngem agsangitkayto gapu ta nasaem ti pusoyoKen agdung-awkayto gapu iti naladingit nga espiritu.
15 Mangibatikayto iti nagan a pangilunod dagiti pinilik,Ket papatayennakayto ti Kangatuan nga Apo Jehova,Ngem awagannanto dagiti adipenna iti sabali a nagan;+
16 Tapno asinoman a mangbendision iti bagina iti dagaBendisionanto ti pudno* a Dios,Ket asinoman nga agsapata iti dagaAgsapatanto iti nagan ti pudno* a Dios.+
Ta malipatanton dagiti immun-una a rigat;*Saankonton a kitaen dagita.+
17 Ta mangparsuaak iti baro a langit ken baro a daga;+Ket saanton a malagip dagiti immun-una a banag,Ken saanton nga agtalinaed dagita iti puso.+
18 Agragsak ken agrag-okayo ngarud iti agnanayon gapu iti parsuaek.
Ta parsuaek ti Jerusalem a pakaigapuan iti panagrag-oKen ti ilina a pakaigapuan ti panagragsak.+
19 Agrag-oakto iti Jerusalem ken agragsakak iti ilik;+Awanton ti mangngeg kenkuana a panagsangit wenno panagasug gapu iti rigat.”+
20 “Awanton sadiay ti maladaga nga agbiag iti sumagmamano laeng nga aldaw,Wenno lakay a saanna a makompleto dagiti aldawna.
Ta maibilangto nga ubing pay ti matay a sangagasut ti tawenna;Ket mailunodto ti managbasol, uray no sangagasut ti edadna.*
21 Mangbangondanto kadagiti balay ket agnaedda kadagita,+Ken agmuladanto kadagiti ubas ket kanenda ti bungada.+
22 Didanto mangbangon ket sabali ti agnaed,Didanto agmula ket sabali ti mangan.
Ta kaslanto iti kapaut ti maysa a kayo ti kapaut dagiti aldaw ti tattaok,+Ket naan-anayto a tagiragsaken dagiti pinilik ti aramid ti imada.
23 Didanto agbannog* iti awan serserbina,*+Ken didanto mangipasngay iti annak nga agsagaba,Ta isuda ti kaputotan* a binendisionan ni Jehova,+Agraman dagiti annakda.+
24 Sumungbatakto sakbay pay nga umawagda;Denggekto ida bayat nga agsasaoda.
25 Agkaduanto a mangan ti lobo ken ti urbon a karnero,Manganto iti garami ti leon a kas iti baka,+Ket tapokto ti kanen ti uleg.
Didanto mangdangran wenno mangdadael iti intero a nasantuan a bantayko,”+ kuna ni Jehova.
Footnotes
^ Wenno mabalin a, “pagbantayan a kalapaw.”
^ Wenno “narugit.”
^ Wenno mabalin a, “Ta iyakarkonto kenka ti kinanasantuanko.”
^ Lit., “Supapakakto ida iti barukongda.”
^ Lit., “iti barukongda.”
^ Lit., “bendision.”
^ Lit., “bin-i.”
^ Wenno “Kapatagan.”
^ Wenno “Soberano.”
^ Wenno “matalek.” Lit., “Amen.”
^ Wenno “matalek.” Lit., “Amen.”
^ Wenno “riribuk.”
^ Wenno mabalin a, “Ket maibilangto a nailunod ti saan a makaabut iti sangagasut a tawen.”
^ Wenno “agtrabaho a sipipinget.”
^ Wenno “kapapay-anna.”
^ Lit., “bin-i.”
