Isaias 9:1-21
9 Nupay kasta, ti kinakuyem ket saanto a kas idi adda riribuk iti daga, kas idi tiempo a naibabain ti daga ti Zabulon ken daga ti Neftali.+ Ngem inton agangay, pagbalinenna a maidaydayaw dayta—ti dalan nga agturong iti baybay, iti rehion ti Jordan, iti Galilea a pagnanaedan dagiti ganggannaet.
2 Dagiti tattao a magmagna iti kasipngetanNakitada ti naraniag a lawag.
Dagidiay agnanaed iti daga a nakaro ti kinasipngetna,Nagsilnag kadakuada ti lawag.+
3 Pinaadum ti populasion ti nasion;Pinaragsakmo dayta iti kasta unay.
Nagragsakda iti sanguanamKas iti panagragsak ti tattao iti tiempo ti panagani,Kas dagidiay siraragsak nga agbibingay iti samsam.
4 Ta pinutedputedmo ti assiw ti aw-awitenda,Ti baston iti abagada, ti sarukod ti mangidadaulo iti trabaho,Kas idi kaaldawan ti Midian.+
5 Tunggal botas a manggunggon iti daga bayat nga agmarmartsaKen tunggal bado a nayuper iti daraKet agbalinto a sungrod ti apuy.
6 Ta adda ubing a nayanak kadatayo,+Naited kadatayo ti maysa nga anak a lalaki;Ket maiparabawto iti abagana ti panagturay.*+
Mapanagananto iti Masirib a Mamalbalakad,+ Mannakabalin a Dios,+ Agnanayon nga Ama, Prinsipe ti Kappia.
7 Agsaknapto ti panagturayna*Ken saanto nga agpatingga ti kappia,+Iti trono ni David+ ken iti pagariannaTapno tumibker+ ken mataginayon daytaBabaen ti kinahustisia+ ken kinalinteg+Manipud ita ken iti agnanayon.
Maaramidto daytoy gapu iti regta ni Jehova a panguluen dagiti armada.
8 Pinakdaaran ni Jehova ti Jacob,Ket dimteng dayta iti Israel.+
9 Maammuanto dayta ti amin nga umili—ti Efraim ken dagiti agnanaed iti Samaria—A mangibaga gapu iti kinatangsitda ken iti kinatangken ti pusoda:
10 “Narba dagiti ladrilio,Ngem natikap a batbato ti pagibangonminto.+
Napukan dagiti kayo a sikomoro,Ngem sukatanminto dagita kadagiti sedro.”
11 Palubosanto ni Jehova nga agballigi dagiti kalaban ni RezinKet sugsogannanto nga agtignay dagiti kabusorna,
12 Ti Siria iti daya ken dagiti Filisteo iti laud,*+Agngangadanto ket alun-onenda ti Israel.+
Maigapu amin kadagitoy, saanna nga imbabawi ti pungtotna,No di ket nakalayat pay laeng ti imana tapno mangdusa.+
13 Ta saan a nagsubli dagiti umili iti Daydiay nangkabil kadakuada;Saanda a sinapul ni Jehova a panguluen dagiti armada.+
14 Ikkatento ni Jehova iti IsraelTi ulo ken ipus, saringit ken lidda,* iti maysa laeng nga aldaw.+
15 Ti ulo ket ti panglakayen ken daydiay mararaem unay,Ti ipus ket ti propeta a mangmangted iti di umiso a bilin.+
16 Dagidiay mangidadaulo iti daytoy nga ili ti mangyaw-awan kadakuada,Ken matikaw dagidiay idadauluanda.
17 Dayta ti makagapu a saanto a maragsakan ni Jehova kadagiti agtutuboda a lallaki,Ket saanto a maasian kadagiti awanan ama nga ubbing* ken balo a babbaiTa apostatada amin ken agar-aramidda iti dakes+Ken agsasao ti tunggal maysa iti awan serserbina.
Maigapu amin kadagitoy, saanna nga imbabawi ti pungtotna,No di ket nakalayat pay laeng ti imana tapno mangdusa.+
18 Ta ti kinadakes ket kas iti apuy a manguram,A mangibus kadagiti siitan a mula ken ruot.
Uramennanto ti nasamek a kabakiran,Ket agpangatodanto a kas iti asuk.
19 Iti pungtot ni Jehova a panguluen dagiti armada,Nauram ti daga,Ket agbalinto dagiti tattao a sungrod ti apuy.
Awanto ti mangisalakan uray ti kabsatna.
20 Mangalanto ti maysa iti kanenna iti kannawanNgem mabisinto latta;Mangalanto ti maysa iti kanenna iti kannigidNgem saanto a mapnek.
Kanento ti tunggal maysa ti lasag ti takiagna,
21 Alun-onento ti Manases ti Efraim,Ket alun-onento ti Efraim ti Manases.
Agkaduadanto a bumusor iti Juda.+
Maigapu amin kadagitoy, saanna nga imbabawi ti pungtotna,No di ket nakalayat pay laeng ti imana tapno mangdusa.+
Footnotes
^ Wenno “gobierno; panagturay kas prinsipe.”
^ Wenno “gobiernona; panagturayna kas prinsipe.”
^ Lit., “likudan.”
^ Wenno mabalin a, “sanga ti palma ken runo.”
^ Wenno “ulila.”
