Jeremias 2:1-37
2 Kinuna kaniak ni Jehova:
2 “Mapanka ket ipakaammom iti Jerusalem, ‘Daytoy ti imbaga ni Jehova:
“Silalagipak iti debosionmo* idi agtutuboka,+Ti ayat nga impakitam idi naitulagkan a makiasawa,+Idi sinursurotnak idiay let-ang,Ti daga a saan a namulaan.+
3 Nasantuan idi ti Israel ken Jehova,+ ti umuna a bungbunga ti apitna.”’
‘Makabasol ti asinoman a mangraut kenkuana.
Didigra ti agur-uray kadakuada,’ kuna ni Jehova.”+
4 Denggem ti sao ni Jehova, O sangakabbalayan ni Jacob,Ken dakayo amin a pamilia iti sangakabbalayan ti Israel.
5 Daytoy ti kuna ni Jehova:
“Ania a kamali ti nakita kaniak dagidi ammayo,+Isu nga immadayoda unay kaniak,Ken nagdaydayawda kadagiti awan serserbina a didiosen+ isu a nagbalinda met nga awan serserbina?+
6 Saanda nga imbaga, ‘Ayan ni Jehova,Daydiay nangiruar kadatayo idiay Egipto,+Daydiay nangidalan kadatayo iti let-ang,Iti lugar a desierto+ ken ayan dagiti abut,Iti lugar a natikag+ ken nakasipsipnget,Iti daga a saan a pappapananKen saan a pagnanaedan dagiti tattao?’
7 Kalpasanna, impankayo iti daga nga adu ti kaykayona,Tapno kanenyo dagiti bunga ken ti nasayaat a bambanagna.+
Ngem simrekkayo ket rinugitanyo ti dagak;Pinagbalinyo a makaparurod ti tawidko.+
8 Saan nga insaludsod dagiti papadi: ‘Ayan ni Jehova?’+
Saandak nga am-ammo dagidiay mangisursuro iti Linteg,Nagrebelde kaniak dagiti pastor,+Nagipadto dagiti propeta iti nagan ni Baal,+Ket sinurotda dagidiay saan a makaited iti pagimbagan.
9 ‘Isu nga addanto latta ipabasolko kadakayo,’+ kuna ni Jehova,‘Agraman kadagiti annak dagiti annakyo.’
10 ‘Ngem bumallasiwkayo kadagiti igid ti baybay* ti Kitim+ ket kitaenyo.
Wen, mangibaonkayo iti mensahero idiay Kedar+ ken panunotenyo a naimbag;Kitaenyo no addan napasamak a kas iti daytoy.
11 Adda kadin nasion a nangisukat kadagiti diosna kadagiti saan a dios?
Ngem awan serserbi ti nangisukatan ti mismo nga ilik iti dayagko.+
12 Mingminganyo daytoy gapu iti siddaaw, dakayo a langlangit;Agpigergerkayo gapu iti nakaro a buteng,’ kuna ni Jehova,
13 ‘Ta adda dua a dakes a banag nga inaramid ti ilik:
Pinanawandak kas ti ubbog ti sibibiag a danum,+Ken nagkalida* kadagiti pagurnongan iti danum,Nagrengngat a pagurnongan iti danum a di makaurnong iti danum.’
14 ‘Ni kadi Israel ket adipen wenno tagabo a nayanak iti sangakabbalayan?
Apay ngarud nga innala dagiti kabusor?
15 Ngumernger kenkuana dagiti urbon a leon;*+Pinapigsada ti panagngerngerda.
Pinagbalinda a nakabutbuteng ti dagana.
Nauram dagiti siudadna, tapno awan ti agnaed kadagita.
16 Kalkalbuen dagiti umili ti Nof*+ ken Tapanes+ ti dagam.*
17 Saan kadi a sika a mismo ti makagapu a napasaram daytoyTa pinanawam ni Jehova a Diosmo+Bayat a kibkibinennaka iti dalan?
18 Ita, apay a kayatmo ti mapan idiay Egipto+Tapno uminumka iti danum ti Sihor?*
Apay a kayatmo ti mapan idiay Asiria+Tapno uminumka iti danum ti Karayan?*
19 Agnakemka koman manipud iti kinadakesmo,Ken tubngarennaka koma ti saanmo a kinamatalek.
Ammuem ken amirisem a nagdakes ken nagpait+Ti panangpanawmo ken Jehova a Diosmo;Awan panagbutengmo kaniak,’+ kuna ti Kangatuan* nga Apo, ni Jehova a panguluen dagiti armada.
20 ‘Ta nabayagen nga inikkatko ti sangolmo+Pinugsatko dagiti galutmo.
Ngem kinunam: “Saanak nga agserbi kenka,”
Ta iti rabaw ti tunggal nangato a turod ken iti sirok ti tunggal narukbos a kayo+Nagid-iddaka a nakadata ket nagbalangkantiska.+
21 Immulaka kas dekalidad a nalabaga a puon ti ubas,+ manipud iti puro a bukel;Apay ngarud a bimmaba ti kalidadmo ket nagbalinka a balang a puon ti ubas iti sanguanak?’+
22 ‘Uray no agbuggoka iti soda* wenno agusarka iti turo,*Makitak latta ti mansa ti basolmo,’+ kuna ti Kangatuan nga Apo Jehova.
23 Kasano koma a maibagam, ‘Diak rinugitan ti bagik.
Saanak a nagdaydayaw kadagiti Baal’?
Kitaem ti dalanmo iti tanap.
Panunotem ti inaramidmo.
Kaska la iti agmaya a naparagsit nga urbon a kamelioA taray a taray iti sadinoman a kayatna a papanan;
24 Kas iti atap nga asno a nairuamen iti let-ang,A mangsaysay-up iti angin bayat a kapigsa ti riknana* a makidenna;Asino ti makaigawid kenkuana iti panagmayana?
Saan nga agpakarigat dagidiay mangbirbirok kenkuana.
Ta alistoda la a masarakan iti tiempo ti panagmayana.*
25 Saanka nga agsakasakaDimo itulok a mamagaan ti karabukobmo.
Ngem imbagam, ‘Saanen a mabalin!+
Saanen! Natnagen ti riknak kadagiti estranghero,*+Isu a surotek ida.’+
26 Kas iti pannakaibabain ti mannanakaw no matiliwan,Naibabain met ti sangakabbalayan ti Israel,Dagiti arida, prinsipeda,Papadida, ken propetada.+
27 Ibagbagada iti kayo, ‘Sika ti amak,’+
Ken iti bato, ‘Sika ti inak.’
Ngem tinallikudandak imbes nga asitgandak.+
Ngem ibagada inton madidigrada,‘Tulongan ken isalakannakami!’+
28 Ayanna ngaruden dagiti inaramidmo a didiosem?+
Bay-am a tulongandaka no kabaelandaka nga isalakan iti pannakadidigram,Ta immadu ti didiosem a kas iti kaadu dagiti siudadmo, O Juda.+
29 ‘Apay nga itultuloyyo ti mangkontra kaniak?
Apay a nagrebeldekayo amin kaniak?’+ kuna ni Jehova.
30 Awan serserbina ti panangkabilko kadagiti annakyo.+
Saanda nga inawat ti disiplina.+Mismo nga espadayo ti nangpapatay kadagiti propetayo,+Kas iti dumarup a leon.
31 Dakayo a henerasion, panunotenyo ti sao ni Jehova.
Nagbalinak aya a let-ang iti IsraelWenno nakasipsipnget a daga?
Apay nga imbaga dagitoy a tattaok, ‘Mapankami iti kaykayatmi.
Saankaminton nga umay kenka’?+
32 Malipatan aya ti maysa a balasang dagiti pagpapintasna,*Malipatan aya ti agkasar a nobia ti naarkosan a barikesna?*
Ngem nabayagen a nalipatandak dagiti mismo a tattaok.+
33 O babai, naglaingka nga agbirok iti lallaki a mangayat kenka!
Inruammo ta bagim nga agaramid iti dakes.+
34 Namansaan pay ketdi dagiti paldam iti dara dagiti inosente a pobre,*+Nupay saanko ida a nakita a mangserserrek iti balay;Nakitak latta ti darada iti amin a paldam.+
35 Ngem ibagbagam, ‘Inosenteak.
Sigurado a bimmaawen ti pungtotna kaniak.’
Iyegko itan ti pannakaukommoGapu ta imbagam, ‘Saanak a nakabasol.’
36 Apay a tagtagilag-anem unay ti panagbaliwbaliw ti panunotmo?
Maibabainkanto met gapu iti Egipto,+Kas iti pannakaibabainmo gapu iti Asiria.+
37 Gapu met iti daytoy, rummuarkanto a nakaparabaw dagita imam iti ulom,+Ta linaksid ni Jehova dagidiay nagtalkam;Saandakanto a mapagballigi.”
Footnotes
^ Wenno “napudno nga ayatmo.”
^ Wenno “isla.”
^ Wenno “nagkungkongda,” nalabit iti dakkel a bato.
^ Wenno “burboran a bumaro a leon.”
^ Wenno “Memfis.”
^ Lit., “Kankanen dagiti umili ti Nof ken Tapanes ti kuppokuppom.”
^ Kayatna a sawen, maysa a sanga ti Karayan Nilo.
^ Kayatna a sawen, ti Eufrates.
^ Wenno “Soberano.”
^ Wenno “alkali.”
^ Wenno “sabon.”
^ Wenno “panagtarigagay ti kararuana.”
^ Lit., “iti bulanna.”
^ Wenno “ganggannaet a dios.”
^ Wenno “barikesna a pangkasar.”
^ Wenno “arkosna.”
^ Wenno “kararua.”
