Jeremias 35:1-19
-
Mapagulidanan ti kinatulnog dagiti Rekabita (1-19)
35 Daytoy ti mensahe ni Jehova ken Jeremias idi kaaldawan ti anak ni Josias a ni Jehoiakim+ nga ari ti Juda:
2 “Mapanka iti sangakabbalayan dagiti Rekabita.+ Kasaritam ken ipanmo ida iti maysa kadagiti siled a panganan* iti balay ni Jehova sa ikkam ida iti inumenda nga arak.”
3 Isu nga innalak ni Jaazanias nga anak ni Jeremias nga anak ni Habazinias, dagiti kakabsatna, amin nga annakna a lallaki, ken ti intero a sangakabbalayan dagiti Rekabita ket impanko
4 iti balay ni Jehova. Impanko ida iti siled a panganan dagiti annak ni Hanan nga anak ni Igdalias nga adipen ti pudno a Dios. Kaabay dayta ti siled a panganan dagiti prinsipe nga adda iti ngato ti siled a panganan ni Maasias nga anak ni Salum a parabantay iti ruangan.
5 Kalpasanna, pinasanguak ti sangakabbalayan dagiti Rekabita kadagiti kopa ken kopita a napno iti arak ket imbagak: “Uminumkayo iti arak.”
6 Ngem imbagada: “Saankami nga uminum iti arak, ta imbilin ni Jehonadab*+ nga anak ni Rekab, nga apongmi, ‘Dikay pulos uminum iti arak, uray dagiti annakyo.
7 Dikay met agbalay, agtalon, wenno agmula wenno maaddaan iti kaubasan. Kanayon ketdi nga agyankayo kadagiti tolda tapno agbiagkayo iti napaut iti lugar a pakipagnanaedanyo.’
8 Gapuna intultuloymi ti nagtulnog iti amin nga imbaga ni Jehonadab nga anak ni Rekab nga apongmi ket saankami a pulos nga imminum iti arak ken uray dagiti assawami ken dagiti annakmi a lallaki ken babbai.
9 Saankami met nga agbangon iti balaymi, wenno maaddaan iti kaubasan wenno taltalon wenno bin-i.
10 Tolda latta ti pagnanaedanmi ken agtultulnogkami iti amin nga imbilin daydi apongmi a ni Jehonadab.*
11 Ngem idi immay ni Ari Nabucodonosor* ti Babilonia tapno sakupenna ti daga,+ imbagami, ‘Umaykayo, ket mapantayo idiay Jerusalem tapno mapanawantayo ti armada dagiti Caldeo ken Siriano.’ Dayta ti makagapu nga agnanaedkami ita iti Jerusalem.”
12 Kinuna ni Jehova ken Jeremias:
13 “Daytoy ti imbaga ni Jehova a panguluen dagiti armada, ti Dios ti Israel, ‘Ibagam kadagiti tattao idiay Juda ken kadagiti agnanaed idiay Jerusalem: “Saan kadi a kanayon nga ibagbagak kadakayo nga agtulnogkayo iti sasaok?”+ kuna ni Jehova.
14 “Imbilin ni Jehonadab nga anak ni Rekab iti kaputotanna a saanda nga uminum iti arak ket tinungpalda ti imbagana. Saanda nga immin-inum iti arak agingga ita nga aldaw. Inaramidda ngarud ti imbilin ti apongda.+ Ngem saankayo a nagtulnog uray no maulit-ulit a nagsaoak kadakayo.*+
15 Maulit-ulit nga imbaonko kadakayo* ti amin nga adipenko a propeta,+ nga ibagbagak, ‘Pangngaasiyo ta isardengyo dagiti dakes nga aramidyo,+ ket aramidenyo ti umiso! Saankayo nga agdaydayaw ken agserbi kadagiti sabali a dios tapno agtultuloykayo nga agyan iti daga nga intedko kadakayo ken kadagidi ammayo.’+ Ngem didak dinengngeg wenno impangag.
16 Tinungpal dagiti kaputotan ni Jehonadab nga anak ni Rekab ti bilin daydi apongda,+ ngem saandak nga impangag dagitoy a tattao.”’”
17 “Daytoy ngarud ti imbaga ni Jehova a Dios dagiti armada, ti Dios ti Israel: ‘Iyegko iti Juda ken iti amin nga agnanaed iti Jerusalem ti amin a didigra nga impakpakaunak kadakuada,+ ta kinasaritak ida ngem dida nangipangag. Kanayon nga immawagak kadakuada ngem dida simmungbat.’”+
18 Ket imbaga ni Jeremias iti sangakabbalayan dagiti Rekabita: “Daytoy ti imbaga ni Jehova a panguluen dagiti armada, ti Dios ti Israel, ‘Gapu ta nagtulnogkayo iti bilin ni Jehonadab nga apongyo ken sursurotenyo ti amin nga imbilinna ken ar-aramidenyo ti eksakto nga imbilinna kadakayo,
19 daytoy ti imbaga ni Jehova a panguluen dagiti armada, ti Dios ti Israel: “Kanayon nga addanto agserbi kaniak a kaputotan ni Jehonadab* nga anak ni Rekab.”’”
Footnotes
^ Wenno “siled.”
^ Lit., “Jonadab,” ti napaababa a porma ti Jehonadab.
^ Lit., “Jonadab,” ti napaababa a porma ti Jehonadab.
^ Lit., “Nabucodorosor,” sabali pay nga ispelingna.
^ Lit., “nasapaak a bimmangon ken nagsao.”
^ Lit., “Nasapaak a bimmangon ken imbaonko.”
^ Lit., “Jonadab,” ti napaababa a porma ti Jehonadab.
